|
Da Thiene (VI)
El Nadale
Na ricorensa che se ripete ogni ano, portando al mondo un messagio de pace e de bontà
 |
| Poesìa del Nadale. (foto de Bruno Dalle Carbonare) |
Co l'inverno la vita de 'a natura se ga smorsà e in te i canpi e in te i boschi se ga verti grandi orisonti che prima le erbe e le rame scondéa. El fredo senpre più rigido e le noti senpre più longhe, come i ga portà via la vegetassion e convinto i osèi a migrare, cossì i ga "spinto" le bestie ne 'e so stale e i animali ne le so tane e l'omo ne 'a so casa. No ghe xe lavoro che preme e se va al canpo solo par cavar sù na pianta morta o co calche altro pretesto. In casa se tràfica tra la corte e la stala, ma sensa pressa, co distension, con fare rapossante; tuto crea un racolimento suficente.
El Nadale che xe a le porte cata in sto racolimento la so preparassion e un anbiente più propissio. Da naltri no ghe xe tante particolari tradission che lo caraterisa forse, xe stà scancelà dal tenpo. Epure gera propio l'intimità che nasseva drento le case isolà tel gran silensio de i canpi e del monte silensiose e tranquile anca lore a dare el senso fìsico de chela pase natalissia che 'desso inseguimo e ritrovemo a fadiga in te l'afanoso turbinare de i preparativi che no semo boni e che quasi senpre no podemo tirarse indrìo.
Da quatro stimane xe scomissià l'Avento, la preparassion litùrgica; i matrimoni soleni gera sospesi e se faseva riti e pràtiche de penitensa. Dopo, prima del Nadale, se faseva e se fa ancora 'desso la Novena in cesa de sera co canti natalissi e co l'anuncio de na gioiosa atesa, mentre par le strade e par le case passa i tosi a cantar la stela. La visilia, giornata de astinensa e digiuno, la pareva noiosa e grisa, la serviva a far risaltare de più la festosità del giorno dopo. La sera de 'a gran note tel spassioso camin de 'a spoja cusina se meteva a àrdare el sóco e se 'ndava in leto presto parché, in gènare, ne i nostri paesi no ghe gera le messe de mesanote.
Finalmente rivava la matina de Nadale: la cesa, za piena de gente fin da la messa "antelucana", se presentava sfavilante e sfarsosa de luci, de adobi, de paramenti, col sono de l'òrgano che intonava la vecia pastorale, co i cantori che mai stufi ralegrava co i so canti tute le messe. Te un canton ghe gera l'imancàbile, tradissionale presepio de statuete, mus-cio, gesso (pochi o gnanca un i presepi in te le case), che faseva restare a boca verta i putèi più pìcoli.
Tuta la matina de 'a festa gaveva el so centro ne 'a cesa, dove le messe (anca a Nadale ogni prete ghin dise tre) vigneva dite una drio l'altra spesso sensa interussion. Dopo, a casa, un pasto più sostansioso del sòito sotolineava la grande ricorensa: dopo magnà, tra le funsion in cesa e un più longo fermarse de i omini a l'ostarìa, l'aria natalìssia 'ndava sfumando, e se tornava pian pian al "ritmo" sòlito; cossì el Nadale gera na gran festa chieta drento al mare tranquilo del riposo invernàe.
Asterischi sul Nadale
- Ne le sere che se celebrava in cesa el rito de la Novena, ne i nove giorni prima de la visilia de Nadale, i tosi, e anca i zóvani, i 'ndava a "cantare la stela". Riunìi in grupi fissi de 3-10 parsone, i passava de porta in porta e i cantava uno de i canti tradissionài ('desso quasi tuti persi), de sòito senpre el stesso. In gènare i ciapava na sessolà de farina zala che i meteva te un sacheto, o calche palanca (moneta da 10 centesimi) da i più abienti. I più organisà e bravi tigneva alta picà te un palo na grande stela de carta velina co dadrìo na candela inpissà che la iluminava; calchedun fin che i cantava el la faseva girare assionando un mecanismo. Terminà el periodo de 'a stela, i tosi vendeva la farina e i se spartiva i schei ciapà de mancia, rotondando cossì la magra "paga" de 'e feste. A Treto, a Torrebelvicino e a Piovene se 'ndava a cantar la stela fin a la Pifanìa.
- Anca da naltri faseva aparission in passà, nel tenpo 'torno Nadale e a la fine de l'ano, "le baghe" che, passava fin in te i pìcoli paesi e contrà. Co el termine "baga" (otre di pelle) se indicava l'insieme de "zampogna e zampognaro".
- La sera de Nadale se meteva un sóco (ceppo) sul fogolare, che'l doveva restare inpissà tuta note, in maniera che la cusina restasse riscaldà pa'l Banbin Gesù. Rente 'l fogolare se pareciava pa 'l Banbinelo anca panesèi, fasse e calche pìcolo indumento.
- Durante la messa de 'a note de Nadale e in tute le altre messe del periodo nataìssio se cantava e se sonava a l'organo el motivo de 'a "Pastorela".
- I dulsi che se portava a casa par Nadale i gera el mandolato e la mostarda.
Da: Civiltà rurale di una valle veneta - La Val Leogra. (Accademia Olimpica Vicenza, 1976)
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Dissenbre:
Editoriale
Che 'l sia el Nadale de tuti
De chi ga fede e de chi no ghe crede, de chi sta ben e de chi sta male, de chi ne sta intorno e de chi ga inbocà la via del non ritorno
de Mario Klein
Ciàcole visentine
Aqua de Sandrigo
In sto paese de l'Alto Visentin ghe xe un mejaro de sortumi che forma raquanti torenti e che rende l'aria bona e neta
de Giordano Dellai
Da Thiene (VI)
El Nadale
Na ricorensa che se ripete ogni ano, portando al mondo un messagio de pace e de bontà
de Bepin Daecarbonare
|
