Tradizion de Nadal

Cantar la Stela

Giazzà come pìtari, nàvimo a scaldar el cor de la zente ne la canpagna indormenzà.

Riva 'n antro Nadale a mi me vegne oia de tornar a cantar la Stela, co le calze longhe de lana grossa color nosèla, sostegnùe da le braghe curte par mezo de un tochetin de àstico e da un boton...
Alora i fossi drio le strade a i era giazzà e la caliverna la vestéa de slusiarini àlbari e erbe mate. E le rete de le corte le parea ricamà col tónbolo.
No gh'era luce par le strade, ma solo 'na luna che paréa simiotar el sole e un mar de stele che faséa slusente chel gran tabaro che l'è 'l cel.
Ne la scarsèla sbusa de le braghe, mi no gavéa gnanca el fazzol par sugarme le candele che colava zo dal naso, raséndome sora al labro par el gran fredo... 'Na strusada co la mànega del giachetin, fato da me zia sarta co 'na so còtola desmessa, e via, drio al tamiso fodrà de carta velina rossa e iluminà da 'na candela. Tamiso tegnù alto co un mànego de scoa...
Senténdone rivar da distante, i cani da paiaro i coréa fora da soto i pòrteghi, baiando come mati ne le case semenà ne la canpagna. Ogni fameja la coréa alora fora sul sélese e i butini, in brazzo a le mame, i gavéa le ganasse paciocone infogonà par essar stà, mezi indormenzà, massa tacà al fogolaro.
Dopo la cantada davanti a la porta de casa, se nava dentro in cusina e alora lassàvimo inciavà fora la note scura e crua e 'l caldo ne sbrissiava dentro, insieme al bicer de vin brulè che se scaldava nel pegnato corgà sora le brase. Po' via, verso la casa de "Schipari" e chela de i Milani, ai Maseti...
L'era 'na festa el canto de la Stela e 'l vegnéa a rónpar el sòno de la canpagna, portando un fià de vita e de novità.
Le nostre sere, alora, le passàvimo de sòlito te 'na discoteca del tuto particolar: la stala, indò se faséa filò.
No gh'era mia tanta selta a l'època; al màssimo se podéa canbiar anbiente, nando da 'na stala a st'altra... Opur se se serava in casa a zugar a tónbola e a l'Oca e alora se se podéa sgionfar de peladèi e ber del bon torbolin. Poco de st'ùltimo parché el gavéa de i efeti colaterài fastiosi, che rivava a tradimento e se uno no l'era svelto de ganbe... adìo! Se podéa anca ber del grinto, un vin de sabia bàcaro e fisso, che incoloriva la toaia oltre che le buele.
Ci no podéa parmétarse sti vini, el beéa de la graspìa - el vin pìcolo - e no gh'era nessun perìcolo che 'l se inbriagasse anca sa 'l ghe ne parava zo 'na secia. 'N'antra festa l'era nare, col cortelin e 'na sporta, a catar sù el mos-cio par el presepio sul prà davanti al Cimitero. Propio prima de Nadal el pizzigoto el castrava senpre i pini, segando le rame pi basse parchè i respirasse mèio. Co ste rame se faséimo l'àlbaro e i grandi de casa i ghe tacava poche bale colorà (che costava de i bei schei e che a noantri no ne interessava propio) e tanti ciuci, che magnàimo un poco e la olta, lassando al so posto el scartozzo a far bela figura.
Eco! Me vegne po' oia de una de chele Messe de quando in ciesa se ghe rivava a piè, magari folando 'na bela inbotida de neve pena cascà, co la sierpa ben ingropà torno a la boca.
Le buanze, nò! De chele no go nessuna nostalgìa, parché me ricordo ancora ancò quanto la me faséa tribular, anca sa me nona la me dava drio el scaldin da portarme a scola.
Le poche brase che gh'era dentro le durava poco e pinpian le deventava çénare, ma le me regalava un tepor che me faséa star ben e che me iutava a vìnzar i diàoli ne le man. E mi sto caldin de oro lo spartéa co 'na buteleta da i bòcoli biondi e da i pometi rossi che, a la ricrazion, verzendo el so scartozzeto de moneghete, la me ne metéa in boca calcheduna co la filastroca: "Boca mia, boca tua, boca del can, am am!".

[torna sopra]