Editoriale

... e dopo tanta guera... sia pace in tera!
In vint'ani de vita del nostro giornale, mai come 'desso xe stà cussì necessario invocare e prométarse la pace

Al de là del porton de on ano che more, ne speta la luce de l'ano che viene. (foto G. Viel)

"Pitosto che gnente, xe mèjo pitosto", diséa on vecio proverbio. Anca se no saremo boni de mantegnere le promesse, dato che la scadenza de i boni propòsiti la xe anuale, xe ben che ghe ne femo, anca pi de una! Sarà senpre mèjo che far finta de gnente. E po', guai sercar de inbrojare chela voseta che ne sbisìgola drento e che có te si svejo la xe senpre par sora de i pensieri come l'ojo te l'aqua.
La cossienza la parla. E come che la parla! La salta fora anca se tentemo de no scoltarla. Qualche volta la ne va drita: 'assa che la diga! La ignoremo e tuto finisse lì. Altre volte la va a finire male: on bordelo de la malora ne tapa le rece e no la sentimo pi. Cussì rivemo al disastro, a la disperazion, a la guera.
La xe proprio la cossienza che ne parla, 'desso che tachemo co l'ano novo. I conti de quelo 'pena finìo i xe in rosso, rosso-sangue, un rosso che anca se no lo gavemo so la porta de casa, a lo ghemo so la porta de i oci. Da on fià de tenpo l'umanità la xe precipità t'on bàratro spaventoso. Maipì gavarìssimo pensà de catarse so na situazion del gènere. A xe vint'ani che anca noaltri, so le pàgine de sto nostro giornale a conpagnemo co la coa de l'ocio, e con qualche considerazion, el passo lento de l'umanità che camina, che varda 'vanti, distante, oltre i confini de tuto: de la tera, del cielo, del tenpo, de la vita...
L'umanità la ga senpre vudo "un sogno folle", on desiderio "innato" de varcare i confini del zercio che la circonda e, ogni volta che la esàgera, patatràc: salta fora on crepo, se ronpe la storia, se intorbia l'aqua, se guasta la pace. E taca el viajo tenebroso de le ore scure, de i giorni de caligo, de i mési de soferenza, sdegno e infamia.
Ma ghe xe... la cossienza che invita, che sprona, che ciama a racolta i pensieri dal fondo del cuore, che dise de fare on bu-gnelo de tute le robe ne-fande che 'ncora ne infanga, conpresa la scarogna pi nera.
Soratuto no bisogna fermarse, bisogna crédare al sole anca quando no'l splende, bisogna crédare al riscato de la pace, anca quando l'orore de la guera el pare drio cancelarne ogni speranza.
Credo che no giova a nissun né agitarse, né disperarse. Xe pi ùtile crédare che ogni giorno el vale on ano e ogni ano el xe curto come on giorno. E 'lora disémose: "bongiorno-bonano" e decidemo de crédare che de là del porton de on ano che finisse, ne speta la luce de l'ano che viene.
Quatro Ciàcoe ga za in mente de festegiare i vint'ani e anca par questo el se àugura de vìvare insieme ai so letori, ma insieme al mondo intiero, un ano de pace.
Dunque, dopo tanta guera... sia pace in tera!

[torna sopra]