Da Arzergrande (PD)

Jasso de bojo

Eà situassion atuàe del mondo eà ne porta a ’vere na inclinassion de pensiero, un fià verso el coeóre scuro. E tuto pare ciapare na strada dove che no ghe xe svolte a destra o a sinistra. Bisogna par forza ’ndare driti e sercare, longo el percorso de sta vita, de fare mèjo che se poe, parché sta Tera eà ne tegna in brasso oncora par qualche tenpo.
Eà roba che se parla de pi, so sto periodo, xe el scongeamento de i jassi, de quei alpini che, da fonti atendìbii, i se ga ridoti del 75% so tuta eà superfice de ’a Tera. Se pensa che sóeo par el siolimento de i jassi alpini asiatici, dó miliardi de persone ’e patirà eà scarsità de aqua, tra i quai i abitanti de l’India, dove l’agricoltura par el 65% xe colegà a i jassi de l’Himalaja.
Me ga fato tanta pena védare un documentario dove na mama orsa eà jera de sora de na lastra de jasso, a eà deriva so ’l mare e, pi in là, so ’n’altra lastra de jasso, i orseti picinini che se alontanava da eà mama. In Italia, par queo che riguarda i jassi de ’e Alpi, dal 1962 a ’desso, semo rivà al 40% in manco. ’E conseguense, podemo sóeo dire che no ’e xe bèe. Purtropo eà xe eà realtà! ’E xe prevision fate da siensiati che studia da eà matina a eà sera ste robe qua e no i poe sbaliarse de tanto. Eà causa xe l’efeto sera che de suo el sarìa un fenomeno naturàe, ma l’omo el ghe dà na man co ’e deforestassion e co tute ’e pratiche de vita che va contro ogni logica.
Védare montagne de jasso che pian pian se desfa fa vegnere eà pèe de capon parché savemo ben eà inportanza de sto fato, anche in termini de sopravivenza, oltre che par i animài, anche par l’omo. Questo conporta inevitabilmente l’inalzamento de i mari co eà conseguenza che de pi de qualche ìsoea sparirà da eà cartina geografica e tanta zente che ’desso i se góngoea parché i ga eà casa in riva al mare, dopo i sarà costreti a emigrare. Eà me paroea scrita qua voe èssare sóeo na vose che se zonta a ’e tante, come un eco che riporta altre vose, sóeo par dire che pi che semo a parlàrghene, mèjo xe e se poe sperare che qualcossa canbia, soratuto nel conportamento e ne ’a mente de chi che ga el potere in man e sicuramente el podarìa fare tanto, tanto de pi.

[torna sopra]