|
Ciàcole visentine
Aqua de Sandrigo
In sto paese de l'Alto Visentin ghe xe un mejaro de sortumi che forma raquanti torenti e che rende l'aria bona e neta
 |
| L'abitato a nord de Sandrigo visto da l'alto: se pole riconòssare i torenti da i filari de àlbari su i àrzari. |
No tuti sa che Sandrigo, oltre che del bacalà a la visentina, la podarìa èssare definìa la capitale de l'aqua. Defati in sto paese poco soto Maròstega passa i torenti àstego, Laverda e Longhela, nasse el fiume Tèsena e, soratuto, ghe xe un mejaro de sortumi (polle di acqua nascente). El paese xe situà 'ntel bel meso de quea che xe definìa "fassa de le risorgive", che da ste parte ciapa rento anca Bressanvido e Novoledo, el paese dove no a caso parte l'aqua che va a 'provigionare na bela feta de la provincia de Padova.
Al dì de uncò i sortumi de Sandrigo i xe senpre manco, ma no i xe sparìi dal tuto, parché, par dìrghine una, a sta stajon 'nte la zona de i Bojaroni a Lupia (na frassion de Sandrigo) continua a èsserghe chela nebieta formà dal fenòmeno de l'aqua che se intèra 'ntel suolo càrsico de l'Altipian de Asiago e, dopo 'vere corso sototera par raquanti chilòmetri, spunta fora calda qua a Sandrigo e la se scontra co na tenperadura parecio pi freda. Lì vissin na contrada nova xe stà ciamà "Via delle Risorgive", par dire come anca l'aministrassion comunale ghe tien a sta bonbana de aqua.
Go za contà da ste pàgine de chel progeto che tendarìa a fare de palasso Mocenigo a Lupia la sede de un centro europèo de studi sul fenòmeno de i sortumi. N'altra bela inissiativa, portà a tèrmine co el contributo fondamentale de Provincia e Region, xe stà el percorso naturalìstico che coverze i primi do chilòmetri del fiume Tèsena, fin a la confluensa col Laverda, 'ndove fameje, scolaresche e amanti de la natura fa quatro passi in mezo al verde.
Ma tute ste manifestassion de amore verso l'anbiente de Sandrigo no pole scòndare na gran verità: gnanca qua 'desso no ghe xe pi la gran quantità de aqua che ghe gera fin 30-35 ani fà. Chi ga suparà i "anta" se ricorda 'ncora che in tanti fossi 'desso sechi na volta se noava e se pescava, anca i sortumi gera tanti de pi de 'desso. Serto, 'lora le brentane faseva pi paura e anca el fen 'nte i canpi serte volte faseva fadiga a secarse par via de i sortumi che sul pi belo spuntava in mezo al canpo e costringeva el contadin a portare el racolto su i colmi par farghe ciapare el sole.
Ma a considerarli tuti, xe pi i dani de i vantagi che sto abassamento de le falde aquìfere ga portà 'ntel nostro anbiente. 'Desso da pi parti se prova a taconare i sbali del tenpo passà, come par esenpio la cementificassion de i leti de i torenti o el tajo de i àlbari su i àrzari. No resta altro, 'lora, che inpegnarse tuti quanti par rancurare l'aqua, "oro blu" del nostro pianeta.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Dissenbre:
Editoriale
Che 'l sia el Nadale de tuti
De chi ga fede e de chi no ghe crede, de chi sta ben e de chi sta male, de chi ne sta intorno e de chi ga inbocà la via del non ritorno
de Mario Klein
Ciàcole visentine
Aqua de Sandrigo
In sto paese de l'Alto Visentin ghe xe un mejaro de sortumi che forma raquanti torenti e che rende l'aria bona e neta
de Giordano Dellai
Da Thiene (VI)
El Nadale
Na ricorensa che se ripete ogni ano, portando al mondo un messagio de pace e de bontà
de Bepin Daecarbonare
|
