Da Gregnan (Rovigo)

'Na storia de sècoli

Zente in piassa a Gregnan davanti al Pavajon, el dì de l'estrassion de 'e "Comune".

Cari conpaesani, no gavarì l'entusiasmo de 'na 'olta, ma zerti no se ga desmentegà de 'na usansa tradissionàe ca riva, ogni sincoe ani a Gregnan! La storia però la dura da sècoi e precisamente dal 1426, có el Monastero de Santa Maria de Pomposa ga fato eà prima investitura co la donassion de 'na Vale da pesca, a favore di i òmani de 'e fameje originari, rente ghe jera de 'a tera ca no produséa gnente. El jera come on livèo (contrato) continuo, pa 'na tera poco fèrtie ('na spezie de laoro a rotassion da rinovare, ogni 29 ani). Da 'lora, sensa interussion fin 'desso, l'Aministrassion de i Beni Originari la ga provedù, ogni sincoe ani puntuàe, a fare l'estrassion de 'e "Comune", senpre el primo dì de Primavera. 'E "Comune" 'e xe l'insieme de 120 ètari de tera, 'na estension longo eà strada che, da Gregnan, la va in diression de Rovigo. Prima de fare l'estrassion però, el Massaro el passa pa 'e fameje de i Originari pa 'l censimento. Ga dirito i mas-ci ca ga conpìo sedesani entro el 29 setenbre de l'ano de estrassion de 'e "Comune" e che fassa parte de 'e fameje Originari, fin dal tenpo de 'a bonìfica. Inte 'e prime spartission 'e fameje 'e jera 25, po' 21 e 'desso 19, causa de fameje de Originari estinte e probàbili Originari estinti. Pa conossensa e pa curiosità go pensà de farve savere i cognomi de 'e fameje di i Originari restà, che 'e xe: Bedendo, Bellinello, Berti, Berto, Chiarato, Machion, Menan, Milan, Osti, Previanello, Previato, Rizzieri, Rossi, Schiesaro, Surian, Trevisan, Zanini, Zanirato, Zennaro, co i so reativi soranomi parché, spezie inte 'e fameje numerose el soranome el xe necessario pa distìngoarse. El Massaro, 'ndando inte 'e fameje, da l'elenco di i Originari, el scancèa el nome di i Originari morti, no 'l tien conto de quii ca xe in preson, che i perde 'na "Comuna" e de quii ca xe 'ndà stare inte nantro paese parché, on vecio Statuto (redà int'el 1642) el dise che ga dirito a la "Comuna" i Originari, mas-ci ca staga a Gregnan: "Loco et foco". Có i ritorna a Gregnan, inte 'a nova estrassion i vien inserìi. El nùmaro di i Originari presenti inte l'ano de estrassion el xe el nùmaro de 'e teste e, a ogni testa ghe speta 'na "Comuna" che la xe 'na misura de tera za deventà produtiva a forza de laorarla. Int 'i primi tenpi i laorava co la vanga, po' co l'aratro e via-via i ga laorà senpre regoearmente, 'desso la produse calcossa. Tuta la tera la vien spartìa fra el nùmaro de 'e teste (tante teste, tante "Comune"). Bisogna pensare che, sècoi fa, tuta la zona la jera 'na palude. La zente la viveva inte de 'e pòvare capane e i frati Benedetini del Monastero de Pomposa, có i ga fato dono de sta Vale de 'a pesca, i li ga assistìi e guidà int 'el laoro de bonìfica ch 'el jera duro e fadigoso e in prinzipio i gavéa poca sodisfassion. I Originari po' i ga dovùo lotare e conbàtare co de 'a zente straniera, emigrà e vegnùa a Gregnan in diversi periodi ma i Gregnanati co forza e voeontà i xe riussìi a conservare la tera e rèndarla fèrtie laorando insieme e, da generassion in generassion i xe riussìi a conservarla pa i so dissendenti. Speren che, sta tradission la continua e che i zuvani no i se desmentega de i sacrifizi ca ga fato i so antenati e i se ricorda che, in tenpo de carestìa, sta tera la ghe xe stà ùtie pa no morire de fame e de peagra.
Ancuò a Gregnan ghe xe 'na gran festa, se festegia San Benedeto e i Aministratori, de i Beni Originari, i xe drento el Pavajon, i controea l'estrassion di i bòssoi da l'urna pa savere indove a 'e fameje di i Originari ghe xe tocà 'e "Comune" e in che Braia (la tera la xe divisa in Braie e da 'e Braie i capisse s 'a ghe xe tocà inte de 'a tera fèrtie o no). Quii ca no pòe coltivare la so "Comuna" i la cede, pa sincoe ani, a altri co pi possibiità, a on prezo acordà par tenpo. Inte l'ùltima estrassion i ghèa conbinà pa siezentomìa franchi. Intanto tornovìa el Pavajon e in piassa ghe xe on mucio de zente vegnùa da altri paisi e i ragaziti i zoga spensierà.

[torna sopra]