Arte Piovese

Omagio a Stefano Baschierato

El scultore Stefano Baschierato con l'òpera "La scarpina ritrovata", bronzo. (foto da catàeogo).

On gran evento, eà mostra retrospetiva de Stefano Baschierato, el famoso scultore de Sant'Angelo de Piove de Saco, morto poco più de do ani fa. Eà mostra, intitoeà "Nella scultura la vita", xe stà promossa da 'l Grupo Artisti de eà Sacisica de Piove de Saco e eà xe stà organisà da 'l Assessorato a eà Cultura - Setore Cultura de 'l Comune de Padoa co eà coeaborassion de i Comuni de Sant'Angelo de Piove de S. e de Piove de Saco.

La gallina padovana, pìcoeo bronzo, donà a Giovanni Paolo II el 20 novenbre 1996.

Eà mostra se articoea tra el Oratorio de San Roco (bronzeti e disegni), via Santa Lucia e piassa Garibaldi (sculture grande in bronzo), Gaerìa "La Rinascente" (bronzeti, sculture in legno, documenti e fotografìe de Toni Baruffaldi, Mauro D'Agnolo e Luciano Schiavon). 'Na mostra conpleta, che riesse a dare 'e vere dimension de 'sto scultore che, anca se 'l ga vu on bon sucesso in vita e de 'e gran sodisfassion, no se poe çerto dire che 'l sia stà riconossù par coéo che 'l jera in realtà. Eà mostra xe stà inaugurà doménega 3 marso in San Roco da'l assessore a eà Cultura de Padoa, Giuliano Pisani, da 'l sìndaco de Sant'Angelo, Lino Gabriele Pressato; da 'l direttore de 'l Settore Cultura de 'l Comune di Padoa, Gian Franco Martinoni, da i rapresentanti de 'l Grupo Artisti de eà Sacisica, Umberto Marinello e Giuseppe Lotto, e da 'l crìtico Giorgio Segato. A "La Rinascente", sabo 9 marso, da 'l assessore Giuliano Pisani, da 'l crìtico Gianluigi Peretti, da 'l Direttore de eà Rinascente de Padoa, sig.ra Milan, da i rapresentanti de 'l Grupo Artisti de eà Sacisica. On gran pùblico ga partissipà a 'e inaugurassion, tanta zente che ga voésto rèndarghe omagio a on omo che xe stà sensa esagerassion uno de i artisti vèneti pi significativi de 'l sècoeo passà.

Adamo ed Eva, bronzo, 1998.

Xe comovente védare come i padovani se ferma in via Santa Lucia e in piassa Garibaldi a vardare, a amirare 'e sculture de Baschierato. Pare che 'sta zente stabiissa on diàeogo co 'sti bronzi grandi e medi. E xe propio coéo che Baschierato ga senpre domandà a 'e so òpare: che 'e sia vissine a eà zente, che 'e stabiissa co chi che 'e varda on raporto, che eà zente 'e senta come espression sua, quasi come on so spècio. So Baschierato el Comitato Sientifico che ga preparà eà mostra ga costruìo on catàeogo, curà da Giorgio Segato e co 'e fotografìe de Toni Baruffaldi e de Luciano Schiavon, che xe eà prima òpara conpleta so 'sto scultore, 'na òpara che servirà de sicuro da base fondamentàe par i studi e par 'e ricerche che pi 'vanti, de çerto, vegnarà fati so 'sto artista. Eà mostra resta 'verta fin a 'l 28 aprìe.

Inaugurassion de eà mostra: da sin., Gian Franco Martinoni, Giuseppe Lotto, Umberto Marinello, Giuliano Pisani, dedrìo Giorgio Segato, Walter Baschierato, L. Gabriele Pressato. (foto LuPe)

[torna sopra]