|
Tradission pasquali
Schizeta a tola
 |
|
Scóltame, barba. Ieri matina passando par Piove de Saco, me so' fermà al marcà dove ghe xe una de quele garavane longhe, atressàe par la vèndita de gènari alimentari, che ga de quei formaji de montagna e de quei saladi nostrani che, butàndoghe l'ocio, te fa vegnere l'alcolina in boca. Sicome, fra l'altro, se conpra anche ben, me so' tolto na bela ponta de grana con poca crosta, mèsa tosela fresca e un salameto da tajo. Fin che la fémena m'inscartossava la roba pesà e me faseva el conto, so marìo se rufianava con mi, sercando de tacarme un pochi de ovi. "I xe de casa, freschi, tuti de galina Polverara, de quei co la scòrsa dura. Védelo, zovanoto, che colore scuro che i ga? Volendo, se pole fare la schizeta el dì de Pasqua. El me scolta mi, el ghe ne toga na dosena ca gh'i dago a presso bon." Lo go scoltà e ieri sera me so' fato na fortaja rognosa che go fato nosse. 'Desso, però, scùsame s'a te ciapo cossì de strangolon. Me piasarìa savere, se te poi contentarme, cossa che xe sta schizeta mensionà da l'anbulante.
Mariavèrgola, stanote te sarà dà fora na paca de riscaldo su la lengua! Come gheto fato tegnerte drento fin 'desso sta curiosità? Caro fiosso, semo soto Pasqua. Mi ca go vissùo na vita in mezo ai sgrèbani, me vien 'ncora fàssile ricordarte che fra la zente de canpagna, par usanse incarognìe dal tenpo, la Resuression gera anunsià, oltre che dal lunario, da tuta na serie de rituài, sacri o profani ch'i fusse, rispetài quasi fin tuta la metà del secolo passà. Se trata de na stìrola de segnài che vegnéa, par lo più, dal risvejo de la natura, da i osèi che se faséa el gnaro, dal slongarse de le ore de sole e de conseguensa da le galine che fedava ogni giorno. Se diséa a propòsito: "Buta foje in aprile anca el mànego del baile."
Donca l'abondansa de ovi te le fameje contadine gavéa sugerìo l'abitùdine, te la Setimana Santa, de na questua pa 'l pàroco del paese che, senpre fora par la frégola có se tratava de tirar casa calcossa, el mandava in giro pa 'e corte i zagheti a rancurare suso le oferte, par la verità senpre generose. Infati in chei ani là squasio "gnissun faséa piànzare la zerca par la cesa." Però i boce, che coréa cofà de i vissinèi, co ste seste piene de ovi in man balorde, capitava pi de calche volta, strada fasendo, che i ghe ne ronpesse raquanti. Anca da la farsora magnànima del prete che frizéa pa' i poricani xe nata l'usansa de fare le fortaje fora el dì de Pasqueta, inprovisando sfogaràe su i pra. Invesse la più parte de i ovi che rivava in canònica intieri, el prete la vendéa, ciapando un franco da menare in gita i tosati che lo jutava a servire la messa e le funsion.
Segnài de spalpagno par la Pasqua in arivo se snasava ben te le case contadine da la voja de neto e da i laori de pulissìa inpiantài a fondo, soratuto in tinelo (par chi lo gavéa), dove se pareciava la tola pa 'e feste grande e ne le càmare da leto co 'l canbio de i nissòi, de le forete e de le coltrine. Su la cardensa in cusina vegnéa steso un centro de lin ricamà a unsineto, con sora un pitaro pien de pasqualoti in fresca, quei giasòi zali che sbociava in stajon drio i fossi, fiori salvàdeghi che no savéa da bon ma i faséa un bel védare.
