|
Devossion popolare
La Candelora
Chi sa quanti in sto mese parlarà de sta festa devossionale dedicà a la Madona che tuti conosse come la Candelora, par vìa de le candele che vien benedìe e consegnà ai fedeli parché i le custodissa in casa come segno de protession. Solitamente, da le nostre parte, se usava inpissarle par brusare le fojete de ulivo, quando un bruto tenporale minaciava na tenpestada su i racolti. Ma la festa ga orìgini misteriose e sicuramente pagane, come quasi tute le feste religiose, e non solo par quelo che riguarda la presentassion al tenpio par la purificassion de la Madona e la circoncision del banbin, ma par altre formalità pagane che coincideva co sto mese. Se usa dire che el cristianésimo primitivo, par no fare a bòte col paganésimo inperante, el ga batezà tante usanse e tradission pagane, canbiàndoghe solo el nome. A sto punto la storia vera no spiega ne i mìnimi particolari la festa pagana che sta soto a la Candelora; sicuramente la ghe gera e la doveva avere na serta inportansa par la zente, se la xe stà ripresa da i cristiani. Solo che qua se fa strada la legenda che de storia vera ga ben poco, ma che riussiva a sodisfare el desiderio de capire e de conóssare de tanti fedeli.
Un prete vecio del me tenpo che gera in parochia come pensionato e sensa un incàrico speciale, nei giorni de festa, qualche volta, el sostituiva el maestro de dotrina malà, el faseva na sorte de precariato al roverso, nel senso che no 'l gaveva speransa de cariera: " Don Piero fa el stropabuso" diseva la zente, e gera vero. Ma quando el ne capitava a noialtri più grandeti de la quinta, gèrimo contenti parché, invesse de le domande e le risposte da inparare a memoria, el ne contava paràbole de so invension, su tuti i argomenti del catechismo. Na doménica de febraro co un soleselo che scaldava quanto na candela su na càmara, come dire gnente, el discorso se ga fermà su la Candelora che gera passà solo da tre giorni. Don Piero ga scominsià sùbito da le usanse de i pagani del tenpo antico, usanse anche terìbili ma senpre segno de na fede, de un desiderio, de un bisogno, parché la fede ga un mànego par tute le necessità.
"La tradission de la Candelora" scominsiava don Piero, intortegiàndose el tabaro su i zenoci, "vien da distante, da na tera che no se pol gnanche inmaginare, piena de conossense, de civiltà, de tradission e de divinità. Quasi ogni categorìa gaveva el so dio protetore, co le so legi, le so feste, i so giorni dedicà, le so oferte e le so inmàgini, statue o altro. Ne la tera dove xe nato Gesù, ghe gera divinità che vegneva da l'Egito, dove se ga rifugià san Giusepe col Banbin, che Erode voleva copare. Una de ste divinità se ciamava Iside e la rapresentava, par i so devoti, la tera che vegneva fecondà da l'aqua del fiume Nilo. Un fiume grandissimo e profondo, navigàbile come el mare, che in ogni stajon de piena, inondava tute le tere che ghe stava torno e solo grassie a la so aqua, la zente podeva coltivare racolti e magnare par vìvare. Le stajon in quei loghi no xe come le nostre quatro, là ghe ne xe solo do e adesso, par esenpio, da noialtri xe ancora un fredo boja e invesse da le so parte xe scominsià la primavera. I devoti de Iside, che nel so culto gaveva el posto de la Madona, i la festegiava co de le cerimonie propissiatorie domandàndoghe la so assistensa e la so protession, par i sposi, par le fameje, par i racolti e par tute le altre necessità, proprio come femo noialtri ne i confronti de tuti i santi e de la Madona in particolare. Go trovà scrito in un libro antico ne la biblioteca del seminario che, el popolo de la Palestina gera tanto devoto a sta dèa benèfica e, ne la circostansa de la so festa su la verta de la primavera, i ghe ofriva de i doni e i ghe inpissava de le torce profumate che i piantava su la sabia in forma de cerchio. El cerchio gera el sìnbolo de la perfession e i so devoti sperava che tuto ghe fosse andà drito e perfeto come el segno del cerchio. Da la torcia profumata de i devoti de Iside, a la candelina de la Candelora: xe restà l'inmàgine de la torcia, la festa de devossion, e la figura de na Signora del cielo, la Madona, che tuti i credenti prega e invoca ne le so necessità. Parché i òmani xe pieni de necessità e de bisogni che no i pol provédare da soli, sensa l'aiuto del Signore tràmite l'intercession de la so mama Santissima, la Madona. Disémoghe, sùbito, tre Ave Maria e, quando andè a casa, domandeghe a vostra mama de inpissare, ma solo un fiantin senò la se consuma, na candelina benedìa de quele de la Candelora."
Cussì, el vecio don Piero, sentà su la bacheta de la sagrestìa, finiva la so storia de la Candelora. Inùtile dire che, apena rivà a casa inpissàvimo la candelina e anche - par curiosità - snasàvimo se, par caso, no la saveva da profumo come le torce de i devoti de Iside.
Ma come sucede in tute le legende de i òmani che va a barufare co la storia, ghe ne sarà altre diverse e più documentà. Però questa de don Piero ne la freda doménica de un febraro tanto distante, ch'el pare anche lu na fàvola, la me pare abastansa bona.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Febraro:
Editoriale
Se se vole la pace...
No se pole parlare de pace co le armi in pugno: bisogna prima farla nàssare ne la nostra testa, nel core, ne le case, ne le fàbriche...
de Mario Klein
Da Verona
El Pantheon a Santa Maria in Stele
a cura de Wanda Girardi Castellani
|
