|
Pensieri noturni, in dialeto de la Bassa Padovana
Sinfonìe ’nte ’l buso del seciaro
 |
| ... on buso che sgorgava sbarbujando tuta l'aqua del seciaro indo' che se lavava i piati... |
Ste quatro righe xe stà butà zo ’nte la stajon invernale, ’nte ’l mese de dizenbre, quando che tira el vento de tramontana, l’aria xe turbia, el zielo inroscà che par che ’l voja nevegare e mai no ’l se decide. El fredo de fora, el calore del sintimento, tuto t’invita a restare sarà in casa, al caldeto, a ranpegarte co la fantasìa drio i rami sichi del tenpo indrìo, a rumare ’nte ’l zesto de i ricordi, a descuèrdare le magagne de na volta, che ’desso te spólvari volentiera parché te sè che no le torna pi ’ndrìo. Tuto ga ’1 saóre de na bela fola da contare, ma na fola che ingropa ’1 stómego da la comozion solo a chi ghe xe passà drento e la ga vivesta de parsona, parché a la jente de oncò no gh’intaressa gnente, manco de la storia de Fracanapa o del Siorintento. La jente de oncò ga perso ’1 gusto de pensare co la so testa, de vardarse drento, de parlare co i altri, la se contenta de rinbanbirse davanti la telavision e tegnere ’1 zarvelo a pisocare soto na grosta de indormia.
Stavolta vurìa parlare de i rumori che me vegnéa a recia ’nte le note d’inverno, quando che se jera tuti in cusina, sentà ’torno al fogolaro, a tola a magnare, a scoltare le fole de i noni, le storie de guera, o so ’l tardi, in leto, dopo ’ver dito le orazion, al caldeto soto le cuerte, ’pena tira fora la mùnega co la fogara ’ncora bojente.
E ’lora ghe jera tuto el tenpo e anca la voja de tirare le rece e rancurare parfin ’1 respiro del silenzio, i passi de la note che vegnéa senpre pi ’vanti e te cuerdéa col so tabaro de veludo moro. Qualche rumore podéa conpóndarte ’1 sòno e farte del ben, farte ?olare co’ la mente, svejare ’l sintimento e portarte drito ’nte ’l mondo de i sogni; qualche altro, pi descreanzà, rónparte le scàtole, pezegarte i tìnpani e rivare drito al zarvelo cofà on cortelo fresco de guzaura. Zerte volte, in tenpo de guera ghe jera anca del bordelo che te faséa vegnere la pèle de oca o ’1 sangiuto da la paura, co quelo che capitava.
’Nte le case de canpagna de na volta, quele poarete come in quela indo’ ca son nato, i rumori vegnéa drento a brentana, senza retegno; tegnerli fora jera come fermare l’aqua col tamiso. I ghea zento maniere diverse par butarte fora dal gnaro de la chiete casalina, par ingropare o derfarte le matasse de i pensieri.
Rumori ghe ne jera de tute le mitùe: bòte, sospiri, sbisigolìi, grataminti, ras-ciaure, zighi, lomenti e via discorendo. Ma quili de la note fonda jera i pi bei parché te ghivi tuto el tenpo e la chiete par scoltarli, gustarli e squasi trasfigurarli par zugo: me mama che lavava le pegnate ’nte ’l seciaro, qualche vaca che sbundolava parché la ciamava ’1 vedelo, le caéne che batéa so la grupia, me opà che ronchedava, la solita moréjola che rosegava le tole del granaro, el vento che vis-ciava su i fili del telegrafo, le cante de i caretieri conpagnà da le sonajere de i cavài, el sgrinzare de le róe so la jara de la strada, i gali che cantava massa presto, inbriaguni che barufava co le onbre de vin, reoplani che rondava sora ’1 paese, colone de camion de soldà ’vanti e indrìo senza mai on momento de rèchie.
Busi, crepi, sfese dapartuto ’nte le case de na volta. Sfese soto le porte, tanto grosse che podéa passarghe na pantegana e parfin on gato, sfese drio i telari de i veri che d’inverno co l’umidità no se sarava pi, sfese sui belconi de àlbara, talmente inbarcà che in qualchidun te podivi passarghe co ‘n brazo par de fora e vèrdare el caenazo, sfese soto i cupi malmissi del cuerto, che ’nte le note de burana podéa supiarte la neve sol leto. Ma el buso pi grande jera quelo del camin, senpre verto e spalancà, che’l paréa la gola de l’inferno.
