|
Editoriale
Che 'l sia el Nadale de tuti
De chi ga fede e de chi no ghe crede, de chi sta ben e de chi sta male, de chi ne sta intorno e de chi ga inbocà la via del non ritorno
 |
| Lu el xe vegnù par tuti, anca par sto menino brasilian che 'l ghe someja cussì tanto... (foto Ilaria Menini) |
Oncò no xe fàssile par nissun crédare, crédare che ghe xe 'ncora el Nadale, che el Signore no se ga stufà de noantri e che, al contrario, el vole 'ncora fare la storia co noantri. Co tuto quelo che sta capitando so la tera in sti tenpi, ghe vole on bon corajo a pensare al mistero del Nadale e ai tanti significati che 'ncora se porta drio sto evento straodinario par la vita e la storia de l'umanità.
Epure, i segnài de la nàssita de Gesù, i ga na sola, ùnica interpretazion: Lu el xe vegnù par tuti, par onesti e farabuti, bei e bruti, siori e pitochi, vivi e morti, cristiani o non cristiani.
Nessun pol dire "el xe mio!", parché el xe de tuti, anca de chi no fa el presepio, anca de chi no va a Messa ed dì de Nadale, de chi ga na fede difarente, de chi se ga lassà col marìo o co la mojere, anca de chi xe nà a convìvare senza averse sposà, anca de chi ga messo al mondo na creatura de sfroso, anca de chi no ga pagà le tasse, de chi ga zercà de fregare el pròssimo 'profitando de la confusion de l'Euro, anca de chi ga fregà el governo no pagando l'Iva, anca de chi ga spuà in facia a on conpagno, anca de chi ga spacià la droga che ga fato morire persone, anca de chi ga rapinà on tabachin e 'l lo ga copà par... na pipà de tabaco...
On putin, el Banbin de Betleme, el capisse tuto e tuti, no 'l condana, el perdona e el consola. Basta avere l'umiltà de sbassare la testa, de piegare on zenocio, de slongare na man, de scoltare la propia cossienza. Sarà tanto pi fàssile acòrzarse de i amici che ne circonda, capire che no ga senso èssare radegosi; sarà manco fadiga farghe i auguri a chi ne sta davanti casa e no ne saluda mai, telefonarghe a quea persona che ne jera deventà antipàtica...
La sarà l'ùnica maniera parché anca quelo de st'ano el sia un vero Nadale! Anca parché, i pol dire quelo che i vole, ma... "Natale è Natale!" No se pol dire che 'l sia un giorno come tuti st'altri, anca se vien ciaro e vien scuro, ghè calivo o scravaza... come st'altri dì de sta stajon. Drento in tel core, in chel posto, indove se ga fato el gnaro l'ànima-putina, ghe xe 'ncora on calcossa - no se sa cossa - na voja de neto e de gualivo, come na gran scoada del zélese, calcossa che te tole chel gusto da salvadeghin de st'altri giorni e te regala on senso de festa casalina.
No credo che se possa dire che questo el xe on discorso bigoto: el xe on pensiero lìbero - oncò se dirìa laico - on rajonamento tera-tera: a se danemo l'ànima parché gnancora no ghe xe stà intitolà na strada a Pier Paolo Pasolini e gnanca a Ugo Fasolo, benemèriti de la parola poètica e de la cultura, vuto che no sia el caso de fare carte quarantoto parché vègna ricordà in maniera solene la nàssita de chel Cristo che ga 'vudo el corajo de métarse contro le ingiustizie e de predicare l'ugualianza, la fratelanza e la libertà!
Semo de sta convinzion! E co sta convinzion ghe femo i auguri ai nostri letori: sentimo che i ne vole ben e che i condivide el nostro ideale, la nostra passion pa 'l dialeto che, in sto caso, el se mèrita 'ncora de più el nostro rispeto, propio parché el ne ricorda e el ne parla de i nostri "Nadài in dialeto", quei de na volta, senza tanti sluseghìi, senza panetoni de marca, senza regài de lusso, ma col cuore pien de luce e de speranza.
In sto senso... Bon Nadale a tuti!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Dissenbre:
Editoriale
Che 'l sia el Nadale de tuti
De chi ga fede e de chi no ghe crede, de chi sta ben e de chi sta male, de chi ne sta intorno e de chi ga inbocà la via del non ritorno
de Mario Klein
Ciàcole visentine
Aqua de Sandrigo
In sto paese de l'Alto Visentin ghe xe un mejaro de sortumi che forma raquanti torenti e che rende l'aria bona e neta
de Giordano Dellai
Da Thiene (VI)
El Nadale
Na ricorensa che se ripete ogni ano, portando al mondo un messagio de pace e de bontà
de Bepin Daecarbonare
|
