| a cura de Romano Beltramini |
|
"La Sguaratà" - Ciàcole adriote
"Continua a fare quelo ca te fa"
 |
| La siora Giulia Ramello Beltramini (al centro) co so fiola Haydée e so nevodo Romano |
La Giulia la gera una de i ùltimi fiòi de na fameja grossa de Ariano Polesine. Papà e mama, agricoltori onesti, no senpre in grado, però, de sodisfare a tute le esigense de la fàbrica de l'apetito e, quando che "Siora Ana" la sbate, no ghé santi ca tegna: bisogna trovare na solussion. E, la Giulia ancora putela zóvene, la gera stà mandà a Ciosa, a servissio da la fameja del Dr. Morchio, mèdico condoto ca se podeva anca permetere el lusso de... la servitù. Burlon, no serto tanto splèndido co le remunerassion al personale, el se inpeniva el gosso sensa ritegno tanto che la mujere, spesso, la lo richiamava: "Chechi, ti magni massa"; al che, lu, pronto: "Vàrdime quel ca c... e mai quelo ca magno". La servitù rideva! E, la servitù, no magnando abastansa, la se sfogava in cantina co qualche goto in più de quel bon. Tant'é che, più tardi, se gera presentà richiesta de na bona cuoga a Venessia, dal comandante de nave Gagliardini. òtime le referense per la Giulia, salvo cle vìsite a la cantina. Ma, quando la Giulia gaveva precisà la causa a Gagliardini, el comandante aveva scrito a Morchio che quando se voleva avere la servitù bisognava anca darghe el so magnare a suficensa!
A Venessia la Giulia gera deventà na cuoga soprafina. Bisognava licarse i bafi có la preparava el magnare e, particolarmente, gera ecessionali i dolsi de carnevale: cróstoli, favi, fritele e... parenti. Gagliardini el gera un omo ca ghe voleva gran ben a le bestie, oltre che ai cristian, e la Giulia, fin da l'assunsion, la gheva avù na disposission ben precisa: ogni giorno du litri de late per el can ca doveva èssere tratà come uno de fameja. Serto, a la Giulia che, in casa sua, eva conossù la tribolassion, pareva stranbo dover rispetare sto detato.
In te la stessa cale, a Venessia, di fronte a la casa del comandante Gagliardini, stava na fameja de pori desgrassià batù da la miseria.
Pochi schei e tanto tirare de cinghia. La Giulia, de scondon da i paroni, eva pensà ben de slungare un litro de late del can co un poco d'aqua e de passarghe st'altro litro, ogni giorno, a cla pora fameja per la quale, sta providensa, no guastava. Ma la Giulia gheva anca el pensiero de sta scondarola. Gera giusto, o nò, disubidire ai paroni?
Gèrimo soto Nadale e, la Giulia, la va a S. Marco per confessarse.
"La staga lì - ghe dize el nónsolo - vissin a chel confessionale che, fra poco, vien a confessare el Patriarca". Per la Giulia, sta autorità de Cesa valeva come tuti i preti e, entrà in confessionale, sensa saverlo la ghe parla al futuro Papa Sarto, S. Pio X, ca gera, alora, Patriarca de Venessia. La ghe cunta: "Padre, mi ogni giorno privo el can de i paroni de un litro de late e a ghe lo slungo a na fameja de pora gente, con tanti fiòi, che la sta difronte a la casa dove fasso la cuoga; i paroni, però, no i sa gnente. "Bela - ghe dize el Patriarca - te fato dare schei per quelo ca te fa?" "Nò, padre, mai al mondo me farìa dare palanca". "E alora, bela, continua a fare quelo ca te fa che el Signore te vede e l'é contento". El ghe dà l'assolussion e la Giulia torna a le òpere giornaliere più serena, dopo la comunion in S. Marco, vegnendo a savere, solo dopo tenpo, che chi l'aveva assolta gera deventà un Santo, e che Santo!
Col tenpo la Giulia se gera sposà e trasferì a Adria dando vita a na bela fameja.
Cara Giulia, ormai in cielo a contenplare S. Pio X, el to confessore, vissin al Signore. ànema onesta e generosa, fa ben, sto Nadale, conóssare sta storia, ca cunto per la prima volta, co rispeto e a edificassion de chi me leze.
La Giulia, gera me nona.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Dissenbre:
Editoriale
Voja de on Nadale putin
Se ga l'inpression che sia drio tornare la nostalgìa de on Nadale poareto, a descàpito de on Nadale sprecon, finto e inùtile
de Mario Klein
Da Thiene (VI)
El presepio
Na antica tradission che ogni ano ne fa rivìvare el miràcolo del Nadale
de Bepin Daecarbonare
|
