Sport - in veronese

El zugo del balon

Partìe da fogo zugà co la bala de pezza e a piè descalzi, a la Mota...

Me vien da rìdare (o mèio da piànzare) có vedo el zugo del balon ancò... Tornando indrìo de pi de mezo sècolo, me ricordo ancora quando nantri buteleti ghe dàvimo de le gran pezzatà a na bala de pezza, in mezo a la strada (via Castelo). Se tratava de partìe che durava anca un par de ore, fate a piè descalzi su un teren cuerto de sasseti. Magari a ponta! E se zugava anca in vinti par parte.
La bala l'era fata co le calze longhe de lana grossa, calze che gratàvimo a turno e che, ben rodolàe e cusìe, le faséa al caso nostro par un par de ore, prima de finir stramenciàe*.
Pi vanti ghemo zugà co la bala de goma e, tanto pi vanti ancora, col balon de corame; chel che gavéa la boca tegnua serà da un cordon, senpre de corame. Ma alora, ciò, l'era un lusso! A chei tenpi el zugo del balon no 'l faséa sior nessun! Mi conosso de i zugadori del me paese che i è nà a finir in serie A, a Milan, a Torin, a Verona, a Palermo... ma, dopo che i ga tacà le scarpe al ciodo, par mantegner la fameia i ga dovù çercarse un laoro. I era i ani '40.
La stessa squadra del me paese, che l'è stà anca in serie C, la gavéa come dieta base paneti co la bondola e goti de Soave. Par le trasferte, gh'era inveçe pao in brodo. La marmita i la portava diretamente da casa, co la roba za cota e pronta par l'uso dopo na scaldada.
I zugadori i viaiava su un camio e i stava sentà su de le bale de paia... Còmodi, no?
Na olta i ga magnà al ristorante (a Parma) prima de na partìa col Parmavecchia e i s'à cossì tanto inbudà, che in canpo po no i era pi boni de córar, cossì gh'è piovù na carga de gol sul gropon!
A Bolzano, po', se gavéa nevegà prima de la partìa, i nostri zugadori i iutava a spalar el canpo! Alora sì che gh'era passion! Tanta passion!
A la television, te i ani '50, te vedéi solo le partìe de la Nazional e ciare olte... Ancò el balon i te lo serve quasi ogni dì, da quan che te te svei a quan che te vè in leto. E dopoçena te vedi senpre pi spesso zente, comodà su na poltrona, che çiga e urla e ciàciara, ciàciara... e senpre de balon!
Te senti che 'l tal zugadore el vale come 'l Domo de Milan, chel'altro come el Castel de Soave, st'altro pi del Colosseo! Mariane!!! E i àrbitri? Na olta i fis-ciava par un piato de faoline; ancò i ciapa gran ben (soratuto chei de le serie pi alte)... A propòsito! Un me amigo, che l'è stà par tanti ani guardalinie in serie A, el m'à contà che l'ofesa pi granda che 'l ga ricevù, l'è stà quela che un tifoso invelenà ghe ga çigà drio a la fine de na partìa. "Cornuto come un çesto de bogoni! - el ghe ga urlà, co le cane de la gola grosse come i canài de la gronda. Sto amigo el gh'è restà gran mal, soratuto quando el ga çercà de imaginar quanti bogoni pol star mucià rento a un çesto! Tanti! Forsi massa, l'è stà la conclusion!
Insoma par mi, ancò, chel del balon no l'è pi un sport: l'è na botega indò i schei i viaia a vagonà. I miliardi i vien prima de i gol, del spetàcolo, de tuto!
Mi, che son senpre stà inamorà de sto zugo, ve confesso che me sento sgionfo come uno che ga magnà massa budin. Sto sport no 'l me piase pi, no l'è pi mio, no lo capisso pi! Zugadori che i fa i capriçi e che riva e che va; un marcà indò tuti i dà i nùmari (in miliardi!); pressidenti da 'l tacuin senpre verto che i çiga e i sbraita; tifosi che va al stadio, in gran parte, par sfogar tuto el maro che ghe boie rento... Pare propio che 'l balon el sia in più e che serva solo tuto el contorno.
I zugadori no i va pì a bondola e a goti de bianco... Magari! I core a mile a l'ora e i se buta tuti insieme sora al balon o a ci lo ga e te vedi de chele sgalmarà su le cauce e de chele sgunbià, indò càpita, da cavar sù un platanaro da tera!
Mi penso che ormai semo rivà al capolinia... pi in là no se pol nar!
E sa i corsi e i ricorsi stòrici de Vico i ga ancora valor, ormai semo pronti danovo a tornar... a la bala de pezza!
Dio sa, se na s-cianta de "chel che se ghe dise" no 'l ghe farìa ben a sto mondo che ris-cia de s-ciopar... propio come un balon massa gonfio!

[torna sopra]

Dal nùmaro de Majo:
Editoriale
Fermè 'l mondo ché mi desmonto!
Ogni dì salta fora calcossa che te ronpe drento.
No 'l xe on male da oji santi, ma el te desgusta
de Mario Klein
[torna sopra]