Robe de fameja (in basso veronese)

L'anel de noze

La Ida e Bepi, nel 1948, co l'anel... e quatro fioi: (da destra) Lucia, Luisa, Santino e Giani.

I s'à sposà de agosto, de matina bonora, a la messa de le çinque, parché dopo i sarìa andà in viaio de noze a Trento, a pregar su la tonba del pare de ela.
Ondes'ani de difarenza (la sposa piassè zóena del sposo) iera on po' massa, soratuto par chei tenpi. Po', la sposa no l'era gnanca del posto. L'era vegnùa da fora, da Cadidài, vizin a Verona, par farghe da "perpetua" con so mama Mariana e so sorela 'Gusta al zio prete, deventà novo paroco del paese. Insoma la Ida "del prete", quando la s'à maridà con Bepi "pestagalete" la gavéa 39 ani e so marì 28.
"Te piàselo? Tótelo!" el gavéa dito so zio, senza tanti discorsi, dàndoghe la so benedizion. Lu l'avéa capìo sùbito che so neoda la sposava on bravo fiol. In più l'era anca organista.
A dir la verità, par la Ida l'era el secondo organista, parché el primo, dopo diese ani che 'l discoréa con ela, el l'avéa inpiantà. La clàssica delusion d'amor, cònplice nantro prete, mons. Gonzato, che ogni tanto el ghe diséa a Gino, incerto se farse prete o nò: "Ela che giacheta che te te meti!". Cussì Gino, dopo averghe pensà diese ani, "l'ha congedata", come à scrito pi vanti me fradel Giani in te on tema a scola su "La mamma" con grande scandalo de la maestra.

La Ida "del prete" e Bepi "pestagalete" 'pena sposè.

Dovì saver che Gino Compri l'era za ragionier, ma ghe piaséa de più la mùsica e i sui no i voléa mia, cussì, co l'aiuto de la Ida che ghe pagava le lezioni de piano, (ela la faséa la ricamatrice) el s'à diplomà brilantemente in pianoforte e òrgano al Conservatorio de Bolzano.
A propòsito, con tuta sta mùsica, mi dovéa ciamarme Cecilia e inveze i m'à ciamà Lucia, come me nona Lussia.
Donca, podì ben capire cossa podéa significare par me mama chela fede de oro al déo, tanto sospirà, anca se l'era sotila come on fil de reve.
Dopo on ano dal matrimonio son nata mi a la maternità de Verona (alora, a quarant'ani, na dona l'era considerà puèrpera tardiva, 'desso inveze l'è deventà cussì de moda che la gente no la ghe bada gnanca ) e nel giro de pochi ani è nato altri tri fioi, uno tacà a l'altro. E pensare che i diséa che no la podéa avérghene, apunto data l'età.
Quei ani Quaranta, par Bepi e la Ida, iè passè in miseria, anca se 'bastanza in pressia. Zerto che me mama no la podéa stufarse con quatro buteleti da arlevar, fare i conti de le limòsine e altri laori con so zio prete, in parochia e laorar in te l'orto. L'è stà cussì che, on bruto giorno che ela l'era indrìo a vangar la tera, ghè sbrissià via da le man el so anel da sposa. Maginarse quanto l'è restà mal. L'à rumà la tera par giorni e giorni, la l'à çercà dapartuto, l'à fato dir i sequeri a Sant'Antonio, ma no ghè stà gnente da fare.
Finalmente, dopo 8 ani, sul piassè belo che la savéa rassegnà, eco che, zapando l'orto da novo, l'à catà la so vera.
Purtropo tute le storie le ga na fine, anca quela umana de la Ida, a novantaçinque ani, çinque ani fa. Quando la s'à incorto che l'era la so ora, la n'à dito con gran fadiga: "Pange, pange!" che voléa dir: "Stè sereni, no stè a piànzar": ultimo segno de la so generosità.
L'ò rivista el giorno adrìo, prima del funerale. Durante la veja, con le làgreme ai oci, ò carezà la so facia de cera, le so man intrezè con la corona del rosario. L'ò guardà ben par l'ùltima òlta e po' ghea pensà de torme el so anel par ricordo. No ve digo el gran dispiasér che ò provà quando me son incorta che no la gavéa più al déo el so anel da sposa: qualchedun ghe l'avéa za robà.

[torna sopra]