|
Da Adria (RO)
Orti e giardini
Vissin de mi - stago inte uno de chi quartieri nati inte sti ùltimi ani - gh'è case, casete, vile, vilete, casermun, case a schiera e ognuna l'è, in qualche modo personalisà. Questa l'è na gran bela roba parché l'è la dimostrassion che ognuno de nantri ga na testa, ga i so gusti, ga la so maniera de sentirse a casa sua. Chì vissin gh'è uno ch'el fa el professore de scuole alte, che, se davanti a casa el s'à fato el giardin, par de drio el ga l'orto: sédani, sióle, radecio d'inverno e radecio d'istà, salata da tajo e quela che dura, pumidoro inte la stagion calda e capussi inte quela d'inverno: sarà parché l'è de idee ecologiste (desso l'è de moda!), sarà parché cussì el sparagna su la verdura, sarà parché el se destravia da tuti i pensieri e le preocupassion del so lavoro normale, fato sta che có el ga du minuti de tenpo te lo vidi sudà come na bestia co' la sapa in man ch'el gh'in dà. E l'è beato e contento, anca se la matina drio el se cata co' le vessighe inte le man. Lì tacà ghe stà un ragionere de banca: la matina in uficio, tuto "posso èsserghe ùtile, de cossa galo bisogno, el se còmoda ch'a sistememo i so cunti par ben..."; el dopodisnà, in màneghe de camisa e braghe de tela, là ch'el gh'in dà e ch'el se fa i cali par piantare, vangare, daquare, tor sù patate, fasòi, pumidoro e teguline. Da st'altra banda de la strada ghe stà un dotore che esèrcita la so profession in ospedale e che no'l ga massa tenpo; e 'lora te vidi spesso 'n ometo che lavora in orto e sto dotore che tuti i minuti lìberi ch'el ga, l'è anca lu in meso a le vaniese a dare órdeni, a consiliarse, a méter chelcossa int'el sestin e magari anca a ciapare in man la vanga, sùbito fermà da l'ometo: "Ma cossa falo, dotore, el me daga chì ch'a fasso mi!" "Ma,védito, volevo solo mostrarte come ch'avrìa fato mi..." "Sì, sì, ò capìo, ma el lassa pur stare, sinò el se rovina le man. E dopo, come falo a operare?" E el dotore el se lassa convìnsere, ma dentro de lu el se brusa par no poder rumare un s-ciantin inte chela tera che, in fondo, l'è sua.
Più in 'a gh'è na vileta, fata co' tanti sacrifici, indove ch'a ghe stà un falegname ormai in pension. La tera tornovìa la casa no l'è poca e lu l'à fato non solo orto ma anca fruteto: oltre a le sòlite erbe gh'è du pomari, du persegari, un figaro, un peraro, tre brognare; védarlo in primavera l'è un piassere pa' i oci: tuti sti àlberi carghi de fiuri i fa deventar bela non solo la casa ma ride tuto el quartiere! E lu l'è orgolioso. La rason l'è presto dita. S'andemo a vardare da dove ch'a vien tute ste persone, inamorà de la natura al punto da sacrificare parte del so tenpo lìbero e da métarse sul gropon fadighe ch'i pudrìa sparagnarse, catemo le cosidete "radise contadine". Tuti i è nati in canpagna. I so genitori i à fato i piè a le mosche pur de farli studiare, de farghe ciapare un mestiere, na profession che no ghe fesse inpenire le onge de tera; i voleva che i fesse un salto inte la scala sociale, ch'i se piassesse un scalin più in alto de quelo che i jera luri. E i fioi i ga dà da mente: i à studià, i s'è diploma, laureà, i à ciapà na strada che li à portà distante da le vache e da la cuora, ma inte l'ànema, in fondo in fondo, a gh'è restà el spìrito contadin, l'amore par la tera, la sodisfassion de védarla dare fruti. E tornovìa la vila, la vileta, la casa i à continuà a piantare sióle e radici.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Febraro:
Editoriale
Se se vole la pace...
No se pole parlare de pace co le armi in pugno: bisogna prima farla nàssare ne la nostra testa, nel core, ne le case, ne le fàbriche...
de Mario Klein
Da Verona
El Pantheon a Santa Maria in Stele
a cura de Wanda Girardi Castellani
|
