Da Adria (RO)

El Griso

Có te passavi soto chel balcon no te podivi far de manco de vardar in su: un bel gaton, grande grosso e griso el jera lì ponarà, ben piantà su le sate davanti e con quele de drio piegà par sentarse a mo' d'i gati.
Solo ciare volte te lo podevi védare fato sù come un bussolà, parché a lu ghe piaseva vardare in giro, dociando chi e cossa passesse, anca se'l tegneva i so uciti in sfessa, come se ne gh'inportasse de gninte e de gninsun. L'Armida, ormai da ela sola da quando che la guera del '15 la gheva robà el marì e quela del '40 so fiolo, la s'lo tegneva come na creatura: la se faseva dare el bati dal becaro, i scarti dal pessaro, le croste dal formajaro e no la mancava de spartire co lu el so late de la matina. Se pol proprio dire che'l jera un gato bituà ben: no'l montava su la tola, no'l molava sporco in giro pa la casa, no'l se faseva le onge int'i piròi de le careghe e int'i piè de la tola, insuma in casa sua el se conportava proprio come un cristian e no come... na bestia.
Quando che'l andava fora el jera tuto 'n antro discorso. Le so scapadine el le faseva specialmente in genaro, quando i gati va in gataro. El so débole le jera le micine: quele del quartiere ma anche quele più distante, cussì par tuto chel periodo in casa el se faseva védere de ciaro, el deventava magro ingiuto, e de le volte el tornava segnà da qualche barufa co 'n so rivale in amore o par via ne na scarpà, cassà drio da chi che s'jera stufà de i so sgnaolamenti. Alora, passiente, la so parona la s'lo curava, la lo medicava, la lo disinfetava, la lo lavava, la lo nutriva, la lo consolava diséndoghe sù a chi desgrassià ch'i l'eva maltratà, bestie o cristian ch'i fusse stà.
Altri giri el li faseva ogniqueltanto co la bona stagion, lì intornovìa, sensa sluntanarse massa; bastava che l'Armida la se fesse al balcon e la ciamasse: "Piro, Piro, Piro... qua, belo qua...", che lu el rivava, sensa tanto coparse dal córere, ma el rivava.
Na volta, com'ela stà, come n'ela stà, intanto che'l girondava inte'l giardin de la Nora, l'à visto la finestra verta; l'è montà sù e l'è saltà zo in cusina. Su la tola a gh'jera la spesa de la matina; lì in giro ne gh'jera gninsun e lu l'à scuminsià a furfare dentro inte la sporta: gh'jera anca raquanti sièvali; el n'à ganfà uno e... via. Lu montare sul balcon e la Nora tornare in cusina, giusto in tenpo par védarlo scapare col sièvalo in boca: "Desgrassià, ladro, càncaro, s'à te ciapo a te scavesso el filon de la vita!" E inte'l dire l'à ga cassà drio na savata e po st'altra.
Ma lu, intanto, co quatro salti el jera fora da la cusina, fora dal giardin e za sconto int'un cantonsin a sbafarse el so sievaleto. La Nora - ch'l'eva riconossesto el gato - l'è corsa da l'Armida e l'à scuminsià a criare, intanto che st'altra la sercava de scusare la so bestiola. L'è fenì ch'le s'à dito sù un pasto e la Nora, andasendo via sbatendo la porta, la continuava a sigare: "Dighe che'l se prova n'antra volta; a lo castro se'l me càpita sota!" E co sto sfogo l'è tornà in casa sua.
È passà parecio tenpo, un ano o do, e el Griso l'à tentà na seconda paca. A gh'jera tre bele bisteche, pronte par passare in padela, ma quando che'l stava par tentare el colpo e el gheva za el muso a un pelo da la carne, gh'è riva de drio la Nora col cortelasso in man. Svelta come na sita la ga petà un colpo sula coa co tuta la so forsa. Co'n sigo el gato l'à spicà 'n salto svolando diretamente in giardin passando dessora dal belcon e, continuando a sgnaolare, l'è sparì e par du giorni più gninsun l'à visto.
La Nora, intanto, l'à butà inte le scoasse el tochetin de coa ch'jera restà lì su la tola. Quando che l'Armida la s'à visto conparire in casa el so Griso co la coa mocà a gh'è vegnù de tuto: prima la jera squasi drio 'ndare in fastidi, po' l'à scuminsià a cocolare la so bestiola, a la fine, sigando a finestra spalancà, par farse sentire da tuto el vicinato, l'à tacà na litania de maledission continuando co 'n rosario de "spero tanto ch'a ve ciapa..., - tuta roba che ne ghe se 'gura gnanca a 'n can -, par conclùdere co na filastroca de "a ne savì de cossa ch'a son capasse s'a m'intivo a scoprirve..., rivolgèndose a "chi malnati ch'a fa malegrassie a le povre bestiole".
Però el Griso da la Nora el ne gh'è più 'ndà, gnanca in giardin. Ela, el so misfato, no la l'à mai palesà a gninsun.
Mi l'ò savesto da so marì, 'n omo de poche parole.

[torna sopra]

Dal nùmaro de Marso:
Editoriale
Chi xe che ga paura de le done?
Ogni ano a sto tenpo, ghe dedichemo na riflession a la question feminile. Xe senpre massa poco!
de Mario Klein
[torna sopra]

Fotografare par védare
Queo che l'ocio varda e no'l vede. Sergio Sartori, marostegan co' la passion de la fotografìa come conpletamento culturale.
de Milosc Voutcinitch
[torna sopra]

El griso
Da Adria (RO)
de Sergio Bedetti
[torna sopra]