|
Da la Marca
I Tenplari a Treviso
 |
| Afresco tenplar ne la cesa de San Gaetano. |
El sucesso mondial de i romansi de Dan Brown ga risvejà l'intaresse de i stòrici par le vicende tràgiche e gloriose de l'Ordine conbatente de i Cavalieri del Tenpio de Gerusaleme dove che jera la so casa madre.
Xe vegnùo fora che la Marca Trevisana ga avùo 'gran inportansa ne la difusion da 'sta forma de monachesimo militante par vari motivi: prima de tuto el so teritorio controlava le vie da le Alpi al mar e quindi le strade de i pelegrini che jera soto la protession de l'órdine e po' un gran nùmaro di nòbili trevisani jera entrài ne i so ranghi, par esenpio i Ezelini, i Caminesi e soratuto i Collalto che xe stai anca par verie volte tesorieri o precetori. In Italia Treviso la jera precedùa par inportansa e nùmero de mansion tenplari solo da la çità de Pavia e ghe jera insediamenti de tenplari sia drento che fora de le mura de la çità medieval... La domus çitadina la sorgeva viçin a la cesa e a la porta de San Tomaso Becket, uno de i patroni de i tenplari e la possession la rivava fin a l'atual cesa de San Gaetano che la conserva ancora i segni de la presensa de i "frati rossi" come che i vegneva ciamài dal pòpolo par el color scarlato del so mantelo da conbatimento. Su i muri interni de la cesa e del canpanil se podeva védar, prima che el posto el diventasse pericolante, i resti de afreschi co ritrati de dignitari e prelati de l'órdine. La legenda la vol che da San Gaetano partisse 'na galeria soteranea che, passando soto el Sil, la rivava in aperta canpagna in località Spineda, dove che se ga svolto el famoso tornèo del Castel d'Amor che ga provocà 'na guera fra Venessia, Padova e Treviso. Finora però le ricerche efetuàe le ga documentà solo la presensa de un çimitero tenplar soto i masegni de la piassa davanti la cesa.
La mansion pi inportante fora çità la jera la "domus de Campanea" che xe stada identificada col sito atual de Tempio a Ormelle, dove che se pol amirar anca unquò 'na stupenda cesa co portego tenplar in riva al fiume Lia dove che nel passà la controlava i tràfici fluviali.
El dominio de i "frati rossi" el ga lassà trace linguìstiche evidenti, come i toponomi "granza" e "granzetta" che indicava i depositi de i prodoti che i monasteri-fortessa i aministrava par finansiar l'organizassion.
In canpo onomàstico se segnala i cognomi Granziol, Granziero e Granzotto che indicava i guardiani o i gastaldi de 'ste masserìe.
Ne le vece cese de Dosson e Casier fin al sècolo passà se vedeva ancora qualche làpide che ricordava l'originaria apartenensa ai possedimenti tenplari che controlava la via Zermanesa che colegava Treviso a Venessia prima che vegnesse costruìo el Terajo.
Anca tante cesete e oratori dedicài a la Madona, San Giovani Batista e San Giacomo i xe de orìgine tenplare; el pi famoso el xe l'oratorio canpestre de la Madoneta sul Storga a Treviso, che sul muro lateral la mostra ancora la crose tenplare e giovanita, insieme al ricordo del gran bonbardamento del 7 april 1944 che ga copà tanti putèi, sepolti in un çimitero viçin.
Ultimamente un grupo de apassionài, stòrici e volontari se ga inpegnà par otegner i permessi e trovar i finansiamenti par el restauro de la cesa de San Gaetano prima che l'incuria de le autorità la fassa sparir testimonianse pressiose.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Basta co sta violenza!
Se stemo 'bituando a tuto, anca al pezo. Na volta, anca na sola nùvola scura in celo ne anunciava el tenporale in arivo. 'Desso... no ghe femo pi caso...: sarà quel che sarà!
de Mario Klein
Salute
Urgensa o emergensa: 118
de Mario Galdiolo
|
