|
SE FOSSE BON...
Se fosse bon de far na poesìa
che parla del Natale dei me ani,
come un ritajo de fotografìa
sensa rimpianti vodi e sensa afani,
vorìa contarve un poco de la neve,
del fredo e dei filò dentro la stala,
de le falòpe bianche su la Pieve
e sul presepio mio, nel sotoscala...
Invesse le parole no vien fora
parché i ricordi me le struca in gola.
Natale xe stà belo solo alora
che lo credevo vero e no na fola:
la vita ancor nel giro de l'aurora,
el cuore gonfio sensa na parola.
Ugo Suman (Padova)
da "Onbre de la sera"
TENPO DE NADALE
Quando che i piopi canbia de colore,
le prime nebie infassa le seraje
e i oseleti pieni de tremore
sbate le piume e sèra le so ale.
'Pena che passa l'oficiar de i morti
e i canpi arè se coerze de maron,
vegne e filari se parecia storti
contro la guera de la freda stajon.
Casca le foje che deventa zale,
canta le verze na canzon da teja,
on vento béco supia te 'l canale
nel fogolaro el fumo se incateja.
Là su la riva el mus'cio de veludo
l'è lì che 'l speta mane che rancura,
l'aqua se giaza te 'l fosso mezo udo,
on 'Ave sona, l'ora se fa scura.
Mi sèro i oci e vedo in sto segnale
ch'è drio rivare el tenpo de Nadale.
Lucia Beltrame Menini (Verona)
MORTE A JERUSALEME
Signore, bon Gesù
semo rente Nadale
ma la note no 'a se s'ciara:
massa le xe le onbre
de cativeria e male.
Vurìa tornare indrìo
e gòdar de la vita
de l'aria inbrosemà
del sóno de la pive
del canto de la Stela...
Ma no xe serto 'l tenpo
de Gloria e de Aleluja.
el mondo intiero pianze
e no ghe xe Comete
che possa solevare i so dolori.
Parfin la Tera Santa
se ga inbronbà
del sangue de so fioli
e ti, Jerusaleme
te ghè visto copare
on Banbinèo Gesù,
te 'o ghè sentìo sigare
tra i brassi de so pare.
Dime, Gesù
chel pianto sensa rechie
al celo xeo rivà?
E parché mai, Ti, 'lora
no te te ghè inrabià?
Lo so:
Ti, te si "AMORE".
Ines Scarparolo (Vicenza)
EPURE GESÙ L'É RIVÀ
Gesù l'é in tla cuna che el pianze.
L'à visto chel pìcolo afgano
scapar da la guera, lontano,
ma gninte chel colpo à fermà,
che lo à dilanià.
Epure, Gesù l'é rivà.
Gesù l'é in tla cuna che el pianze.
In mezo ai deserti africani
l'à visto putini sidià
sercar fra la sabia erba verde,
un'erba ormai sensa prà.
Epure, Gesù l'é rivà.
Gesù l'é in tla cuna che el pianze.
L'à visto i nin˜os baonare,
girar sensa mare né pare
fra fogne e marcà de la droga.
Infansia da infamia segnà.
Epure, Gesù l'é rivà.
El el pianze in tel cuor de Betleme,
ma el pianto el se perde in tel vento:
lé tenpo de guera e tormento.
Nissuno à cunà i so sogni,
nissun de noialtri à scoltà!
Epure, Gesù l'é rivà.
Romano Beltramini (Adria - RO)
NADAL
Nadal...
An Presepio.
An pézˆ co balete
e candelete.
Not Santa piena de color:
nasse l'amor!
Te l'ospedal, bozˆete picade
che pissa do giozete...
le fa bàter al cor.
Se desfarà la neve
tornarà primavera
co tuti i so fior
anca par sto un
che, no avrìe vist sera,
senza quele gioze, rosse,
date co amor.
Luigina Tavi (Belluno)
ON NADÀE DE SCORTA
Go rancurà
le s-ciantise de fogo
che balando so 'l fogolaro grande
ga scaldà
i me Nadài de toseta.
Go rancurà
i lagrimuni de gioia
che me sluseva in te i oci
davanti a chel Presepio de putèi...
Se note scura
vorà scóndarme Nadàe
e vento fredo
smorsarghe el so calore....
Tirarò fora
le me s-ciantise de fogo,
tirarò fora
le làgreme de gioia.
Parché Nadàe
no ga da èssar fredo.
Parché Nadàe
no ga da èssar triste.
Gemma Bellotto
(Cortelà di Vò - PD)
CELI E TERA NOVA
Nel deserto l'ànima arde
e sgrisoloni sgrafa
la carne nuda:
bussoloto vodo a rodolar
drio la carezà del tenpo.
