|
Da Thiene (VI)
El presepio
Na antica tradission che ogni ano ne fa rivìvare el miràcolo del Nadale
 |
| L'Adorassion del banbin Gesù (1620?) del pitore Gerard Van Honthorst. |
Se gavì ben osservà, in sti ùltimi tenpi, le fameje, màssima dove ghe xe putéi pìcoli, ga "riscoperto" el presepio, che prima ciapava poco spassio, magari solo la Natività, soto un gran àlbaro de Nadale, meso sconto da 'e rame carghe de nìnoli e balete colorate, 'desso te lo vedi belo grando in sala da pranso o in altro posto de riguardo. Questo xe bon segno, anca se al dì de ancò le statuete xe de plàstica e finto el mus-cio, quelo che più conta xe el significato: el Banbinelo, miràcolo de Amore, caressà da i oci de un putélo co vissìn al popà e la mama, el ghe ride da la paja, e contento el ghe manda un baso co la manina... questa sì xe poesìa!
Ogni ano a Nadale sto quadreto de la fameja, unìa davanti al presepio, el se rinova in tante case e, co i tenpi che core, xe da tegnérghene da conto.
Mi, la tradission de fare el presepio la go in tel sangue e anca 'desso a quasi setanta ani, un par de dì prima de Nadale a tiro fora el scatolon e pian pianelo scumissio a descartare le statuete de gesso mèse consumà e scolorìe e me vedo putélo traficare co i stessi personagi ma più novi e freschi de colore.
Alora fare el presepio gera quasi na inpresa: prima de tuto bisognava fare l'inpalcadura jutà da me fradéi, nel sotoscala rente al fogolare, dove pipava la stua a segaure, sora du cavaleti da lissia inciodàvimu le tole che serviva da basamento e in alto tuto 'torno par scòndare el muro, foli de carta blu trapontà de stéle argentà. Derinpeto, el sfondo, piturà da Giovanni Aver, na vera bravura, dove nel deserto se inalsava un minareto tra na brancà de casete bianche co la cùpola e quatro palme; nel verde poco distante, un s-ciapo de piegore parà da un pastorelo... na mareveja! E infine na stradela che intorcolàndose fra 'l mus-cio, portava a la capana e, par quanto se tirasse i oci, da quanto ben la gera fata, no se capiva dove finiva quela piturà e scomissiava quela "vera" fata co le segaure.
Posà el mus-cio a slorde e co la marogna (scorie di carbone cock) fate le montagne e qualche grota, davanti su la destra ben in vista, postàvimo la capana o mèjo la grota, ricavà da na vecia sòca (ceppo) e te un canton, na possa de aqua co le arne de ciruloide e na doneta che lavava i pani. Su la sinistra in alto el castelo del re Erode fato de surlo (sughero), co tanto de merli e ponte levatojo; più in basso te un pianoro, casete de legno sensa teto, incolorìe de bianco e finestrele nere conpletà da na "moschea" col so minareto e un palmissio: un vero vilagio orientale.
Sparpanà qua e là le case de i pastori e qualche stala, fate de carton inpiturà. Par ùltimo se meteva le statuete che rapresentava la gente più ùmile e poareta che, a l'anuncio de l'Angelo, par prima xe corsa a la Grota par adorare el Banbinelo: la stela cometa, co i so slusini de argento, tacà sora la Capana, ghe insegnava la strada.
A sto punto, dirì voialtri, el presepio gera finìo, mancava solo la statueta del Banbinelo che de règola vegneva messa la note de Nadale co la lumeta de ojo inpissà vissin, tornà da la Messa de mesanote; ma ve sbalié, parché, par darghe un fià de movimento, co la base de un vecio giradischi, gavevo fato na spece de strada mòbile, e incolà par sora un pastore che sonava le baghe (cornamuse) co rente na desina de piegorete e più in là na dona co la lanterna in man, che girando tondo le spariva te na caverna e le tornava fora par scòndarse da novo fin che 'l giradischi se fermava. Co un tòco de filo elètrico, un vaso de vero pien de aqua, un poca de gaveta co ligà un picolo triàngolo de lamiera zingà e na manovela, calando 'dasio drento l'aqua el triangolo de zingo co la ponta in zò, se sbassava la corente e, come par incanto, se faseva note e un "carillon" a susta, sconto drio na rocia, co na dolse nenia, cunava el Banbinelo.
Chel'ano al Concorso Aspiranti, go ciapà el primo premio e me ricordo ancora la facia che i ga fato l'assistente e la delegata davanti al fenòmeno del giorno e de la note, có i xe vignù a vèdare el me presepio par darghe un giudissio.
Ogni ano, soto Nadale, sti personagi, conpagni de la me infanzia insieme co i ricordi, me li ritrovo in man e, co l'entusiasmo de quando gero bocia, in sala da pranso soto el camineto tapessà de carta-rocia fasso el presepio e speto, col core pien de contentessa, me nevodo Michele de tre ani e meso che'l vègna a far caminare pastori e piegorete verso la capana, co le so pìcole manine.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Dissenbre:
Editoriale
Voja de on Nadale putin
Se ga l'inpression che sia drio tornare la nostalgìa de on Nadale poareto, a descàpito de on Nadale sprecon, finto e inùtile
de Mario Klein
Da Thiene (VI)
El presepio
Na antica tradission che ogni ano ne fa rivìvare el miràcolo del Nadale
de Bepin Daecarbonare
|
