|
Editoriale
Massa ciàcole in piaza...
La proposta de lege ’pena aprovà dal Consiglio Regionale del Veneto la xe na roba seria e inportante, ma se ga l’inpression che su la carezà del dialeto sia spanìo on futìo de papàvari che fa bela vista... e basta!
 |
| Palazo Ferro-Fini, a Venezia, sede del Consiglio Regionale che, el 28 marzo 2007, ga aprovà la lege de "tutela, valorizzazione e promozione del patrimonio linguistico e culturale del Veneto". |
Da che mondo xe mondo, có xe festa... xe festa par tuti! E ’lora, vista l’operazion da parte de l’alto òrgano instituzionale regionale su la tutela, valorizzazione e promozione della lingua veneta, tuto ’l mondo dialetòfono vèneto xe in festa. Questa, almanco, xe l’inpression che se ga, incaminàndose so l’àrzare de la carta stanpà e "navigando" te le aque de Internet, dove ghe xe on anbaradan de discorsi, de ciàcole e de osamenti che te fa na testa cussì! Se sente in giro, anzi se lèze, parolone grosse, come: "successo politico", "lobby veneta", "giustizia è fatta", "appagato l’orgoglio dei patrioti veneti", " il popolo vèneto ha la sua festa", "la riappropriazione della nostra sovranità politica e culturale"... e avanti su sto tono.
Insoma pare de èssare tornà al clima del 25 aprile de sessant’ani fà, al tenpo de la Liberazion. E ghe xe on ingrejo de discorsi a tuto volume, che fa on gran bordelo, e discussion su chi ghe speta l’onore de aver messo al mondo sta creatura de lege che, co la bacheta màgica del "mago Merlin", la metarà in piè l’organizazion de corsi par insegnanti, la stanpa e difusion de libri, la realizazion de programi radio e television, la creazion de apòsiti reparti ne le biblioteche pùbliche e po’ la inbastirà na còngrega de esperti par ciamare col so nome de na volta paesi, contrà, loghi, strade, sentieri, e soratuto na comission par stabilire (naltra volta?) la grafìa uficiale de la lingua vèneta.
Ma sì! Semo tuti d’acordo: on fià de "autostima" la ghe vole e la fa ben a tuti. Quelo che no fa ban a tuti xe, inveze, l’esagerazion propagandistica, folclorìstica e on poco fanàtica che se incontra soratuto visitando i tanti broli (lèzi "siti") ch’i xe come banchi de sagra, pieni de ciàcole, de beghe, de règole e gramàtiche, che inpina la piaza.
Xe pur vero che quando sona le canpane, se spande intorno segnài e sóni che de le volte i inbriaga l’aria. Difati, nel nostro caso, ne pare che le crea on fià massa confusion! On tipo de confusion che ris-cia de cuèrzare el mèrito de persone che, con professionalità e conpetenza, le ga messo in risalto el ruolo primario de la lingua nel conceto de identità.
Una de queste xe Ettore Beggiato che – metemo da parte ogni so militanza polìtica –, par pi de vint’ani, prima come Assessore regionale all’Emigrazione, dopo come Consigliere provinciale e regionale, con la màssima discrezion e altretanta convinzion, el ga senpre sostegnù che la parlata vèneta la ga bisogno de èssare aiutà, spece là dove uno (che po’ i xe tanti) sente el bisogno de lassare testimonianza scrita del so èssare vèneto, prima ’ncora che italian e europèo.
E de sta necessità se ga senpre fato intèrprete anca Q.C. che ga zercà de arginare, par quanto possìbile, l’anarchìa gràfica del scrìvare in vèneto, e senza tanti trionfalismi la ga tentà de darghe dignità a la parlata vèneta, spesso maltratà ingiustamente, ma tante volte par colpa nostra.
On grazie, quindi, a chi se lo mèrita e on invito... a far manco ciàcole strafàlfare in piaza...
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Massa ciàcole in piaza...
La proposta de lege ’pena aprovà dal Consiglio Regionale del Veneto la xe na roba seria e inportante, ma se ga l’inpression che su la carezà del dialeto sia spanìo on futìo de papàvari che fa bela vista... e basta!
de Mario Klein
Cultura visentina
La Beata Giovanna Bonomo
La vita de la mònaga bassanese, nata 400 ani fà, ga ispirà na mostra a Palasso Bonaguro, che xe verta fin el 10 giugno pròssimo
de Giordano Dellai
|
