|
Da Adria (RO)
El tronbon
 |
| Mi madre la ghe daseva na bela lustrà col Sidol, sichè 'l strumento el gheva senpre 'n odorin tra l'agrin e 'l metilico... |
La passion de la musica, quando che mi padre el staseva a Santa Maria, i ghe l'eva tuti: i jera de più quìi ch'a saveva sonare, che quìi boni de scrìvere. Perlopiù i sonava strumenti ch'a se podesse portare in giro fassilmente: clarin, sassòfono, viulin, tronba, tronbon e cussì via, anca parchè de sòlito i sonava in banda; gh'jera parfin uno ch'el sonava l'otavino, cussì el faseva manco fadiga de tuti a portàrselo drio. Tuti i musicanti i gheva la so divisa co i botun dorati quando ch'i sfilava o quando ch'i montava sul palco.
Có l'è vegnù a stare in Adria no 'l podeva più èsser presente a tute le manifestassion de la so banda, però no 'l mancava mai par la festa de Santa Cecilia e par el 4 Novenbre, anca parchè ghe pensava Trìpuli a tegnèrghelo in mente. In Adria gh'jera parici musicisti co relativo diretore d'orchestra, sì, parchè qua in cità no gh'jera la banda ma l'orchestra. Fra i sonadori gh'jera i professionisti e i diletati, ma quando ch'a gh'jera la stagion de le òpere i se radunava tuti; el mestro Donà el li ciamava par far sù l'orchestra e po el scuminsiava a farli provare. Qualche giorno prima de la rapresentassion rivava el diretore d'orchestra famoso e se faseva do tre prove fin a quela generale, cussì i jera tuti pronti par métere in sèna el spetàcolo.
Tute le volte che mi padre el gheva 'n inpegno de sto gènere el tirava zo dal granareto el so basso tuba, 'n afare grande squasi come mi. Mi madre la ghe daseva na bela lustrà col Sidol, sichè 'l strumento el gheva senpre 'n odorin tra l'agrin e 'l metilico, tuto particolare, ch'el se sfantava, par fortuna, int'el giro de qualche giorno. Alora, par na stimana e anca de più, có mi padre serava botega, el tornava a casa, el se meteva in tinelo e 'l scuminsiava a far tronà par - el diséa lu - fare el lavro e i déi: na sonadina prima de sena e n'antra dopo. Man man che s'avissinava i giorni de le prove con l'orchestra e d'i spetàcoli al Comunale - alora el se ciamava Teatro del Littorio, dato ch'el jera stà fato per l'interessamento direto de Marinelli, un pèsso grosso int'i ani boni de l'Era Fassista - le sonà in casa le cresseva: una a mesogiorno e do a la sera. E mi padre 'l se godeva un mucio quando ch'el vedeva sul manifesto de l'Opera "50 professori 50" - parchè dentro el gh'jera anca lu - e de più 'ncora quando ch'el se sentava int'el golfo mìstico propio su l'ùltima fila a destra. Tute le volte ch'el vegneva fora da teatro dopo na rapresentassion a chi ghe domandava: "Com'ela 'ndà stassera?" "Cossa vulìo, el povaro Cavaradossi l'è morto disparà..." se s'jera recità la Tosca; có se rapresentava el Rigoleto el diséa prima ch'a se scuminsiasse: "Stassera metemo el gobo in sèna..." opure: "La povara Mimì la ghe lassa le strasse..." pa la Boheme. E per ogni spetàcolo el gheva la sua.
Càpita na volta che inte la sòlita fase preparatoria mi madre la ga l'inpression ch'el tronbon el sia massa sporco, gh'è de le macete de mufa in qua e in là, i tubi i ghe pare un tantin massa ofegà, insuma la ga l'inpression ch'el sia massa onto par la sòlita lustradina co Sidol, strasseta e ojo de gunbio. La ciapa el strumento, la va al canale - che alora el gheva na bela aqua bianca, trasparente e corentiva - co 'n spugnato de sabia e sguassà abondanti la lo lava ben, tanto che la lo riporta a casa lustro e sluseghente ch'a se s'inspeciava. Mi padre có 'l lo vede el ghe fa i complimenti e po el lo ciapa in man. Al primo supioto vien fora na sgorgonà d'aqua e dopo de chele note strossà e tremolanti che l' à ciama sùbito mi madre: "Cossa gato fato a sto tronbon?" "A go solo dà na bela netà, parchè el jera inledamà ch'el faseva schifo." "Sì, lo vedo anca mi che l'è belo lustro, ma come ato fato?" E intanto che ela la ghe spiegava lu el ghe diseva sù, coverzédola de le ofese del so repertorio, indove che la pèso parola la jera "sumarona" e co un fraco de passiensa el s'à messo a sugare, supiare, vèrzere vàlvole, fin che l'à svodà tuta l'aqua ch'a gh'jera dentro. E mi mama l'à inparà ch'el tronbon no 'l se pole lavarlo al canale.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Basta co sta violenza!
Se stemo 'bituando a tuto, anca al pezo. Na volta, anca na sola nùvola scura in celo ne anunciava el tenporale in arivo. 'Desso... no ghe femo pi caso...: sarà quel che sarà!
de Mario Klein
Salute
Urgensa o emergensa: 118
de Mario Galdiolo
|
