|
Editoriale
El balon... l'è nà in balon
El calcio el sta vivendo na situazion de crisi patoca, tra scàndali, falimenti, sentenze de tribunài e violenza. Dove xelo finìo el zogo?
 |
| Sarà ben fare calcossa, parché la camaradaria del balon la torna gonfiarse... (foto GaMa) |
No la xe na novità, ma rivare a dover dire "senpre pezo"... la xe gran bruta! Zopegando o jutàndose co le cròzole, el mese passà xe partìo el Canpionato 2005-2006, ma co na confusion da mati. Xe stà ciamà in causa parfin i sìndaci anca de sità vènete, che i gavéa blocà l'uso de i canpi da calcio, parché no i voléa che le partìe de la serie B no le vegnesse zogà al sabo.
La "legge Pisanu" su i inpianti sportivi sicuri la ga fato el resto. Na lege necessaria, parché in qualche modo bisogna almanco tentare de métarghe on freno al "calcio della violenza isterica", de i motorini butà zo da l'alto de le gradinate, de le partìe sospese a metà par la notizia falsa de on morto!
Ne la scola de l'800 o de i primi del '900, el maestro doparava la bacheta par tegner boni i so aluni pi scalmanà. Ne la "scola" de la doménega calcìstica (o del sabo), ghe xe i manganèi, le manete e i aresti, ma 'ncora no basta par fermare la violenza de i zóvani tifosi che se presenta in branco e che se ne inpipa de la lege che regolamenta la vèndita de i bilieti. Bisogna entrare in canpo a tuti i costi... e zo bòte da orbi.
Ma... come mai che la gramegna de la stupidità la continua a infestare el mondo del calcio? No xe che, par caso, co tuti sti scàndali, sti dèbiti, ste trufe e ste retrocession el xe proprio el "mondo del calcio" che 'l xe deventà tuto fora che on zogo, on zogo da praticare con inpegno, serietà e passion? Dove xelo finìo el zogo del balon? Poarin... el xe deventà on'industria, el dipende da intaressi, dal dio-denaro, da i bilanci trucà, da le scomesse, da i risultati conbinà prima che vègna zugà le partìe.
Par no parlare de i schei che tira i zogadori, sti eroi de la doménega, che ris-cia de morire par via del doping: in poco più de 50 ani xe morti 480 calciatori, soratuto a causa del morbo de Gehrig.
E po'... che male che se resta quando la lista de i zogadori in canpo la xe piena de stranieri: anca questo fa male al nostro calcio e mortìfica i sogni de i tifosi in bona fede, quei che no speta altro a la fine de la sitimana...
Bisognarà pur fare calcossa par darghe al calcio el rispeto che 'l se mèrita, e al zogo restituirghe la funzion principale che xe quela de far gòdare chi, tra l'altro, el paga par divertirse.
Ocore sicuramente partire dal basso, educare la gioventù al sport, al conportamento leale, onesto e civile. Le sgunbià, le peà, i pugni, i stramusoni, le scarcajade in facia, le biasteme, i insulti in canpo i xe soto i oci de tuti. Anca queste le xe robe che no vorìssimo pi védare, insieme ai strissioni razisti, volgari e stùpidi.
La màchina del calcio la xe pitosto conplessa, ma se ognuno farà la so parte, se podarà rigonfiare la camaradaria e tornare a incantarse davanti al zogo pi belo del mondo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Otobre:
Editoriale
El balon... l'è nà in balon
El calcio el sta vivendo na situazion de crisi patoca, tra scàndali, falimenti, sentenze de tribunài e violenza. Dove xelo finìo el zogo?
de Mario Klein
Da Verona
I "puoti" de Palasso Turco
de Wanda Girardi Castellani
|