Ricordo che la sera del Zoba Santo, dopo che gera stà ligàe le canpane in segno de luto par la morte del Cristo, le triste funsion religiose, che se svolséa 'torno un catafalco querto de veludo nero co 'e franze zale, vegnéa repejàe calche ora prima drio le strade del paese, tanbarando co na ràcola, ossìa un tòco de tola bislongo sagomà a la bona, co la so inpugnadura da una de le testaure pi strete. Da tute do le bande ghe vegnéa tacà do màneghi de bandoni incurvài aposta e ciapài de sbingolon co do ocèi a vida. Sachetando, l'agejo el faséa quel strèpito che servìa da segnale par invitare i parochiani in cesa.
La funsion del Vènare Santo, mesta giornada de rigoroso rispeto con astinensa e digiuno, roto solamente a mezodì co un piato de bìgoli in salsa e na tasseta de aqua, se concludeva pa 'e contrà del centro paese con la procession de i ciareti. S'inpissava su i balcuni tanti mocoleti, ficài t'un pugneto de sémola o de segaura, drento de i vaseti incolài con carta oleà de difarenti colori e ogni fedele ghe ne tegnéa in man uno saldà su un mànego de legno.
Al sabo matina, par l'ora del Gloria, i molava le canpane e tuti coréa al canale a sgiansarse i oci, un segno devoto che portava bon a la vista. La doménega, finalmente, tuti in spadina a messa solene in terso, cantà dal coro parochiale. Ognun gera tapà con calcossa de novo: chi la còtola, chi la giacheta, chi el capelo e chi le scarpe. Sinò che Pasqua gèrela! Però capitava spesso che calchedun tornava casa anca co 'e vessìghe te i pìe, par no 'verle messe prima. Dopo, tuti a disnare, 'torno la tola parecià co la tovaja de lin inamidà e i cussinèi su le careghe, magari par covèrzare i sentari de carzina fruài. Da la cusina rivava de quei profumi de pita rosta o de agneleto da late al forno co le patatine, da fàrghene na voja, se i s'intardigava na s-cianta. Quela de copare l'agnelo gera n'antica usansa ebrea, ispirà da la volontà de Mosè, che prima de bandonare l'Egito, el ga ordinà a tute le fameje de sacrificare un piegorin zóvane e de bagnare col sangue i portài d'entrata ne le case. Riverente segnale de riferimento a l'agnelo de Dio, ne la note tremenda che xe stà copà tuti i putèi egissiani primi nati, sparagnando i fiòi de i ebrei che gavéa segnà le porte col sangue.
A fine pranso, dopo 'ver suponà tel goto de vin dolse, cavà aposta dal bojo 'vanti che 'l deventa duro, un paro de fete pasqualine 'ncora calde su la scartà, rivava in tola na sesta de ovi duri, fati bójare co na strasseta colorà par farghe ciapare un fià de colore. Tuti se serniva el so oveto, i ghe tastava la duressa del sgusso batendo pinpianelo la ponta su i stèfani da sgarbo. Se 'l tegnéa saldo, e ghe voléa recia bona par capirlo, el gera quelo giusto par sfidare a schizeta quei che vegnéa soto. Par vìnsare, ponta co ponta, se dovéa rónpare l'ovo de l'aversario, salvo che no fusse stabilìo prima de fare anca cula co cula. In te sto caso se la cula no resistéa se faséa pata e no vinséa gnissun de i do. L'usansa de scossare in fameja, in serte zone del Polesine e del Trentin, gera na tradission paesana che el dì de Pasqua tirava in piassa a far coàre, schizete e comarò un fraco de zente 'torno le seste de le ovarole, (a Caldes-TN se usa 'ncora 'desso). Se vedéa sul liston serti cefi de Juda Scariota che vegnéa da foravìa, sensa arte né parte, capassi de tirare la boca e molare calche sganasson se no la ghe 'ndaséa drita co 'l quajo da spenare. Có el bòssolo s'inturbiava in bàgoli del gènare, gera mèjo catàrsela a le svelte.
Grassie, barba, doménega vegno torte e vojo che femo schizeta anche mi e ti.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Deventaremo minoranze?
No ghe xe dubi... se continuaremo a rinunciare, volontariamente, ai nostri pi grandi valori: religion, lingua, cultura...
de Mario Klein
|
