Editoriale

Finalmente tuti precisi idèntici?
Se va in porto el progeto de la clonassion umana, come faremo a distìnguare... Bepi da Toni?

Oci precisi, idèntiche le mosse, ma ognuna col so soriso... e el so destin.

No credo che la sia na preocupazion da torse 'desso, ma sicome se sa che, có sona le canpane, in qualche paese xe festa, xe mèjo pensare fin che semo in tenpo. Anca parché se sa che dopo na piova salta senpre fora i roschi; dopo la "sparata" del ginecòlogo Antinori, che ghemo sentìo st'istà, no xe da maravejarse se qualche mato el decide de métare sù na fàbrica de òmani fati in serie!
Robe da mati! Robe de l'altro mondo... de chel mondo che tuti vorìa rivarghe el pi tardi possìbile, anca se de le volte la pegnata de le "sozzure" la xe talmente piena che la va par sora!
No semo in grado de stimare sientìficamente el valore de la "scoperta", ma l'inpression xe quela che l'omo el sia drio cométare un gran pecato de superbia ma de na tale misura da do-vérsane pentire quanto mai. L'omo sta ris-ciando de pèrdare se stesso!
In ocasion de la clonassion animale, gera stà dito e scrito che mai se sarìa rivà a superare i lìmiti del lècito. Ma l'omo xe poco de parola! Figurarse po' davanti a gloria, publicità e schei! No lo ferma pi gnanca el Signore, parché el lo ga fato lìbero, anca de sbaliare. Cussì naltra volta l'inpara!
Anca se in natura esiste za el fenòmeno de la clonassion, quelo de i gemèi "monozigoti", la difarenza la xe enorme: le do creature le vive e le svilupa nel stesso tenpo, ne la clonassion artificiale la moltiplicazion de la persona la ga bisogno de tenpi lunghi. E po', parlémose ciaro: nel nome de la libertà, co sto sistema, se consuma un delito contro la libertà individuale de quelo che viene al mondo, obligàndolo tenicamente a èssare come intende la sienza e non come sta scrito de'l libro del so destin o de la so bona sorte.
Chi xe me me sicura mi che sarò contento e felice de èssare la copia de me popà o de me mama? Da che mondo xe mondo, gavemo senpre sentìo dire: "Mi son mi e ti te si ti!". Assùmarse la responsabilità de rónpare l'equilibrio inteletuale e morale ghe vole un bel corajo! El ris-cio xe pi grando de quelo che pare. Da quelo che se sa, no ghe xe gnancora la sicuressa che l'esperimento de la clonassion umana el possa riussire al cento per cento. Ghè senpre el ris-cio de creare de i mostri. Bravo! Parché ghe ne xe za pochi a sto mondo! Volemo fàrghene de i altri?
I dise che co sti cloni se pole contentare chela copia che no pol 'vere fioi. Un pensiero delicato e generoso. Pecato che la sia na generosità senpre intorbià da l'intaresse. Operazion da fare in clìniche private, a base de euro sora euro!
Ma parché sti benefatori de l'umanità i vol risòlvare un problema creàndoghene de i altri? Co tuta la so sapienza e la so indiscussa vocazion al bene comune, no i vede che oltre a genitori che no ga fioi a ghe xe anca na caterva de fioi che no ga genitori? Me pararìa che sto ben fato a l'umanità el sarìa 'ncora pi grando, co manco ris-ci e con l'orgolio de avere clonà... la speranza!
Qualchedun pensarà che sti ragionamenti i sa de oscurantismo, che i xe contro el progresso e la créssita de la sienza! Pol darsi che i gabia anca reson. Mi no go tanti argomenti sientìfici par contradirli. Go solo la me personale esperienza e so che: Dio perdona senpre, l'omo calche volta, la natura mai!
"Omo avisà, mezo salvà".


[torna sopra]