Dal Piovese (PD)

Par mèriti culturài

Intervento del prof. Umberto Marinello, davanti al dr. Comunian.

El Consilio Comunàe de Pontelongo, in seduta straordinaria apositamente convocà, ga conferìo el 21 de otobre eà citadinansa onoraria par mèriti culturài a eà poetessa Elisa Benvegnù Ortu. El xe on avenimento che el sìndaco, Roberto Franco, gheva anunsià uncora a majo, durante eà premiassion de 'l Premio de Poesia "Maggio Pontelongano" che Elisa gestisse da senpre in coeaborassion, prima co 'l "K. F." e co eà "Formica Nera", 'desso co 'l "K. F." e co eà "Pro loco". Xe propio 'sto inpegno che Elisa porta 'vanti da ormai 15 ani che ga mosso el sìndaco par on senso de gratitudine e de riconossensa. Ma ghe xe anca nantra rason: eà poetessa padovana (una de 'e pi conossùe e apressà) xe nata a Ponteongo; a Ponteongo eà ga passà eà so infansia e eà so jovinessa; a Ponteongo che xe uncora tanti so parenti e so amissi, E po' bisogna dirlo: el so paese eà eò ga portà senpre in te 'l so cuore; no eà se ga mai desmentegà de éà. Par tute 'ste rason se poe dire che sìndaco, giunta, consilio comunàe no podeva sèliere personajo pi meritévoe de 'sta onorificensa. Profitando de 'sta inportante ocasion xe stà anca presentà eò ùltima publicassion de eà poetessa padoana: "Il fauno incauto" (edito da Tiozzo, copertina de Bepi Donolato), co introdussion de Mario Klein e Umberto Marinello.

Presentassion con leture de "Il fauno incauto": da sin., M. Klein, Rosanna Perozzo, Vera Slepoj, Elisa Benvegnù e el sìndaco Roberto Franco.

Se trata de otantadò "acrostici" che Elisa ga conposto in onore de i tanti so amissi: on omagio pressioso che pi no se podarìa, anca parché ogni acrostico el xe 'na vera e propia poesìa adatà al personajo ogeto de 'l conponimento. Bisogna propio dire che ghe voe 'na gran sensibiità e 'na gran capacità de penetrare el ànimo umano par poder rivare a 'sti livèi. El libro (el xe el quinto che eà poetessa pùblica) xe stà presentà, dopo eà introdussion de 'l sìndaco, Roberto Franco, da Mario Klein e da Umberto Marinello; ga seguìo leture da 'l testo da parte de Mario Klein e Rosanna Perozzo; ghe xe stà 'e testimonianse de i amissi che ga inparà a conóssarla e a apressarla co tuti i so mèriti; 'e conclusion xe stà a cura de Vera Slepoj, assessore a eà Cultura de eà Provincia de Padoa. Tuta eà manifestassion, e ghe jera on fraco de zente, ga godù de 'l patrocinio de eà Provincia de Padoa e xe stà organisà dal Comune de Ponteongo in coeaborassion co 'l Grupo Artisti de eà Sacisica, del quàe eà poetessa xe menbro de 'l diretivo e referente par Padoa. Inùtie dire che Elisa Benvegnù Ortu jera profondamente comossa.

[torna sopra]