Ma sgiaventa Dio da Oriente
on lanpo a sbregare el mondo
e resta na carcassa de sangue
a brassi verti picà
par redìmere la tera.
Ne la note morta de i tenpi
spira on vento novo
a infiorare el silensio
e ne l'alba zermoja
na gran luse osanando:
on putelo a Betleme
se ga fato Parola.
Le dune se manta
de gili scarlati,
el cielo caressa
azure senbianse,
aqua ciara gorgolia
a l'onbra de teneri ulivi.
I muri spalanca
porte e finestre,
ne la corte fragrante
profuma pan benedìo.
S-ciantisa come stele
i oci de l'orbo,
vestìo de bisso el barbon
erèdita el so canpo de gran,
sluse la perla persa
in fronte a la vèrgine.
In zanocion vinto
aqua viva te sassierà
e sarà la gioja del Santo
a regnare sol mondo.
Antonio Maraschin (Vicenza)
UN CIARO DE NOTE
Col fredo e col gelo
'na luse granda in sielo s'à impissà:
el vintidò Dissembre la luna
voleva essare vardà.
e mi, in pèrgolo, là m'ò incantà,
dimandàndoghe a la luna:
- Nel Domila cossa ti ne portarà?
El sielo pareva un tapéo de veludo
tuto imbrilantà de stele;
la luna in aqua se specieva
e 'l vento spenzeva le ondesiole
tute ingrespà d'arzento
Rivà... chissà? per l'occasion
'na góndola venessiana
gagiarda come na bela dona
norbinosa in aqua la se ninoleva.
Da rente, un bragosso ciosoto
ben peturà, anca quelo iluminà.
A mezanote la luna tacà in alto
come un baloco de l'albero de Nadale,
sempre pi ciaro l'à volesto fare
e al mondo volerghe parlare:
"Le cativerie lassémole stare
che no gh'è niente da imparare.
Démose un baso, strensémose la man,
ch'el mio ciaro impissà del Domila
ne porta un mondo de ben!".
Maria Varagnolo
"Gruppo Poeti Città di Chioggia"
|
'N'ARFIAR DE AMORE
Filtra la luce,
el vento no move
telari de sogni.
Chiete de astri.
El cielo xe senpre
più solo.
Cantare a un passà,
a na luse.
Spassi dentro
a vodi momenti.
Slongare na man
fra le vossi de na eco.
Traversare bariere
scrite su pargamene rare:
'n'arfiar de amore
pa no spacare l'ànema.
Maria Penello (Vicenza)
LA FOLA DE NADÀE
Ghe gera na volta lontan, in Oriente,
on omo e na dona in viagio, co 'n musso
da montarghe a cavalo, co robe e pignate;
i 'ndava per via de na lege, forse de tasse.
Rivà on tòco avanti, che ormai gera note:
"Giuseppe, ghe semo! Me ciapa i dolori".
Dise la dona strenzendo la boca.
"O mariavèrgine! - fa l'omo - a ste ore?
Cerchemo, presto, on albergo de corsa".
"Raus! Fora de qua - ziga el paron,
co la scufia par storto - Raus!
I poareti, qua, no ghe posto".
Gera na note tranquila, senza na bava;
in cima del cielo la lupa pi ciara
in mezo a le stele la fazeva l'oceto.
Tuto silensio. Ogni tanto lontan
la vose d'on can rispondeva ai so sbagi.
"Varda là in fondo, on ciareto - dise Maria -
pi belo e pi ciaro de tute le stele".
El musso, de corsa, sùbito drio.
Ghe gera na grota, refugio de bestie,
paja, on bo' che dormiva e la grupia.
Verzendo i oci co' fa do fanài,
el bo', tiràndose sùbito in là,
ghe lassa, caldo, el so posto a Maria.
Do zighi, do urli, xe nato el putin.
"Che belo! Negreto, coi rizi, dàmelo on fià.
Che belo, i oceti, 'e manine, i brazeti,
pare che 'l rida". E inveze el pianzeva.
Intanto de fora na gran confusion:
sora la grota, co trombe e subiòi,
na fila de àngeli sonava e cantava.
Da i monti, òmeni e done vegneva de corsa,
vardando par aria con gran maravegia.
Ma presto xe tuto sparìo, àngeli e trombe,
come na nùvola bianca dal vento strassà,
e, da lontan, paréa de sentire:
"Gloria inexcelsis".
Drento, el putin tetava le tete
e so mama dormiva co' fa na madona.
Giovanni Zanninello
(Cavarzere - VE)
XE TRADISSION
Stee lucenti
fili d'argento, bae dorate
fiochi de bonbaso,
angioéti che sbìngoea
bambinèi in miniatura
àlbari co' baete che se stua
e baete che s'inpissa.
