|
Editoriale
Voja de on Nadale putin
Se ga l'inpression che sia drio tornare la nostalgìa de on Nadale poareto, a descàpito de on Nadale sprecon, finto e inùtile
 |
| Ne la grazia de sta Mama e la serenità del so Putin, tuta la poesìa del pròssimo Nadale. (disegno de Ines Scarparolo, 1996) |
Forse la xe propio vèra l'idea che on fià de crisi econòmica la ne fa anca ben: la ne fa fare qualche rinuncia, ma la ne ripaga co calcossa che ne fa siori drento. Dirìa che questo el xe on fato positivo: ritornare on poco indrìo - nò massa, par carità! - fa ben al portafolio, a la boca e al core! Cussì se rinova el valore de l'antico deto: xe mèjo brusar on paese pitosto che pèrdar na tradizion. Se ga l'inpression che se staga calmando la borida ai regài, a le magnade a crepapanza, al butar via schèi a scapelà, e che se torna - magari on fià a la volta! - a la tradizion de on Nadale manco inùtile, manco insulso, manco inquinà dal "stordimento pubblicitario" in pista co mesi de antìcipo: insoma a on Nadale poareto, pulito, putin!
L'aria natalizia la ne riporta i ricordi, el profumo de tenpi lontani, el desiderio de incontro, la magìa e el gusto de la festa, del stare in fameja, na gran voja de colore, de luse e de canti, l'istinto de on gesto sincero de solidarietà, de na bona azion, de on aiuto anònimo senza spetarse el regalo de ritorno...
Tuto questo contro l'arido Nadale de l'esteriorità, del consumo, del superfluo, del senza senso, del puro significato umano e basta!
Òtima ocasion, dunque, questa del Nadale, par riflètare, par dirghe pan al pan, par capire la storia, parché de storia se trata. Xe passà pi de domila ani dal giorno de la grande scoperta, da la pi grossa rivoluzion so la tera, dal canbiamento globale de la vita, portà da la nàssita de chel Gesù che, savendo in atìcipo che l'omo riva fin lì, el ga tacà a farne scola partendo dal basso, dal mìnimo, dal tera-tera, da na stala, da la paja de na grupia, faséndose putin, débole e minùo, bisognoso de na Maria e on Giusepe par manifestarse.
Sì. El Natale vien a ricordarne che xe proprio lori, i putini, a rapresentare la verità de la vita, lori siori de senplicità, de significati e de speranze. I putini, generosi, previdenti e sensìbili, forse i xe i primi a capire el nostro inbarazo, a capire che la xe dura èssare grandi (adulti), genitori, zii, noni, indafarà e ciapà da la freve del regalo. E i ne fa capire che ga 'ncora on senso inzenociarse davanti a on Gesù Banbin de gesso, ne le nostre cese, ne le case, davanti a on presepio, purché tornemo on fià putini drento, nel nostro core, e soratuto no restemo indifarenti davanti ai diese milioni de putini che more ogni ano nel mondo, davanti ai putini che oncora oncò nasse ne le grote de la guera, ne le capane de le malatìe infantili, su le strade de la fame pi nera.
Eco, ghemo proprio bisogno de on Nadale putin, par ripartire dal basso, da la senplicità, da l'ingenua modestia, da l'entusiasmo e la fantasìa de i putèi.
Me àuguro e ve àuguro che possa ritornare on Nadale misterioso, co quanto basta come ne i presepi de na volta, autèntico come el profumo del mus-cio, on Nadale vecio e novo come el Putin che nasse "pieno di grazia e di verità".
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Dissenbre:
Editoriale
Voja de on Nadale putin
Se ga l'inpression che sia drio tornare la nostalgìa de on Nadale poareto, a descàpito de on Nadale sprecon, finto e inùtile
de Mario Klein
Da Thiene (VI)
El presepio
Na antica tradission che ogni ano ne fa rivìvare el miràcolo del Nadale
de Bepin Daecarbonare
|
