|
Zente de Padova
Giorgio Abetti
 |
| El prof. Giorgio Abetti. |
Fra la zente che mèrita de èssar ricordà, nata qua a Padova, ghe xe na persona che ga dà lustro a l’Italia, oltre che dentro i nostri confini, anca a l’èstero.
Giorgio Abetti, nato a Padova el 5 otobre 1882, el se ga laureà ne la nostra Università nel 1904 in Fisica. Nel 1906 el xe ’ndà in Germania per studi de perfessionamento presso i Osservatori de Berlino e de Heidelberg. Ma el ga da ’ver vudo el spirito del giramondo o èssar mato pa la so materia, parché nel 1908 el se ga trasferìo ne i Stati Uniti ’ndando prima all’Osservatorio de Yerkes e dopo a quelo de Mount Wilson. Durante sto periodo "americano" el se ga dedicà a la astrofisica co P. Fox e Giorge E. Hale. Xe stà el periodo de l’osservassion de i sateliti de Saturno, de le protuberanse solari e a la misura de i "parallassi stellari".
Quando nel 1909 el xe rientrà in Italia, el xe stà nominà "Assistente presso l’Istituto di Fisica Terrestre" a Napoli e nel 1910 el xe stà nominà "Assistente all’Osservatorio del Collegio Romano". Nel stesso ano el ga ciapà la libera docensa in Astrofisica a Catania. Nel 1913 el xe deventà "Astronomo Aggiunto".
Verso la fine de la Prima Guera Mondiale el ga vudo l’ocasion de èssar nominà "Addetto militare" presso l’Ambasciata Italiana a Washington.
In sto modo el ga vudo la possibilità de riprènder i contati co i astrofisici americani e conpletare un progeto par realizare un osservatorio astrofisico a Arcetri, dove che nel fratenpo, e semo nel 1920, el se gheva trasferìo.
El Professor Abetti, a sto punto, el gera deventà na personalità conossùa nel mondo sientifico internassionale al punto tale che el ga possùo otenere fondi par la costrussion de la tore solare de Arcetri (la prima in Italia, e se tratava de un edificio par l’osservassion del sole che podeva isolare el percorso de i raggi solari da l’assion del vento e de microsismi) da la Fondazione Hale e da la "National Science Foundation".
Deventà Astronomo nel 1924, nel 1925 el ga vinto el concorso par la Catedra de Arcetri dove ch’el xe restà fin al 1952, ano del so colocamento a riposo. El ga direto le spedission sientifiche del 1936 in Siberia e del 1952 in Sudan, dedicàe a l’osservassion de le eclissi solari.
La so produssion sientifica la xe assai vasta e squasi tuta dedicà a l’astrofisica. No xe possibile citare tuti i so libri, ma solo come esenpio ricordaremo "Il Sole" del 1936, "Le stelle e i pianeti" e "Amici e nemici di Galileo" tuti do del 1945, "Storia dell’astronomia" del 1949, "Astronomia e astrofisica" del 1956, "Esplorazione dell’Universo" del 1959.
El ga scrito tanti articoli su "Sapere", su "Luce e Immagini", su "La Stampa" tuti dedicài a la divulgassion de l’astronomia.
Nel 1929 el ga vinto el Premio Reale dell’Accademia dei Lincei, nel 1937 el premio Janssen. El xe sta Presidente de l’Istituto Nazionale di Ottica e menbro de l’Unione Astronomica
Internazionale, de la quale el xe stà dal 1948 al 1955 Vice-Presidente Generale.
A lu e a so popà Antonio Abetti, pure astronomo, xe stà intitolà un cratere lunare, scoperto nel 1977.
Giorgio Abetti, càrico de onori e de gloria a livelo internazionale, el xe morto a Firenze el 24 agosto 1982.
Da chel poco che go scrito, se pol capire comunque che se trata de na figura de siensiato de grande valore e despiaze che no ’l sia par gninte conossùo da la so zente, da i so consitadini, che quando che i passa par via Abetti (parchè la ghe xe la strada col so nome!) no i sa gnanca chi chel sia.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Massa ciàcole in piaza...
La proposta de lege ’pena aprovà dal Consiglio Regionale del Veneto la xe na roba seria e inportante, ma se ga l’inpression che su la carezà del dialeto sia spanìo on futìo de papàvari che fa bela vista... e basta!
de Mario Klein
Cultura visentina
La Beata Giovanna Bonomo
La vita de la mònaga bassanese, nata 400 ani fà, ga ispirà na mostra a Palasso Bonaguro, che xe verta fin el 10 giugno pròssimo
de Giordano Dellai
|
