|
On personagio stranbo
Domenico Mandelli, el "Canpanino"
 |
| La Contrà del Sale ('desso via Oberdan) a Padova. |
Domenico Mandelli, on spessiale vissudo a Padova tra 'a fine del XVI e la prima metà del XVII sècolo, el ga vudo na vita aventurosa che no sarìa da crédare, se no la me fusse stà contà dal dotor Giuseppe Maggioni, benemèrito stòrico de la "farmacìa" padovana.
Sto siorato, ben vossudo e rispetà, gaveva in sità do spessierìe, una dita "A la Fortuna", tegnùa da altri, e n'altra "A la Canpana" in Contrà del Sale, 'desso via Oberdan, dove tra mortari, lanbichi e balansete el pareciava e 'l serviva i clienti. Chi che 'ndaseva torse la roba da lu, gera sicuro de catare oltre a droghe e spessie pi varie e senpre fresche, na persona a la man, disponìbile a dar consili e aiuto, amigo de tuti, pronto a far carità a la Ciesa, da sàntolo a batésimi e créseme, conpare de matrimonio e via. Par el so fare a la bona e preciso el popolin senplicioto lo gaveva soranominà "el paron de Padova". Questo gera el Mandelli de dì. Sì, parché a la sera, có'l sarava botega el se inciavava drento de la stessa insieme a na conbrìncola de figure porche e col soranome de "Canpanino" el deventava el caporion de na banda de sercantoni e ramenghi che de dì, fin che eo tegneva banco, lori se spranpagnava de girondolon par canpagne e paesi a ociare e recesare, par dopo tornare a la sera e métarse d'acordo col "Canpanino" dove 'ndar de ganso a la note. Quando a la fine sti furfanti xe stà ciapài xe stà inpinìo pàgine e pàgine de verbài giudissiari che qua in pìcola parte mensonemo, solo par dare l'idea de cossa che gera capasse soratuto el "Canpanino".
La note del 25 magio 1616 el "Canpanino" insieme a n'altra bona lana come lu, i ghe ga dà inpasso par la strada a on serto Piero Pasta, che gera drio 'ndar casa a poejare; dopo 'verghe dà na sgiaentà so la testa i ghe ga fregà denari e anèi e i lo ga lassà destirà par tera tramortìo.
Nel 1631 al tenpo che nel Padovan ghe gera la peste, l'infession che in pochi ani ga portà a morte 12.000 persone so na popolassion de sirca 34.000 àneme, senpre el "Canpanino" e naltri do galiofi, tuti vestìi de bianco, co la falsa scusa de èssare quei che 'ndaseva par le case a védare se ghe gera malà de peste, i xe 'ndà da on serto Bernardo a S. Sofia e na volta drento i ga tirà fora le armi, i se ga fato dare queo che'l gaveva (1.000 ducati) e prima de tòrsela a ganbe, par zonta, i ghe ga sbarà 'dosso na archibugiada.
On barbiere che gaveva casa e botega a S. Cansian, on serto Zorzi Pinci, el xe stà costreto drio a minace a eo e ai so clienti, de 'ndar via da casa parché el "Canpanino" se gaveva puntà de far 'ndar stare do so amighi.
La note del 27 febraro del 1634 insieme a altri de la so risma, i xe 'ndài al monastero de Pralia, giutài da on frate che ghe ga fato de terso, verséndoghe la porta, sensa far bacan i se ga portà so la cela de l'Abate che dormiva, i lo ga blocà e i se ga portà via denari e argenterìa e tuto queo che ghe pareva de valore. Dopo 'ver ligà e inbavalià l'Abate, e ligà le canpane, i xe scanpài verso Tramonte.
Violense carnài e avelenamenti e pugnalade no se conta; ma l'asenada che fa capire fin dove che podéa rivare sto demonio scaenà, la xe questa: more on mercante, sior, on serto Francesco Peretti, che lassa la mojere co do fioi, uno de trèdese e naltro de oto ani. El nostro "Canpanino" se mete in testa de 'reditare el patrimonio. Da fanfugnon quale el gera el riesse a portar casa sua el tosatèo de trèdese ani par convìnsarlo de sposare so fiola. El bociata s'inpunta, l'avisa so mare e grassie a on fradèo che la gaveva, Capitano de la sità, la riesse fare che'l fiolo ritorna a casa. El testardo de Mandelli no se rende, el se fa giutare da i so "bravi", rapisse el tosato e lo porta co la forsa a l'altare. Par farla conpleta, in sèguito el fa velenare el fradeleto de oto ani, el copa so mojere e soto minace de seto ti quale conseguense el costrense la pora védova a 'ndar co lu.
La storia de sta banda, co la protession de tanti amissi in alto xe 'ndà vanti par na ventena de ani. I pori desgrassiài che ghe petava soto, i vegneva obligài a no denunsiare, ma có la misura xe stà colma le denunsie ga tacà piòvare a scaravasso e par el "Canpanino" e la so banda no ghe xe stà pi sole che suga. Quei che xe stà ciapài ga cumissià a pàndare e dopo el processo i xe stà condanà chi a l'ergàstolo, chi a ani de galera o tacài al remo ne le galèe de la Serenìssima.
Mandeli e de i altri, avisài che i gera drio 'ndarli a tore sù, i ga fato tenpo a tòrsela, fora de le tere vènete. Dopo on par de ani seben che 'l saveva de èssare stà condanà a morte, ma convinto oncora che amissi inportanti de Padova i riussisse a protègerlo, el xe tornà par farse rifare el processo, ma la ghe xe 'ndà male. La condana a morte xe sta riconfermà anca se difarente. So la prima sentensa gera stà dito che par la strada, portàndolo al patìbolo, ghe doveva èsser dà sìe colpi de tenaja infogonà, tajà na man davanti a l'osterìa in Contrà del Sale, dove a so tenpo el gaveva fato velenare l'osto, infine tajà la testa, squartà in quantro tòchi e inpalà in pasto ai osèi che lo magnasse. Ne l'ùltima sentensa i ga fato difarente. El 30 magio 1636 prima i ghe ga tajà la man e dopo 'verlo picà i lo ga inpalà fora de la Porta S. Giovanni, fin a consumassion del corpo.
El "Canpanino" gera on lazaron, ma serto che la giustissia de alora no schersava par gnente co la pena!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Novenbre:
Editoriale
Chi xe che ga paura del crocifisso?
Come on fungo de stajon, eco che taca la frinfrogna: via da le scole el crocifisso!
Parché? Ghe xe da vergognarse èssare cristiani?
de Mario Klein
Visti da vissin
Emma Borsetto Pizzolato
Trovar la vena par scrìvare ne la terza età e comunicare i propri ricordi
de Milosc Voutcinitch
Da Verona
Par un biron in più
A zontarghe un biron a la scala, sìnbolo de i Scaligeri, l'è stà quel megalomane de Cansignorio, malà del cosideto "mal de la piera"
de Wanda Girardi Castellani
|
