Da la Bassa Veronese

Quando par la strada ghe jera le fontanele

Mato a mànego.

Arcole a l'è famoso par la batalia de Napoleon e par el so obelisco che la ricorda. A l'è conossù anca par i so spàrasi che i xe 'na bontà e par el canpanile de la cesa che in te 'l 1950 a l'è croà zo (è crollato) senza farghe male a nissun.
Ma par mi desso el va segnalà par 'na roba, che la pare 'na stupidada, ma che invezze a la xe inportante: in te 'l so comune a ghe xe de le fontanele che le pìssola aqua fresca dì e note!

Mato a rua.

El belo l'è che una a la xe propio vizin a do ostarìe e alora quando che la vedo a me vien da rìdare parché a me vien in amente chel proverbio che el dise che davanti a 'na ostarìa anca 'na ponpa dà fastidio!
El me neodeto el vóle che némo in te la piazza de Arcole, che la se ciama piazza Poggi, parché a ghe piase bere co' la boca diretamente dal pissoloto e senò da le manine messe a scudela; el se bagna facie e brazzi e el ride ch'el se gode tuto.
Na olta tuti i paesi i gavéa la so aqua e i so pissatòi, che no bisognava mia nare in zerca de un bar e bere un café anca se no te ghin'è mia voja par nare a fare 'na fischiatina in te 'l so cesso, che desso i ghe dise toilette. Zerto che i orinatoi, che in talian i se ciama anca vespasiani, d'istà i savéa un poca de spuzza, ma almanco la jera in un posto solo e i stradini i ghe butava la creolina e 'na bela secia de aqua e tuto naséa a posto. Desso, specie in cità, ogni canton l'è deventà un cesso, co' i so bei profumi che te vèrze ben i polmoni.
In te i paesi, drio la strada e in te le piazze, a ghe jera l'aqua par tuti quei che no gavéa i pozzi e le ponpe private. Lì a ghe naséa le done o i tosi co' le séce par inpinarle e portarle in te i so seciari. A ghe jera ponpe e mati e i tusi a i se godéa a ponpare o girare la rua par tirar sù l'aqua par le done che intanto a le ciacolava e le se scanbiava 'na bela dose de petegolezzi.

La ponpa.

L'aqua no la naséa mia butà ja come desso, ma la servéa solo par le pìcole necessità de la giornata: lavarse i oci, far da magnare, broare i piati e bere. La bróa de i piati, che no la gavéa mia tanti detersivi, la servéa par inpastare el paston par le galine o par el mas-cio. Par bere a se toléa diretamente l'aqua da la secia tacà ja al fresco del seciaro co' la cazza (mestolo), che la jera de rame e che la ghe daséa un gusto particolare e la la faséa parere pi fresca.
Desso che i fossi o i xe suti, sechi e pieni de sporcarìe o che i ga l'aqua lùrida e i xe regno de rati e che i fiumi e le falde a i xe inquinà che bisogna spèndare tanti schei per torse l'aqua in botilia, ogni olta che me incucio par bere al pissoloto de la fontanela de Arcole a penso che al dì de ancò a stemo ben, tanto mèjo de 'na olta, ma che chel mèjo a stemo pagàndolo ben salà.

[torna sopra]