Da Verona

El Pantheon a Santa Maria in Stele

Antichi lavatòi in Santa Maria in Stele

Ani fa ò racontà la storia de la pora Anzolina Leonardi, 'na storia che probabilmente l'à ispirà quela, deventà assè più conossuda, de Alessandro Manzoni. L'"Innominato" nel caso nostro, l'è stà el vintiotene conte Provolo Giusti de le Stele, un cao-de-roba, sior solo de dèbiti e de cativeria che 'l g'aveva el "castelo avito" propio nel bel comune a nord de Verona (9 km.) desteso co 'i so vigneti sul lato oriental de la bassa Val Pantena. El conte Provolo co' l'aiuto de i so "bravi" comandà dal brigante Falasco (al sècolo, Paulo Bianchi), l'avéa fato rapir da la casa de canpagna in quel de Poian, la Anzolina par costrènsar so papà, messer Giovanni Giacomo, facoltoso marcante furlan de formài, a dàrghela in sposa co' la so grassa dota. Par 'sta bruta storia el conte Provolo, condanà da la "Serenissima", el g'avéa lassà la testa soto la manara in piassa san Marco, mentre Falasco el ghe l'avéa lassà a Verona, in piassa Erbe. Secondo l'usansa del tempo (1600), al conte Giusti el Consilio dei Dieci el g'aveva pura fato demolir el castel, nel feudo de le Stele. Ma el bel paese de Santa Maria no 'l ghe deve la notorietà solo a 'sto "gialo" pitosto nero. La so fama, el ghe la deve a una de le più interessanti maraveie del Vèneto e probabilmente del mondo; el Pantheon, un mondo soteraneo, màgico, favoloso e legendario, fodrà de capolavori pitòrici paleocristiani, i più bei de l'Alta Italia e, quasi de sicuro, i più antichi.
L'acesso, "ad opus arquatum", l'è traverso 'na scala che parte drio a un canceleto a destra de la cesa. Andando zo, za se pol amirar de le làpidi murade su i fianchi con epìgrafi in latin e in greco. Ruspante inveçe la scrita (in volgare) sul stema al centro de la ciave del pìcolo ingresso a arco: "ingresso al Pantheon". El Pantheon (o Ipogeo), tempio scavà probabilmente nel 28 sèc., el se trova praticamente soto la cesa.
I afreschi, recentemente riportà a un mèio grado de visibilità a òpera de l'Ist. Central del Restauro, se pól amirarli ne le do stanse sosteranee. Costruì, secondo 'na làpide, da Pomponio Corneliano co' la moier Giulia Magia e i fioi Giuliano e Magiano, ne la prima metà del 38 sècolo d. C., el g'avéa probabilmente in orìgine el scopo de onorar le divinità de le aque; infati propio da lì sgorga 'na lìmpida, fresca vena che de sicuro l'à alimentà un aquedoto che, da la Valpantena, el rivava infin in çità. Che el tempio pagan el sia po' stado trasformà in santuario cristian ne i primi sècoli, pararìa bastansa credìbile. specie tegnendo presente che par tanti studiosi almanco i afreschi i sarìa de l'època de san Zen, el véscovo moro veronese, morto verso el 372/380. Ma tornando ai afreschi, dopo èssar andà zo da i 15 scalini, se riva a un coridor che dà a 'na celeta da dove se vèrse do altre cele larghe 5 metri, fonde 6,50, alte 4,32 con un lucernario. El coridor rivolto a nord, a sinistra, l'è el più adornà de afreschi, i mèio conservadi.

Un afresco del Pantheon

El sofito l'è impiturà de colori rossi, giali, grisi con 'na prospetiva che fa crédar a tubi de teracota incastradi uno ne l'altro. Soto, core 'na greca che la par in rilievo, Su i muri, ghè sène de l'antico e del novo Testamento, più o manco ben conservà.
Tra i più interessanti manufati, un'arca romana rebaltà che se pol far risalir anca quela a Publio Pomponio Corneliano, consolare e coretore da Venessia, forsi al tempo de Costantin. Una scrita sul cipo la ne dise che nel 1187, ne la prima domìnica de giugno gh'è stà la consacrassion da parte del Papa Urbano 38 con la concession de n'indulgensa plenaria a chi avarìa visità quel lógo ne l'aniversario de la deta consacrassion. Le piture murali, paleocristiane, in tardo romano, le presenta sène in forme verìstiche e i è tecnicamente in stile impressionistico: l'Ingresso de Gesù in Gerusaleme, i tre compagni de Daniele condanà a la fornasa da Nabucodonosor, la strage dei Inocenti, la Natività, ecc.
Bei i è anca i mosaici del pavimento che i rapresenta stele, vigne, barchete, croci, ecc..
La nicia, a destra del cunìcolo, la mostra du santi: Santo Stefano e San Lorenzo. El cunìcolo el va avanti ancora verso la sorgente dove l'aqua la vien incanalada. Da certi manoscriti del pàroco Francesco Ziletti, ne l'archivio de la parochia, (1760-73) se pol dedur che nel rugolar mai straco de i sècoli l'Ipogeo, o Ninfeo, el sia stà anca in sèguito bandonado, ormai pien de sassi e de tera. Ne l'ano 1817 l'ing. Giacomo Gemma l'à po' sistemà el piano nel trato del cunìcolo. Ma l'ano dopo, la sera de l'11 magio, le aque vegnendo zo da i monti a róta de col, roersando i muri de cinta de la piassa le s'à scaraventà nel Pantheon inondàndolo completamente. El pàroco de alora, Stevanelli, l'à dovù par do volte sgombrar el material aluvional fin al 1823 quando el Pantheon l'è stà finalmente netà e riconsacrà.
Quando, dopo aver visità 'sto lógo, come l'à scrito Dante, finalmente "se vien fóra a rivédar le stele" (in 'sto caso, "Le Stele", in quanto semo in Santa Maria) se g'à l'impression de desmontar da 'na favolosa "màchina del tempo" che la n'à scudelà 'vanti de un par de meiara de ani.
Disemo però che no' l'è fàcile organisar la vìsita. Bisogna rivòlgerse al Pàroco: tel. 045 - 550035, opura a la Tratorìa "Pantheon" (serà al luni), dove che se magna pura ben e a bon marcà: tel. 045 - 550681.

[torna sopra]