Da Lendinara (RO)

Ricordi ca no' more

Ghe jera na volta un bel apezamento de tera agricola.

Me papà, el primo da sinistra.

Me nona, el pilastro de la fameja.

Ghe jera na volta, intel cuore de Lendinara, un bel apezamento de tera agricola che intorno se trovava storiche e prestigiose costruzion come Palazzo Perolari, el convento de San Marco e l’Ospedale Civile. La jera de propietà de na nobile fameja lendinarese che un bel giorno ghe n'à vendù na parte a uno de Badia Polesine, vegnù a stare a Lendinara, parchè el gaveva trovà lavoro inte una de le fàbriche più grosse de la zona. El ga butà sù na casa, bastanza granda, co' un bel giardin pien de fiori sul davanti e dopo el se ga sposà.
Dal matrimonio co' na dona sinpàtica, bela e anca piena de inzegno, xe nato un fiolo, morto a dó ani de "grupo" (croup). Subito dopo, a poca distanza uno da che l'altro, ne xe rivà altri dó, senpre mas-ci. I sposeti i se dava da fare, zontando al salario de lu i proventi de 'na atività de ostarìa-tratorìa casalinga tegnù in piè da ela, cuoca de prim'ordine. Inte l’orto e intel fruteto, se trovava de tuto e anca el ponaro jera senpre ben fornìo.
Intanto i fioli xe cressù; uno, finìe le scuole de l'òbligo, el ga scominzià a lavorare vendendo i fruti de la tera, chealtro, dopo ’ver studià in seminario, el xe partìo par l'Africa, verzendo le premesse par un doloroso epilogo de la so esistenza.
Al so ritorno, in direzion decisamente contraria a le aspirazion leterarie, el ga invià na atività intel capanon butà sù intel fratenpo dal papà, propio tacà casa.
Vero genio del motore, apassionà de corse in moto inte la "ruota della morte" el verzarà na oficina concessionaria Caterpiller. Più avanti, da la socetà co ’l fradelo, sposà da poco e co’ na fioleta ’pena nata (la seconda la rivarà pareci ani dopo) a nassarà na dita con servizio de riparazion, carozerìa e lavagio màchine.
Intanto – e rivemo a i ani ’60 del 1900 – dopo la conplicazion de na malatìa ciapà in Kenia el finirà prematuramente la so vita, lassando un fioleto de 4 ani e la zóvane mojere incinta, che par un tragico destin la ’ndarà a trovarlo dopo un par de lustri, a 36 ani.
La vita la continua, par forza e par amore, co' tanta tristezza ma anca co' la frenesia e la vivacità de na fameja numerosa fata da persone de età e intaressi difarenti, dove che i pilastri i xe na nona e la so nuora.
Fioli e nevodi i cresse, i se sposa e i va via da casa e tuto el fabricato, formà da casa, apartamento e capanoni, un fìà a la volta el se svoda tuto e un mese fà anca de l'ultima residente.
Sò ben che no' la xe na storia intaressante, soratuto contà cussì, senza i particolari a i quali qualche volta go dà risalto inte le pagine de la nostra bela rivista. Ma inte sto posto e co' ste persone, go vivesto i me primi 24 ani e frequentà fin a un mese fà l'apartamento dove ca stava me mama, che ’desso la ga 98 ani.
La me storia, la me fameja, i spazi iménsi de la me infanzia dove ca go fato esperienze, conossesto tanta zente e sperimentà na libertà inpensàbile a i giorni nostri par un putin, i xe ancora fisicamente soto i me oci anca se trasformà da un straordinario recupero.
Difati – de le volte el caso el se smentisse propio – xe in fase de conclusion un conplesso de ristorazion in stile "old garage" e de acolienza turistica intel quale xe stà mantegnù e valorizà zerte caraterìstiche de le precedenti destinazion e del periodo, grazie al gusto e sensibilità storica de l'inprenditore, apassionà de restauro de màchine d'epoca, che ga concretizà un progeto originale e unico inte la nostra zona.
Anca se conpletamente trasformà, a riesso a védare la vecia casa dove ogni angolo el rivanga storie e emozion mai desmentegà inte un contesto tuto novo, moderno e vintage al stesso tenpo, pulito e confortevole.
Na rinàssita de stabili – la cui stabilità la jera ormai conpromessa - che par varie rason i pareva destinà a cascare a tòchi o a deventare qualcossa de difarente che no' gavarìa fato altretanto bel védare.
Ma soratuto, a i me oci, un tributo a le atività de la me fameja e a i so sacrifici, un esenpio de come riqualificare prima de cementare a tapeto anca dove ca no’ serve.

[torna sopra]