| de Wanda Girardi Castellani |
|
Da Verona
'Na sacra, original "Via Crucis"
 |
| Letura
de na "stassion" da parte de Wanda Girardi
Castellani. |
Da quando a la presidensa
del Cenacolo "Berto Barbarani" gh'è andà Piero Sartori,
el Sodalissio l'à ingranà la quarta e l'è partì come 'na
màchina moderna, forte e ben ojà da 'na fantasìa e 'n entusiasmo
che à finì col contagiarne tuti.
 |
| El
Cenacolo di Poesia Dialettale de Verona, quasi al completo. |
Tante i è stà le manifestassioni de sti ùltimi ani: 'na
bela antologìa de le poesìe de i soci, concorsi, rècite
in çità come in provincia e fora, corsi de mètrica, conferense
a alto livel, sensa contar le inissiative par festegiar
el çinquantenario, nel 1998.
L'ùltima bela idea del nostro "pirotènico" Piero l'è stà
quela de realisae, in ocasion de la Pasqua 2001, la "Via
dolorosa" in dialeto veronese. Ciamadi a l'apel, i soci
poeti i à scrito, ci una, ci do e ci parfin tute, le stassioni
de la "Via Crucis", descrivéndole o, mèio, interpretàndole
in versi.Po', 'na Comission esterna, formà da giornalisti,
preti e poeti, l'à selto tra un çentenar de lìriche rivà
in segreteria, le 14 stassioni più 'na quinta par la Resurression,
afidàndoghe i testi a 15 corali che, dopo l'armonisassion
fata dal Maestro Graziano Guandalini, le s'à parecià
a cantarle. La sera del 23 marso, a le 21, la Catedral de
Verona l'era piena de gente, parte za entusiasta e parte
forsi solo curiosa de védar e sentir 'sta novità.
Le corali i era scalionà tuto intorno a la navada central.I
poeti i era inveçe sul lato sinistro de l'altar. Sul lato
destro, un cavaleto dove, via-via che sfilava le stassioni,
vegneva messo el quadro inerente, piturà da la nostra brava
poetessa-pitrice, Maria Teresa Venturi. Nel scominçio
de la prima poesìa scrita dal Presidente Sartori, tuti i
cori... alternàndose in un rugolar de voçi quasi rabiose,
i à sigà: "Libarè Baraba!!".Po', co' la sapiente regìa del
nostro Piero, tuto è andà via lissio come 'na lastra de
marmo: 15 voçi recitanti, un òboe par compagnar le lìriche,
15 quadri e 15 corali a coronar el tuto. Ci g'avéa più stassioni
selte, dita una de le sue, g'à afidà a coleghi e atori le
altre.
 |
| Uno
de i quadri de M. Teresa Venturi. |
In fine el Coro Scaligero dell'Alpe direto dal Maestro
Piero Zamboni l'à eseguì magistralmente, compagnà
da l'òrgano, "Mnogaja Leta" de la liturgìa ortodosso-bizantina.L'aplauso,
longo e forte del pùblico n'à fato capir che quel che avévimo
fato l'avéa incontrà el gusto e, soratuto el rispeto de
i 'spetatori come, daltronde, à dito, in longo e in largo,
i artìcoli entusiasti de "L'Arena", de "Verona
Fedele" e altri giornài de la provincia. Presente l'emitente
"Telepace" che, con ben 8 telecamere l'à ripreso
e mandà in direta la sacra rapresentassion, ripetù, in mondovision,
via Vaticano, a mesodì de sabato 14 april.
 |
| El
coro del Fogolar Furlan de Verona. (foto del cav.
Renzo Benvenuti) |
Le 14 stassioni i è stà scrite: la prima, la tersa e la
dodicesima da Piero Sartori. La seconda, la quarta,
la sesta, la sètima, l'otava e la tredicesima da mi (Wanda).
La dècima e la quatordicésima, da Giovanni Benaglio.
La quinta, da Glauco Pretto. La nona, da Diana
Maimeri. L'undicésima, da Ida Benedetti e la
quindicésima, da Giacinta Dall'Ora.
Le corali: la Polifonica de Caldiero, el Fogolar
furlan, le Tre Torri de Tregnago, la Scola
Cantorum de Castelrotto, la Scola Cantorum de
Azzago, El Castel de Sanguineto, la Scola Cantorum
de S. Vito de Cerea, el Gruppo Voc. di Colognola
ai colli, Le Voci del Baldo, Le Voci dell'Olmo,
el Santa Cecilia de Cadidavid, el Coro Ana
di s.Zeno, La Castellana di Castel d'Azzano.
Par l'ocasion el Cenàcolo l'à dà a le stampe un volumeto
che, come un scrigo pressioso, el sèra oltre a le 15 stassioni
rapresentà in Domo, le altre 15 segnalade, che grassie a
la generosità de la Soc. Cattolica de Assicurassion, tuti
i presenti i g'à 'vu in omagio.
[torna sopra]
|
