Editoriale

Fermè 'l mondo ché mi desmonto!
Ogni dì salta fora calcossa che te ronpe drento.
No 'l xe on male da oji santi, ma el te desgusta

Eco qua un bel esempio del "Voio", te on manifesto publicitario de i ani Venti.

"Maledeto el saère massa", i disèa ai me tenpi! E i ghea rason: i canài de l'informazion i ne roersa 'dosso tante de chele notizie e de chele storie che i ne fa nar 'torno la memoria. Se te vardi on giornale o te vedi on telegiornale, a pare che te vègna in coste na brentana de ruinazi! D'altronde, no se pole vìvare tuta la vita stando sul chi va là e gnanca no xe ben ciamarse fora. E 'lora, anca se te sè che no te ghe ne vieni a cao, te scolti e po' te ghe pensi sù e te ghe ne rajoni sora.
On dì ghe xe... la "mucca pazza", e no se magna pi carne de vaca pa' on bel tòco; nantro dì... se trata de i mas-ci ingrassà co mangimi "cancerogeni"; st'altra volta... ghè l'aqua minerale al cianuro e senò ghe xe l'afta epizootica che la xe drio svodare le stale e far fora le piègore; 'desso xe pericoloso anca el pesse parché el xe "saturo" de diossina; i magnari... tra transgènici, biològici e el colera pèzo a no te sè pi cossa portare casa có te vè fare la spesa!
Po' ghe xe st'altri problemi 'ncora pi gravi, come quei de i putèi neri, vendùi come schiavi; i coerti de le scole che ciapa fogo; i treni 'ncora rivestìi de amianto; i passaporti falsi de i zogadori de calcio estraeuropèi; le onde eletromagnètiche provocà da le antene de Radio Vaticana, ma ghe ne xe anca tante altre che fa manco scàndalo solo parché no le xe a Roma, ma su i Coli Euganei...
Cossa dire po' de i crìmini disumani de sti benedeti tosi sassini che copa so mama e so fradelo, come se i fusse drio scurlare on armelinaro par tor sù quei fati.Robe che ne 'assa senza parole, che ne fa tirare in balo el mistero de la natura umana o el caso...I sarà deventà mati tuto t'on colpo... i gavarà perso la testa...sarà stà la droga...Ne fa anca còmodo cascare da le nùvole, pitosto de amétare che, forse, no xe de i tosi che gavemo da preocuparse, ma de noaltri adulti, de noaltri genitori!
Mi digo na roba: se tuti i giorni, in cìnema, television, giornài ghe femo védare sène de morte, de violenza, de odio, de guera, cossa vuto che ghe voja a fare altretanto se, disgraziatamente, va via la corente che fa funzionare el zarvelo? Ghe demo tuto a sti tosi: schei, màchina, benèssare, libertà... Segno che no ghe basta! Segno che ghe mostremo i diriti e ghe scondemo i doveri, che sarìa stà da presentarghe incartà con na giusta dose de autorità!
Se no se fa cussì, se no se ghe mete i paleti ai pomidoro, le piante le cresse destirà par tera!Senza règole e senza valori, se svilupa solo la teorìa del "vojo".Vojo e basta!
Co tuti i boni esenpi che ghe demo...Basta vardare l'ùltima bufera pa'l tìtolo del spetàcolo de Celentano. Tuta na farsa! "Se mi togliete la mezza zeta non vado in onda! Basta con l'ipocrisia!" xe stà la risposta a l'idea de sostituire la parolassa con na parola manco volgare.El ga rason, poarin: ognuno el se esprime come che 'l xe bon. Xe proprio vero che fa pi bordelo un àlbaro che casca, che non zento àlbari che cresse!
Disì quelo che volì, ma mi qualche volta sarìa tentà de urlare: "Fermè 'l mondo ché mi vojo desmontare!".


[torna sopra]

Dal nùmaro de Majo:
Editoriale
Fermè 'l mondo ché mi desmonto!
Ogni dì salta fora calcossa che te ronpe drento.
No 'l xe on male da oji santi, ma el te desgusta
de Mario Klein
[torna sopra]