|
Editoriale
Chi xe che ga paura del crocifisso?
Come on fungo de stajon, eco che taca la frinfrogna:
via da le scole el crocifisso!
Parché? Ghe xe da vergognarse èssare cristiani?
 |
| Anca la crose al colo de na statua la podarìa dare disturbo... |
Ogni volta che scomizia la scola, salta fora dal coro na voce solista che protesta parché no vien tirà via el crocifisso da le aule e da i ufici pùblici. E, naturalmente, ogni volta vien fora na cagnara, co discussion, interpelanze parlamentari...: sto poro Cristo ghe dà fastidio a la vista de qualchedun... anca da morto! No se capisse quala sia la paura che 'l pole fare a chi ga nantra credenza o nantra religion! Na persona normale, se na roba ghe dà disturbo, el taja l'àngolo e el va par nantra parte. Gnente da fare: se na roba no la me va a mi, no la ga da narghe ben gnanca ai altri! La me pare la storia del cagneto. Ghio fato caso có se incontra tri-quatro cani? El pi carogna, el pi tachente l'è senpre el pi schiciarelo, el pi picinin, on furegheti che bacaja pi d'on grando.
La minoranza o la contrarianza la ga el dirito de protestare, ma non de inpore la so volontà a tuti i altri. Eco, me pare che nel caso del crocifisso, la minoranza - de casa nostra o vegnùa da fora - la sia drio fare come chel cagneto incarognìo. Come se fa pretèndare che st'altri, e la xe la magioranza, no i sia lìberi de ricordare, anca con segni esteriori, la propia orìgine religiosa, la propia storia, la cultura, la propia identità anca cristiana, basà proprio su la toleranza. Se, nel nome de la pluralità de pensiero, oncò xe fora posto on crocifisso drento te na stanza dove se studia o se lavora, doman, nel nome del pluralismo e de la laicità, deventarà scòmodi anca i capitèi, parché i xe colocà te na posizion, la strada, dove passa tuti, anca chi no xe cristian o catòlico, e quindi sarà ben...
Co sto ragionamento, alora sarìa come dire che, sicome mi no go la patente par guidare l'automòbile, o no go i schei par conpràrmela, o go selto de nare a piè, vojo che i tira via la strissia bianca che delìmita la mezerìa o che segnala el zejo de la strada! Se la strada, che la xe de tuti, xe giusto che la porta i segni vàlidi par modi diversi de percórarla, anca on uficio pùblico el ga el dirito de mostrare i segni de on percorso stòrico e culturale che, par la magioranza, pole anca coincìdare co on sìnbolo de fede! L'ànima, el pensiero, la testa no se pol separarla dal resto del corpo: né a scola, né in uficio!
I "contrari" i se preòcupa del disagio psicologico che pole procurare el crocifisso ai putini o ai zóvani che viene da altre culture. Parché no i se preòcupa de certe publicità, certe trasmission televisive, certe mode, certi discorsi senza cao, certi raduni che a tuto i serve fora che a la formazion de l'individuo?
Prima semo partìi co la question de l'ora de religion, 'desso disturba la crose tacà 'l muro, doman disturbarà quela tacà la cadenina del colo e, pi 'vanti, darà fastidio anca le crose sora le tonbe ne i simiteri. Su i pacheti de sigarete ghè scrito "nuoce seriamente alla salute"; on crocifisso vole ricordare, a chi vole ricordare, che la vita la xe na crose da par ela, e che so la crose no se ga da farghe métare pi nissun! Se se vive fasendo el ben, no 'l farà mai paura on crocifisso. E gnanca el sìnbolo de naltra religion! No credo che ghe voja barufe, discussion polìtiche o disegni de lege: ga da bastare la lege de le nostre raise!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Novenbre:
Editoriale
Chi xe che ga paura del crocifisso?
Come on fungo de stajon, eco che taca la frinfrogna: via da le scole el crocifisso!
Parché? Ghe xe da vergognarse èssare cristiani?
de Mario Klein
Visti da vissin
Emma Borsetto Pizzolato
Trovar la vena par scrìvare ne la terza età e comunicare i propri ricordi
de Milosc Voutcinitch
Da Verona
Par un biron in più
A zontarghe un biron a la scala, sìnbolo de i Scaligeri, l'è stà quel megalomane de Cansignorio, malà del cosideto "mal de la piera"
de Wanda Girardi Castellani
|
