Da Verona

Par un biron in più
A zontarghe un biron a la scala, sìnbolo de i Scaligeri, l'è stà quel megalomane de Cansignorio, malà del cosideto "mal de la piera"

L'arca de Cangrande 1°

La scala, larga de soto e streta de sora, che sinbolegia la signoria Scaligera che à governà Verona dal 1277 al 1387, la g'à 'vudo in prinçipio quatro birói. E quatro la ghe n'à 'vu anca soto quel Can-Francesco, deto par la so magnificenza, generosità e braura militare, "Cangrande", capo de la Lega Ghibelina e, par el voler de l'imperador Enrico VII, vicario imperial, che ai so tenpi l'à streto in un ideal "bouquet" co' la me Verona anca diverse cità de la Marca Trevisana, de la Lombardia, de l'Emilia e de la Toscana, tanto che se no 'l fusse morto a bonora l'avarìa de çerto realisà el sogno, condiviso co' l'amigo Dante Alighieri, de unificar soto el so dominio tuto el resto de la penìsola.
Pensè che se 'l progeto el fusse andà in porto, inveçe de quela toscana la lengua nassional la sarìa deventà quela vèneta!

L'arca de Mastino 2°

Beh, dunque, a zontarghe a la scala un biron l'è stà Cansignorio che l'èra andà al potere, insieme al fradel quindicene Paolo Alboino, dopo aver 'sassinà, el 14 dicembre 1359, in Sant'Eufemia, atiràndolo fora da Castelvecio co 'n trepo, el vintissetene fradel Cangrande 28.
De 'sto bruto episodio, par quei tenpi paraltro miga tanto raro, n'è rivà anca de i versi, scriti in latin e in volgare e a rapresentar mèio de tuti el sentimento general l'è stà Tommasuccio da Foligno, in 'na "professia":
"De Cani sonno descisci / l'uno e l'altro fratello; / de Chaim et d'Abello / surgierà lo malo seme. / Ad Verona se viene / sempre di tal dura carne; / chomo de' soportarne / la divina justitia?"
Cansignorio, come emo dito, el g'avéa anca el mal de la piera, overo la costosa manìa de far-sù palassi, tóri, porte, lòge, strade, piasse e colonati. Tra l'altro l'à anca provedù a la costrussion del so mausolèo, più sior e inponente de quel de Mastino 28, afidàndoghene l'esecussion ai maestri Campionesi e a Bonino da Campione che co' le so maestranse el g'à laorà drio dies'ani.

L'arca de Cansignorio

Cansignorio, dunque, forsi par vanità, par distìnguarse da i altri Scaligeri che l'avéa precedù, o, più che altro, par dimostrar che soto el so governo Verona l'èra destinà a andar più in alto, (ad summa per gradus) l'à vossù alsar la scala zontàndoghe un quinto biron. Ma a dir la verità le robe no' i è andà par el verso che 'l sperava lu! No' l'è però che la sia stà del tuto sua la colpa de la fine de la signoria, sucessa tredes'ani dopo la so morte, quando che i à parà-via so fiol Antonio, a òpara de i Visconti.
A testimoniar el cambiamento sinbòlico resta, par quanto riguarda la scala prima maniera, i du cani coronadi ai du fianchi de l'urna de Cangrande, l'inferiada de la porta d'ingresso a le arche e quela a quatro lati intorno al monumento de Mastino 28. Gh'è pura i stemi piturà ai lati de l'abside ne la cesa de sant'Anastasia e un'urna nel chiostro de san Zen.
Çinque i è inveçe i birói, su le campane come quela de la tore del Gardèl, òpara del Maestro Jacopo (1370), 'desso al musèo de Castelvecio e su le maie del "merleto" esagonal che gira intorno a l'arca de Cansignorio. El quinto scalin l'è stà adotà anca da le nostre istitussioni provinciali.

Le campane del Gardèl in Castelvecio. (foto W. Girardi Castellani)

Gh'è da dir che i sucessori de l'ùltimo grande "Signore" de Verona che forse l'avarìa pensà che i sarìa stà boni de alsar ancora de più la scala, fedeli al moto, "nec descendere, nec morari" inveçe che in sù... i è andà definitivamente in zo.

[torna sopra]