Da Venezia

El “Nicelli”

L’aeroporto “Nicelli” al Lido de Venessia. (foto VicDabor)

’A saea principàe de l’aeroporto con un bar de altri tempi…

Al Lido de Venessia, tra ’e tante beesse che se pol amirar, ormai pochi i se ricorda de ’ndar a visitar l’aeroporto “Nicelli”, esenpio de beessa originàe de l’architetura rassionaista de i ani ’30 del Novesento, insieme a altre numerose primissie storiche che el vanta.
Come un segno che apartien a tuta Venessia, par proprio che in mezo a la laguna gabia ’vùo destin fortunà tanti fati straordinari che tuti insieme i rende ’a Cità Marciana invidiada da tuto el mondo.
No stupìmose mai che qua ’a storia, l’arte, ’a forsa, ’a grandessa de queo che ze stada ’a Serenissima, da ’a nàssita del mito a i giorni nostri, nonostante i sècoi passài in gran nùmaro e ’e devastassion de i invasori.
Voendo contarve stavolta de na opera “postuma” a Venessia antica, no posso che trovarla inpastada de aventura e fàssino quasi come nel tenpo “atavico”, parché l’ex canpo de voeo, ciamà a i primi ani del Novesento “Giuseppe Nicelli” in onor de un asso de l’aviassion italiana, che gaveva conbatùo ne ’a prima guera mondiàe, el par na fàvoea moderna tra mar e laguna.
El primo voeo in sto aeroporto el ze stà fato nel 1911 par publicizar el turismo ne l’ìsoea de oro; nel 1912 se gera fato el primo voeo al mondo par ’na persona a pagamento, nel 1913 vegneva batezà ’a prima squarilia de idrovoeanti che ’a se ciamava San Marco, ’a prima in tute ’e nassion.
A l’inissio de ’a prima guera mondiàe l’aviassion italiana ’a vegneva rinforsada co l’arivo de aerei e piloti francesi che gavarìa jutà a diféndar Venessia da i atachi austriaci gnancora convinti de rinunciar a la cità persa ne l’Otosento.
Nel 1918 qua nasse ’a prima “squadriglia” navàe siluranti aerei, al comando de Gabriele D’Annunzio che, co ’a so presensa, ga contribuìo anca a vìvar ’a vita mondana in tuto el Lido, nonostante ’a guera. L’aeroporto el ze stà l’unico in Italia a non èssar mai stà bonbardà in tuto el periodo bèlico.
Nel 1926 ze decoeà el primo voeo de linea in Italia che gaveva come destinassion Vienna. Nel 1928 l’aviator Mario de Bernardi el ga tocà sul cèo del Lido el primato mondiàe de veocità co ’l so aereo. Qualche ano dopo ’a fine de ’a seconda guera mondiàe Yvonne Girardello ’a ze stada ’a prima assistente de voeo che pol vantar ’a storia de ’a aviassion italiana. Gnente mal par un pìcoeo aeroporto co ’e piste in tera batùa che ne i ani Sinquanta però el ga comincià el so declino parché ’e conpagnìe aeree ’e se ga trasferìo prima a Treviso e dopo nel novo aeroporto “Marco Polo” in teraferma.
’A me conossensa de na vita de sto stupendo àngoeo-isola ’a vanta tanti ricordi, a cominciar dal servissio miitar in parte ne ’a Caserma de i Lagunari al Lido, al lavoro nel Convento de San Nicolò e su l’antico ponte venessian costruìo nel 1570 da Malacreda, tuti a un passo da ’e piste. E dopo devo dirve che go sercà de evitar, a eà fine co sucesso, de far i lanci co ’l paracadute al “Nicelli” parché, se se aterava fora pista, cascar in mar no sarìa stà el massimo de ’a saeute.
Un voeo in elicotero par un servissio fotografico sul “costruendo Mose”, e ’a prima volta che go portà Iaia a védar el più beo aeroporto del mondo, el mar de inverno dopo ’e maregiate a sercar cavài e stée marine ne ’a zona vissin l’aeroporto ne ’a spiagia libera, dove che ghe gera el bar-tratorìa da Paolino, i momenti de paze che go trovà ’ndando dentro ’e sae de l’aeroporto che gaveva un pianoforte a coda ne ’a saea principàe, un bar de altri tenpi, e sentivo na atmosfera de i ani Trenta, quando tanti personagi aventurosi i frequentava l’aeroporto che ’a me piaseva e ’a me faseva sentir come de vìvar un tenpo fora dal tenpo, nato su i fasti de ’a me antica Repùblica, ma in qualche maniera fuso e projetà verso el futuro senza strìdar massa co ’l glorioso passà aventuroso de ’a Regina de i Mari.
Non a caso, secondo mi, là ze nato ’e navi voeanti che in qualche maniera me ricorda ’e galèe che solcava i mari, lotando e amando el vento che le portava fin in Oriente. Forse el me amor par Venessia me spinse fin a védar lontan, imaginàndome storie e fantasie che no ’e pol èssar definìe mègio de queo che go scrito par un gran rispeto verso el Rito che Venessia ga portà senpre ne i so sogni.

[torna sopra]