El camin jera come on gran pirioto che rancurava tuti i rumori dal de fora, quili de la corte, de la strada e de la canpagna; el te li portava a la recia ingrandìi come che ’l fusse on altoparlante. Bastava métarse soto la napa, magari senta so ’l fogolaro, che te podivi sentire on can che usmava so ’l séleze el magnarolo de le ànare. Quelo de casa mia jera talmente grande che ’l spazacamin podéa passarghe de corsa balando el tango. Le caltele de sfogo del fumo jera larghe cofà i bocaròi del canpanile; de note, quando che ’l fogo jera morto, le zoéte zugava a cucata, butando basso frìtole de calùzine grosse cofà boaze, sporcando la zénare che me nona metéa via par la lissia.
Quando che in tenpo de guera passava on reoplano, paréa che ’l vegnesse doso par la gola del camin e se calasse so ’l fogolaro. A la sera tardi, a l’ùltimo giro de ricognizion de Pipo, mi ghe domandava a me mama che, dopo ’ver fato tuti i mistieri, se metéa drio a inquaciare le bronse co la zénare:
– Mama, come xelo fato on canpo de aviazion?
E ela de sèghito:
– Parché, benedeto fiolo? Cossa me domàndito! Mi no lo go mai visto.
E mi da novo:
– Mi penso che ’l sia fato a pirioto, come la gola del nostro camin, parché quando che passa on reoplano, el bordelo xe cussì grande che pare che ’l se cala so la tola da magnare, in medo la cusina.
Ma ’nte le case de na volta ghe jera on buso tuto speciale, che se slongava co ‘n tubo de fero verso el de fora, che sgorgava sbarbujando tuta l’aqua del seciaro indo’ che se lavava i piati, tece, ramine e tuta la batarìa de cusina, on tubo de fero tuto sdentegà e rudinìo che pissava fora dal muro de tramontana l’aqua de le lavature.
Quando che supiava el vento de batùa, el tubo del seciaro sonava cofà na cana de òrgano e, ora faséa ‘1 verso del lupo, ora quelo del gufo, ora quelo de i gati in amora. Col sonare de la canpana de 1’Avemaria smissià col sùsio del vento,me paréa de sentire el lomento de le àneme del Purgatorio, opure le litànie de le mùneghe o i canti gregoriani de i frati del Rua.
El vis-cio longo e variegà de la "vacamora" me diséa che la jera rivà ansemando so ’l ponte del Frassine, dopo ’ver spuà fumo e sginze cofà na màntesa drio la calà de la Brancaja.
El troto leziero e liegro del cavalo del Panza de la Cornera me di-séa che ’l tornava indrìo da la piaza, pisocando in timonela, dopo on cafè e qualche partìa de brìscola o tresète.
I me insogni finìa finalmente meténdome co i piè par tera quando che me opà, prima de nare in leto, naséa al buso del seciaro co ‘n grosso cucàjo de legno rojà de fibra de cànevo o de na straza par sarare fora ’1 vento fredo, i cativi pensieri e anca i spìriti raminghi che a chi tenpi incuculìa la mente de tanta jente débole de zarvelo.
Vis-cio del vento, scanpanelare de sonajère, canti noturni de care-tieri in ciarina, roe che màsena la jara... distante, senpre pi distante...
A on zerto punto no i jera pi i rumori che sbusava ’1 silenzio de la note, ma solo na piasévole sinfonìa che me faséa ?olare leziero verso ’n sito destirà infrà le pieghe del sòno che me portava via.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Massa ciàcole in piaza...
La proposta de lege ’pena aprovà dal Consiglio Regionale del Veneto la xe na roba seria e inportante, ma se ga l’inpression che su la carezà del dialeto sia spanìo on futìo de papàvari che fa bela vista... e basta!
de Mario Klein
Cultura visentina
La Beata Giovanna Bonomo
La vita de la mònaga bassanese, nata 400 ani fà, ga ispirà na mostra a Palasso Bonaguro, che xe verta fin el 10 giugno pròssimo
de Giordano Dellai
|
