|
Editoriale
Basta co sta violenza!
Se stemo 'bituando a tuto, anca al pezo. Na volta, anca na sola nùvola scura in celo ne anunciava el tenporale in arivo. 'Desso... no ghe femo pi caso...: sarà quel che sarà!
On toso tira zo da le spese so pare e so mare, na mama se tole la vita insieme ai so do putini, on omo e na dona i massacra quatro persone vissine de casa... Te ghe ne parli co chi ghe sta lì tacà, o con quei de fameja, o de i conossenti e la risposta la xe senpre la stessa: "Ah... na parsona par ben, on toso tranquilo, na dona normale, na fameja a posto, mai dà segni de gnente... Chi lo gavarìa dito... robe de l'altro mondo! No ghe xe stà mai gnente da dire... persone gentili... le staséa so le sue, ma le saludava senpre..." Insoma... mai gnente che podesse far prevédare na violenza cussì granda.
Ma... sul serio no ghe jera gnente de strano? O pitosto noantri no semo pi portà a vardare, e se vardemo no ghe bademo, parché no ne intaressa, no le xe robe che ne riguarda... Opure, magari, sì, calcossa ne ga parso de védare... ma ghemo preferìo far finta de gnente...: "Par carità... che dopo no ghe sia da dire..." e no ghe n'emo parlà co nissun.
Quanti genitori xe che i sa che so fiolo el xe on violento, ma i spera de tegnerlo calmo ciapàndolo co le bone. E guai che qualchedun no 'l s'inventa de dirghe che fora casa sto toso no 'l xe on stinco de santo: i xe pronti a difèndarlo.
Zerto: on estraneo el le vede prima d'i altri le robe che no va. Basta nare in casa de na fameja par capire al volo che tra marìo me mojere ghe xe... alta tension; opure vardare in facia l'automobilista che te ghè 'pena tanponà: i so oci de fogo i te dise tuto quelo che el xe pronto a farte, se solo te te permeti de vèrzar boca. No se pole dire che questi no i sia segnali de alarme de na violenza pronta a scopiare!
Stando cussì le robe, tuti i giorni, có nemo fora casa, ris-cemo de catarse vìtime de violenza de ogni gènere e de ogni colore; vìtime de na socetà che ghe dorme sora a sti problemi e che ghe fa senpre manco caso, parché se xe difusa na idea paradossale de la vita, che ormai la vale gran poco, par no dire gnente.
E spesso semo davanti a na violenza tuta nostrana, che xe el risulato de na moralità finìa in frantumi, insieme a l'idea de giustizia, de fede e de obietività.
I deliti, da quelo del pìcolo Tommy al massacro de Erba, xe el risultato de na situazion che pegiora de giorno in giorno, parché semo na socetà che dorme, che ghe passa sora a tuto. Cussì cala la fiducia ne le istituzion e questo fa on gran male al vìvare civile.
No xe certo de bon esenpio gnanca le ùltime esecuzion a morte, anca se se trata de persone che no ga mai rispetà la vita. Sarià stà mèjo condanarle a vìvare fin che no ghe sarìa rivà el rimorso a rosegarghe l'ànima.
Cossa podemo fare, nel nostro pìcolo, par no sentirse in colpa, davanti a tuta sta violenza? Tegnere i oci verti, alta la guardia e denunciare, prima che na discussion, on ràdego, na barufa se trasforma in tragedia.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Basta co sta violenza!
Se stemo 'bituando a tuto, anca al pezo. Na volta, anca na sola nùvola scura in celo ne anunciava el tenporale in arivo. 'Desso... no ghe femo pi caso...: sarà quel che sarà!
de Mario Klein
Salute
Urgensa o emergensa: 118
de Mario Galdiolo
|
