|
Vita contadina de na volta
Al tenpo del "fare canpanèa"
"Ogni pan ga la so crosta", dise on vecio proverbio, riferéndose a la fadiga che se fa par guadagnàrselo. La xe 'na realtà, ma se 'ndemo a vardare a la vita che ga fato i nostri veci, ai contrati de la tera e de lavoro de i nostri avi contadini, se rendemo conto che la crosta del nostro pan xe tanto, ma tanto pi tènara.
'Na volta, la vita in canpagna la gera regolà, par dirla a brasso, cussì: se 'l contadin gaveva on fià de palanche el se toleva "in afito" 'na pìcola cesura che podeva èssare al màssimo de 3,86 etari (pari a circa 10 canpi padovani - on canpo padovan corisponde a 3.862,5 metri quadri). So sto tòco de tera, el contadin có 'l gaveva pagà l'afito, gera come che 'l fusse paron, e se i ani 'ndaseva via puìto, se no 'l ciapava la tenpesta, el riussiva magnare e anca métarse via on franco.
'N'altra forma de contrato la gera quea de lavorare la tera "a parte", o "a on terso". Cioè el paron ghe dava al contadin la tera za arà e semenà, parché de sòlito el poareto no 'l gaveva né vache e né varsuro e tanto manco schei par pagare i òmeni che ocoreva par semenare: el contadin, insoma, el gaveva "solo" da coltivare la tera. Se par esenpio vegneva semenà formenton, el gaveva da saparlo, s-ciaresarlo, simare, sfojare e infine sunare. 'Na volta rancurà le panocie, do tersi del racolto 'ndava al paron e 'na parte restava a elo. Se 'l racolto vegneva abondante (fusse stà ua, fromento o altro) el contadin vansava par magnare, senò la gera fame par elo e la so fameja.
'N altro contrato de afito el gera queo dito "a rose e spine" o anca "a fogo e fiama". In sto caso, paron de la tera e fituale faseva el contrato che indipendentemente da come fusse 'ndà el racolto la cifra da pagare gaveva da èssare quea patuìa a la stìpula. Se la 'ndava ben, 'na ridadina, se la 'ndava male 'na gratadina. El contrato, par ste règole feree, vegneva dito anca "dei pati leonini".
'N'altra forma de afito gera quea dita "scosso o non scosso". De sòlito, so sto tipo de afito faseva da intermediario tra paron e contadin on fatore. El fatore toeva in afito par 'na certa cifra la tera e dopo, guadagnàndoghe, el la riafitava al contadin. A fine ano, "scosso o no scosso", el fatore gaveva da conparire co i schei al paron anca se 'l contadin no lo gaveva pagà. Qualche volta capitava de catare on fatore disonesto, che có 'l faseva el contrato col contadin el ghe domandava pi schei che 'l podeva par guadagnare el màssimo e, a fine ano, có gera ora de pagare el paron el 'ndaseva contarghe che 'l contadin no lo gaveva pagà, che 'l racolto gera 'ndà male... on saco de storie par darghe manco schei possìbile. Ghe gera on dito: "Fammi fattore un anno: se non divento ricco, mio danno".
Dopo aver parlà de i magri contrati de la tera, 'demo a vardare come che gera i acordi de i bracianti agricoli. De tuta la categoria de i lavoratori agrìcoli, el boaro che 'ndaseva drio a le bestie, el stava mèjo de tuti, el gaveva la paga pi alta, el gera rispetà e tratà ben. Dopo del boaro vegneva l'òbligo, o servitore, co la paga pi bassa ma lavoro fisso, e 'l podeva, secondo i acordi, vìvare a casa del paron opure a la sera tornare casa sua. Pèso de tuti i gera quei che 'ndava a òpera, cioè quei che lavorava a giornata, in raporto al lavoro che ghe gera. A questi capitava de le volte de 'ndare lavorare e de èssare mandài casa, parché gera bruto tenpo o parché qualche altro pi poareto, par manco schei gaveva ciapà el so posto. A sti pori desgrassiài, de sòlito co fameja numerosa, có i tornava indrìo no ghe restava altro che torse sù la sporta, on sachetèo e 'ndare par carità. El sachetèo, ghe serviva se qualcun ghe faseva la carità de na scoèa de farina e có gera sera calcossa i portava casa.
Testimonio de quela vita contadina xe stà anca me mama, classe 1910, che fin da tosatèa, diese-dódese ani, la gaveva scomissià col bigòlo in spala e do sece de legno pasantìssime, a portarghe da bévare ai òmeni che lavorava so i canpi, par dopo, pi grandeta, continuare ela stessa chea vita.
La me contava che el lavoro so i canpi 'ndava da on sole a l'altro: se scumissiava quando da i canpanìi le canpane sonava l'Ave Maria del dì, poco prima che levasse el sole, e se finiva al son de l'Ave Maria de la sera, có 'l sole 'ndaseva zo. Gera uso, có i sonava a la sera, fermarse e dire le orassion par le àneme del purgatorio. El contrato de lavoro anuo, 'ndaseva da on San Martin (11 novenbre) a l'altro. Quando vegneva fato el contrato de la paga, se tegneva conto con o sensa vin, cioè quei che voleva na scoèa de vin, parché magari a casa no i ghe n'aveva, tirava manco paga de i altri. Dal 25 aprile (San Marco) al 16 agosto (San Rocco), có le giornate gera pi longhe, al dopo mesodì se se fermava on quarto d'ora, venti minuti, par "fare canpanèa". Có sonava la canpanèa, de sòlito picà so 'na colona de la barchessa, se faseva el spuntin. Ghe gera 'na filastroca che diseva: "San Marco da la scoèa, San Marco dal bocàe, l'aqua me fa mae, el vin me fa cantar" e dopo... "San Roco, San Rocheto, porta via el paneto". I magnari de la "canpanèa" gera vari. Quei che più podeva magnava on tòco de pan e formajo o salado, e on par de goti de grinto, pataresco, bacò, ecc.; i pi poareti, poenta co 'na crosta de formajo, o siola consà co l'aséo, o on fià de lardo o l'imancàbile polenta co qualche fruto de stagion... bronbe, àmoli, armelini e aqua. Me ricordo che me mama la me diseva che, có i 'ndaseva torse el fagotèo de magnare, 'assà a l'onbra soto on upio o so 'na sóca, i lo catava, de le volte, tuto pien de formighe, ma la fame gera tanta: on par de supiadine par parare via le formighe e via zo, "queo che no sòfega, ingrassa!" La me contava che quando che la portava l'aqua: stessa secia, stesso minestro o cassa par tuti. Ghe gera tra i òmeni quei che cicava (mastegava tabaco) e quando che i beveva i 'assava so 'l menestro 'na lea maronsina che 'ndaseva via quando el menestro vegneva ributà in aqua. I ùltimi tra pajole, mussati, fili de erba e "maronsin"..., diosacossa che i beveva! Có la me 'o contava, la se schifava oncora.
Tanti ricordi, storie de tenpi passà, par on verso bei e tranquili a confronto de la vita stressà de oncò, ma par altro verso, speremo che no i torna più.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Deventaremo minoranze?
No ghe xe dubi... se continuaremo a rinunciare, volontariamente, ai nostri pi grandi valori: religion, lingua, cultura...
de Mario Klein
|
