|
Editoriale
Massa cultura da spèndare te na sola istà
Anca col "pan de l’ànima", come vien ciamà la cultura, quando che ’l xe cussì tanto che ’l stómega, se ris-cia de fare sumaza
 |
| ...na selta inteligente, preferendo el "naturale", come ne insegna l'ingenuità primitiva... |
La casseta de la posta bison gudarla tre volte al dì; i anunci par radio e pìcole television i va par sora; i giornài de sto periodo estivo i se scana mèsi a tegnerne informà de tute le manifastazion che Region, Provincia, Comune, Pro Loco, Associazion, Parochie, Quartieri e Comitati vari i organiza par animare i mesi pi caldi, par paura che ciapemo sòno e che perdemo la bona abitùdine de nare senpre de corsa, come femo el resto de l’ano.
L’iniziativa la sarìa anca bona, se la confrontemo co ’l tran-tran e l’inocamento estivo de na volta, ma sicome che ’desso i xe tanti quei che se preòcupa del "cittadino solo", de la "persona anziana", de "chi resta in città" e soratuto de i "pensionati" che no ghe la fa a rivare a fine mese, se dà el caso che se ris-cia de insiminire la zente co mile proposte culturali, poco utilisà e poco usufruìe, proprio parché le xe massa. Massa concentrà in cussì pochi giorni ch’i dovarìa èssare quei del rilassamento, de la chiete, del digiuno da tuto quelo che pole ingolfare el motore de l’ànema, de la mente e del core, che i xe senpre sù de giri.
Le proposte le xe infinite (e qualche volta indecenti... "apri la tua casa a Mafalda: vi entrerà il sole.
E non solo..."): soto le stele o ai giardini pùblici, ne i parchi o ne le "aree protete", ne le piaze o ne i teatri, ne le vile, ne i quartieri o ne i club.
Comedie, cinema, incontri con l’autore, libri da gustare, poeti da scoltare, còmici da aplaudire, ginàstica "di gruppo", laboratori creativi, spetàcoli folclorìstici, mostre, concerti, bali, gare de tango e de lissio, rock psichedelico, rock baroco, indie-rock con alternativa country... Insoma ghè tuto quelo che pole tegner ocupà la zente el pi possìbile, de giorno e de note, passando l’istà a casa propia, senza bisogno de ’lontanarse dal paese o da la sità. Cussì dovarìa esaurirse..., ma propio esaurirse con intronamento totale, el nostro tenpo... de vacanza estiva scalmanà...
Ma, alora, dove xelo ’ndà el necessario riposo, el rilassamento fìsico e mentale, se ghemo da rispóndare a tute ste "chiamate"?
Dove xelo nà a finire el distaco (provisorio) da la confusion, el tenpo de la tranquilità interiore che ne permeta de vardarse drento, ma anca intorno e on poco indrìo, riconquistando el sentiero de la memoria e el gusto de stare insieme, ma senza fracasso, baraonda o ipocrisìa?
On incontro con l’arte te pole fare ben se te poi gustarla, scoltarla, portartela drento con calma, tranquilità, distension e gioia, par sostituire imàgini, conceti, parole on fià indurìi dal calcare de tuti i giorni.
In tuto sto "tanto" e sto "massa", dovemo fare na selta inteligente, magari preferendo el "poco" naturale, condìo de silenzio, possibilmente servìo sotovose, vissùo de gusto t’on fazoleto de tenpo memoràbile, e scartando le ocasion arificiài, anca se le ne vien propinà col nome de "manifestazioni culturali".
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Massa cultura da spèndare te na sola istà
Anca col "pan de l’ànima", come vien ciamà la cultura, quando che ’l xe cussì tanto che ’l stómega, se ris-cia de fare sumaza
de Mario Klein
Cultura visentina
La morte de Luigi Meneghello
La matina de ’l 26 giugno scorso ne ga lassà uno de i pi grandi scritori ’taliani de ‘l Novessento, grande cultore de ’l nostro dialeto
de Giordano Dellai
|
