|
Da Venezia
La forestiera
Quela matina, Toni el becher, gera saltà zo dal leto par córar al telèfono. Stava 'rivando la carne col Tir-frigorifero.
De sòlito el gera bonorivo, ma la sera prima el se gaveva tardà al cìnema co la muger Maria, par védar de novo "Via col Vento", quel capolavoro che ricordava i ani bei, ma quela matina gera sabo, zorno pien de lavoro e la so botega a Mestre la gera ben aviada e çercada.
Piereto, l'ùltimo fiol de tredes'ani ghe faseva conpagnìa e lo ajutàva: "Piero, ciapa el figà de vedelo che xe in frigo". Po', servendo la cliente: "Sissignora, la xe proprio carne de vedelo; va ben cussì?"
El lavoro andava pian pianelo, ma le clienti no ghe faseva caso, parché le se divertiva a ciacolar e lu, par tegnerle bone, montava senpre i discorsi co batùe e notissie. El gaveva la furbarìa de mostrar i tagi de carne senpre da la parte magra, ma le done gera pi furbe de lu: "Toni, el cava quel grasso!" "Lo sto fasendo, signora, la staga bona ché doman xe doménega". E ela: "Cossa crédelo che fassa ne i zorni de festa? Me marìo va senpre a la partìa e i me grandi xe senpre osèi de bosco!" "La ga rason, Madalena" salta sù n'altra, e cussì via se passava da notissie e problemi del dì.
Verso un bòto Toni no ghe ne podeva pi da la fame: "Piero, fame el piasser, ciapa sti schei e va a conprar bira, panini inbotìi e 'na Coca-Cola par ti: faremo un spuntin."
La botega gera restada voda. Na ùltima siora, mai vista prima, co do oci neri e 'na caveada scura, gera ferma su un canton. "Cossa volla?" fa Toni, e ela: "Veramente speto solo el resto de la spesa, signor Toni. Non si chiama così?" "Il resto di che cosa?" fa elo, incuriosìo da l'estranea. "Ma, signore, quel biglietto da 100 Euro che le avevo dato per la spesa: spero che ormai abbia gli spiccioli per il resto, non le pare?" "Non mi ricordo, signora, qui c'è stata tanta gente e, quando servo, guardo la carne e i soldi; non ho tempo per altro". "Io invece mi ricordo benissimo perfino il numero del biglietto, guardi lei, era serie M.C. n° 648189. Se apre la cassa vedrà che lo trova!" A Toni ghe stava montando la mosca al naso, el varda ne la cassa e co maravegia, fra i tòchi da 100 Euro, el trova proprio quelo. "Quant'era la spesa?" el ghe domanda. E ela: "Non trovo più il biglietto di cassa, sarà caduto per terra insieme agli altri che coprono il pavimento. Ad ogni modo la spesa era di Euro 20,50." "Ecco il resto!" fa Toni, contando el resto un po' nervoso. "Grazie e arrivederci!" e in tuta furia la va fora de la botega.
El pìcolo Piero, dopo, gera tornà indrìo col sacheto de le proviste, e i se ga messo a magnar, servendo qualche ritardatario.
A l'ora de serar, Toni ga dà 'na manceta al fiol "Va', caro, va' a casa, grassie." E basàndolo: "Dighe a la mama che fra mesa ora, sarò a casa. Dopo magnà, fa' le lession, te racomando!" "Sì, papà. Sì, papà!" El gera el so còcolo; quando no 'l gaveva scola, el gera senpre in botega a agiutarlo, ma quela matina la testa de Toni gera par aria. El pensava: "Quela siora, co quel'aria da inossente, in minigona e mezo pèto fora, che carne gaveva conprà? Almanco la doveva mostrar el scartosso che sarìa stada la pi bela prova, e mi, stupido, incantà da i so oci ghe go dà el resto! Ma come gavaràvala fato? Vusto védar che la ga léto el nùmaro del bilieto che la siora Nana tegneva alto come 'na bandiera?"
Col velèn in tel cor, el sera la botega e el se ferma come senpre ne la vissina ostarìa "Da Bepi al Bacarèto" par la sòlita "ombreta" che risolveva tuti i problemi. Quel zorno quel vin pareva velèn, ma, dal fondo del bicer, el vede un bel per de ganbe e 'na gran scoladura che ghe pareva de conóssar, e a l'inproviso el sangue ghe xe saltà al çervelo: la gera la signora del bilieto che la stava magnando 'na bela pissa capriciosa! Co 'na man el ghe ciapa el brasso nuo, e, sotovose par no svegiar l'atension de i presenti, el ghe subia in te 'na recia: "O mi dà indietro sùbito i miei soldi o chiamo la polizìa!"
Pàlida come 'na morta, col bocon in boca e sensa fiatar, la ga verto la borsa e tornà i schei cussì come che i gera, e lu, cavalier, in silensio, el xe andà via.
A casa el ga trovà i fiòi za ai fruti, ma la muger no ghe gera.
El pìcolo Piero: "La mama no sta ben, la ze sora in càmara." Toni core sù, ma la muger ghe va 'dosso come 'na furia "Te la dago mi la bela mora!" e zo a tirarghe 'dosso tuto quelo che la trova"... "Maria, càlmite, làsseme parlar". "Piero te ga visto che ti gavevi ciapà el brasso de la dona, parlàndoghe sotovose. Porco, lazaron, falso, gesuita, sta' securo che te farò beco, ghe n'ò za uno pronto!"
A furia de calmarla contàndoghe, un fià a la volta, tuto quelo che gera stà, Maria se ga rasserenà e tuto xe tornà belo. Ma lu xe restà mal par èssar cascà de fronte a na aventuriera.
La gera 'na bela doneta e quando la belessa se sposa co la cativeria ste done deventa un vero perìcolo pùblico.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Otobre:
Editoriale
El balon... l'è nà in balon
El calcio el sta vivendo na situazion de crisi patoca, tra scàndali, falimenti, sentenze de tribunài e violenza. Dove xelo finìo el zogo?
de Mario Klein
Da Verona
I "puoti" de Palasso Turco
de Wanda Girardi Castellani
|
