Mi no sò se Sergio el sognasse de devantare un fotografo de quei ricordà in te i libri. Forsi sì, o anca nò. Poco inporta, queo che conta ze la so passion par la fotogafìa e queo che el ga messo ne le so foto.
Prima el ga fotografà el paesagio che lo circonda, come segno de conossensa e de amore par la so Maròstega.
Dopo el ga scominsià a fotografare la zente par poderla conprèndare mèio.
'Na volta paron del mezo che el ga par le man, el ze passà a interpretare. El fa co' la so màchina manuale, come che el ghe tien a sotolineare, queo che fa el pitore co'l penèo e i colori, o el scultore co'l marmo, martelo e scarpelo. Nel quadro e in te la scultura quelo che conta ze come l'ànimo de l'artista entra in comunion co la materia par mostrare quelo che i altri no ga savesto védare. Cussì Sergio, ne la so fotografìa, serca de mostrare quelo che l'ocio uman varda, ma che spesso no sa rancurare.
Più de le me paròe, penso che possa dire le so foto, ne le quali, Sergio, ga fissà el lanpo de 'na ocià o el movimento de un déo. Provè vardare se si d'acordo co mi.