Xente che core,
dentro e fora da 'e boteghe,
chi va a comprare
chi soeo a vardare.
Tuta 'na pressa
tuto ón ciacoeare.
Ma queo che me fa rabia
xe tuto el basare:
basi de qua, basi de là
basi al vecio e anca al putin,
sorisi tirà,
pa 'l sforso de mentire.
Tuti femo finta
de voerse tanto ben
parché xe Nadàe, xe tradission,
tradission de basi, sorisi e regài.
Tute robe che passà el dì
te assa svodo, te assa jassà
come la sisara
so i àlbari e so 'l prà.
Dài, scaldémose on poco,
ciapémose par man
strensémose forte,
e sensa parlare
sensa basarse
vardémose in viso
co' on poca de bontà.
Gianna Rovea (Baone - PD)
EL NADALE
Anca sto ano xe arivà Nadale.
Se trovemo arente al camineto
par pensare al putelo speciale
nato ne la stala, cussì poareto.
Caro, santo e particolare dono!
Me mama, ne la note universale,
lassando la vita nel calmo sono
la ga visto la luce celestiale.
Parlemo sotovosse, ogni tanto;
no ronpemo el grande tasère
del chieto momento de incanto:
i oci lustri se dise parole vère.
Canta aleluia l'angioleto
sora la capana del Bambin Gesù;
noaltri sognemo un pocheto
insieme a quei che no ghe xe più.
Gabriella Ferroni (Padova)
ORAZION
Dame na man, Signore, sto Nadale
senò me nego drento ai me pensieri,
fame calcossa che me passa el male,
dame le robe che t'ò dito ieri:
on'onbra calda che me staga rente,
on sogno che me dura on ano intiero,
na man che strenza, on viso soridente,
anca se in core sò che no 'l xe vero.
Dame el corajo de zercarte 'ncora
proprio là indove che no vien mai sera,
porta on saludo a chi xe là de sora
e te fa festa pi de mi qua in tera.
Inpréstame el to sole almanco on'ora
parché sta me orazion no sia de piera.
Mario Klein (Padova)
GESÙ, PUTÈO DE GUERA
Urli! Sighi! I se spaca i aeroplani,
Eva la partorisse in mezo a na sbrancà de feri infogài.
e la cuna?
Sbonbardamento de piere
corpi sbregài sangue sparpajà,
zela sta qua la grepia?
E el bo e To mama?
Co' la cometa che se stua dentro on tón
sta note la ze na note proprio sensa strade.
Gesù, anca mi te go imbrojà prima che te nasessi
e me sbrusa la gola védarte ligà come mi
co' tuti chei àngioli spaventài
che i te gira intorno.
Go visto volare 'e àneme
quando che te vegnevi zo so chel groejo pien de fogo.
(Che to Pare te gabia sbandonà 'pena nato?).
Putèo de guera anca Ti
co' ste man picenine e rosegàe de spavento
te vedo córare descalso, vestìo de gnente
co el vento che te sgionfa de fame.
(Sito in pensiero anca Ti come mi?).
Ze qua i pastori co' la cometa so le spale
i ze tuti bravi òmini, proprio na coa de santi
par rimétare sù el presepio.
Sbrancolavo in mezo a na fumara, gero desperà...
Adesso me ze ciaro el pan che va ben par mi.
Luigina Bigon (Padova)
XE ZA NADÀE
Se Nadàe
luci coeori vetrine preparàe
tuti core a comprar regài
e a pensare no i se ferma mai.
Sto tempo de mondanità e de lusso
el te fa vegner in mente on gran presepe:
chi fa 'a Madona, chi fa S. Giuseppe
e ti te toca sempre fare el musso.
A semo tuti spasimài
impegni, òblighi, usanse
a forsa de laorar te vien i cai
e sempre coa paura de 'e finanse.
El tempo el passa cossì in pressa
che gnanca no te poi girarte indrìo
bisogna metarghe na pessa
senò finimo tuti in man de Dio.
Ma porca chea miseria che schifessa:
te cori tuto el iorno come on mato,
te manca anca el tempo par 'ndar messa
che quà i te pesta 'a coa come a on gato.
Ma chi ne a fa far
gnanca el tempo par magnar
te scampi via ingossà come on pioto
ogni tre dì a te vien sù el cagoto.
A te ghè l'ansia, 'a pression alta, el baticuore
el coesterolo, i trigliceridi incassài
ma se continua con furore.
Non importa! No moeare mai.
Gianilo Casagrande
(Levada di Piombino Dese - PD)
|
