|
Editoriale
Deventaremo minoranze?
No ghe xe dubi... se continuaremo a rinunciare, volontariamente, ai nostri pi grandi valori: religion, lingua, cultura...
 |
| Sarà ben che tuti se 'bitua... a fare la so fadiga. |
Disemo sùbito, tanto par capirse, che, le riflession che 'ndemo a fare, no le intende robarghe el mestiere a polìtici, sociòlogi, educatori o porporati: femo solamente de le considerazion, in base a quelo che, pinpianelo, xe drio deventare on sistema de vita, a nostro aviso, preocupante.
Intanto, semo d'acordo che el mondo el xe na bala rotonda e che, ogni tanto, on pochi de quei che ghe sta par sora, a causa de tante cause messe insieme, na volta i se sposta de là e na volta i se sposta de qua. Ne l'uno e ne l'altro caso, nasse senpre on insenbramento, on ingatejamento de òmeni, de condizion econòmiche, sanitarie e sociali difarenti, de tradizion religiose, de linguagi e de règole de vita ben consolidà.
Al primo entro, xola s-ciantisi ne l'aria! E 'lora qua ghe vole calma e gesso par ciapare in man na situazion che no la xe de le pi fàssili: ocore pazienza, bona volontà e tanto bon senso: tute virtù che no ga da èssare scanbià par deboleza o rinuncia, come ne pare che staga sucedendo qua. Questo ne preocupa!
Davanti al grave problema de l'imigrazion, regolare o iregolare, semo drio dare na risposta che forse no la xe propio adata. Xe vero che sti pori desfortunà i ga da èssare aiutà a integrarse col pòpolo che li ga acolti - che semo nialtri - ma no i pole domandarne, anzi pretèndare che se canbiemo nialtri al posto de lori. Se uno el viene da on Paese caldo e el riva qua dove semo a soto zero, ghemo da darghe quelo che ghe ocore parché anca elo el se coerza, e no che se metemo a pèto nudo noaltri... in nome del vegnerse incontro!
Ghemo scomizià co la storia del 'via el crocifisso da le scole e da i tribunài', gnente presepio a Nadale, presto che bisogna tirar sù le moschèe, basta l'ora de religion catòlica ne le scole (colpa tuta nostra!), sì a lezion de cultura e lingua araba ne le elementari, frequentà da putèi de cultura islàmica... Questa no se ciama pi integrazion, questo xe el primo passo (o 'l secondo o 'l terzo) verso la costruzion de ìsole sociali e, da parte nostra, verso la rinuncia de la identità italiana e vèneta, a favore de minoranze che no se contenta de otegnere el rispeto de i diriti, ma che anzi vole inpore a nialtri le so règole!
Ciapemo solo la question de la cultura stòrica e de la lingua vèneta: semo vèneti, ma no podemo entrare uficialmente ne le nostre scole, parché ghe xe sia studenti e sia insegnanti che ga orìgini diverse. Al contrario, stando a quanto ne risulta, da marzo de sto ano viene fate lession de cultura e la lingua araba ne le elementari de le province de Padova, Vicenza, Treviso e Verona.
Questa la ne pare na grossa contradizion, dinanzi a na necessaria, sia pur lenta, integrazion e conossenza, principalmente, del teritorio de acolienza. In sto modo se parte dal basso par creare ìsole e minoranze. Conpresa la nostra pròssima ventura!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Deventaremo minoranze?
No ghe xe dubi... se continuaremo a rinunciare, volontariamente, ai nostri pi grandi valori: religion, lingua, cultura...
de Mario Klein
|
