Da Verona

I "puoti" de Palasso Turco
"Il vedere nel detto portone del cortile (palazzo Verità-Montanari alle Stimmate) usati per cariatidi due grandi satiri, ci fa in qualche modo supporre che del Curtoni sia parimenti quel palazzo al n° 1438 in sulla via che da san Fermo Maggiore mette alla chiesa di Santa Maria in Scala ora De' Sagramoso e prima dei Turco..."

El timon de nave turca, che pende dal sofito in Santa Anastasia.

L'atribussion al Curtoni, probabile architeto de la Gran Guardia, la ghe dà 'na çert'aria de nobiltà al palasso de via San Cosimo, nel qual la fantasìa popolar la s'è sbizarida fin a estèndar la denominassion de "puoti" (bambolotti) non solo al palasso che òspita su la fassada le stranbe cariatidi vestide da turco, ma a tuta la via; adiritura a tuta la zona.
Comunque che 'l Curtoni, neodo del Sanmicheli, el sia o no l'autor del stravagante edificio, inporta poco. L'è invece necessario, par inquadrarlo ne la so giusta luce, tegner presente el particolare stato d'ànimo del comitente che'l voléa in quela maniera imortalar ne la piera l'orgolio par la parte, sicuramente, a so parer, importante che l'avéa sostegnù ne la veste de rapresentante de Verona presso la Serenìssima, ne i festegiamenti de la vitoria de Lepanto (1571).
A farghe omagio al capitan de la stòrica inpresa, el futuro Doge Sebastiano Venier, Verona l'avéa mandà 'na delegassion formà da Pio Turco, Paolo Camillo Giusti, Gerolamo Canossa e Giulio Miniscalchi, ma ghè tocà propio a Pio Turco, omo importante a Verona par le tante càriche pùbliche e par el prestigio de la fameja, (che, tra l'altro, pochi ani dopo la ga dà a la çità un grande pitor, Alessandro Turchi, dito l'Orbetto) a esaltar con bele parole a nome de i veronesi, la grande memoràbile inpresa de i crociati.
De çerto el nostro concitadin el sarà restà colpido dal fato che a esaltar la vitoria de la cristianità contro i turchi i abia ciamà proprio uno che se ciamava "Turco"... cusì l'à pensà ben de far de la decorassion del so palasso tuta 'na parodìa del so cognome.

El mascaron de Palasso Vimercati.

Purtropo par lu, i veronesi no' i à catà de so gusto 'sta stranbarìa, che l'andava de bruto, a lancia in resta, contro tuti i cànoni rinassimentài de l'època... strucàndoghe l'ocio al baroco; un stile assè mal visto da 'ste bande. Resta el fato che la note del 2 agosto 1579, quando ancora el palasso l'era "nóo-noènto", qualchedun l'à laorà de bon brasso par destacarghe la testa a le cariatidi. Inutilmente Pio Turco, in camisa, el ga corso drio ai vàndali con so fradel Marcantonio, tuti du sveiadi da le massade. Le teste i è po' stà catade picà via soto la berlina de piassa Erbe, contornà da 'na marèa de sganassade. Recuperade, i è stade infine rimesse al so posto, sora el col de i pori sàtiri de piera... ma a dir la verità, un pocheto storte (come se pol constatar ancora 'desso).
Ma no' l'è stà mia finì cusì... nò!! De fronte al "palasso de i puoti" gh'è el palasso Vimercati, el paron del qual l'à vossù dir anca lu el so parer su le famigerate cariatidi... tacando su la ciave del portal, un mascaron co' la boca spalancada e la lengua a pingolon, quasi par farghe ai bruti inparmè... 'na eterna sgogna.
Col tenpo, paraltro, la gente l'à finì col 'bituarse anca ai puoti che i è deventadi neri oltre che caroladi... e la ghe passa soto sensa gnanca vardarli... pori puoti, che co' la testa incassà sul col, piegà un fiantin da banda, par che i se perda in malincònici pensieri e ancora più tristi considerassioni su la memoria curta de 'sto mondo che ne le so mile insulse façende, sepelisse tute le glorie... tute le storie, parfìn quela de le tre compagnìe de crociati che Verona l'à mandà a conbàtar par nostro Signor; 'n avenimento eternado ne l'altar del Rosario che 'sti nostri soldadi de ritorno i à oferto a la Madona in Santa Anastasia, insieme con un timon de nave turca che da alora el fa mostra, tacà con ciodi e cadene, dal sofito de la capela che l'èra denominà "del Pisanello". Un cimelio che i me concitadini ancora, a distansa de sècoli-seculorum i se ostina a scambiar co 'na massela de balena.

I "puoti" de Palasso Turco.

[torna sopra]