|
Da Belun
Vója de zogar
 |
| An s-ciap de boce: dal stradon e dal boschet son in montagna a genziane. Era el 2 giugno 1946, no se véa l'età par votar Monarchia o Republica... Mi son quela in mèdo in pie. |
"ò vója de genziane.../de prà de narcisi/de visi/che da tenp/stà sot tera.../ò dentro na guera.../ò vója de aqua/quela su de le crode/che dó la se buta e,/no la sa par dove.../ò vója de ’l mar/co onde ingrespade/ò vója de zogar.../co tosatèi pa le strade/e sentir la to vóz/che me ciama.../ò tanta vója de ti,/ Mama."
Sì: "ò vója de zogar co tosatèi pa le strade" e, a le olte la not có me cate sveja pi che fusse dì, fae an zógo tut par conto méo: méte a posto le me strade, quela davanti casa méa e anca "lu, al stradón" la strada nazional. Pa méter a posto intende questo: vede de riportar al tut a misura de boce "ultimi ani Trenta, primi ani Quaranta" có de màchine ghe n’era una, sì e no ogni tant e no par vera gnanca contarlo ... le strade, come prà e boschet i era "i nostri campi giochi." Pi de tut me piase sbàter via al condominio, tirà su da ani, e meter so quel so posto "al spartineve" l’era la nostra nave... se ’ndéa pa mar deventando parfin pirati!
Cossì co ’l stesso entusiasmo par al boschet dove se deventéa veri indiani. Poca la diferenza: an fazolet tabacon in testa: pirati, al stesso, ligà torno la fronte pa fissar na piuma: indiani; tant che i nostri amighi de ’l cor era lori: al stradon pa ’l spartineve e al boschet pa i àlberi. Po’ al spartineve có l’era tut indafarà par via de la neve eco che al stradon a lo trasforméa pian pian so vere piste de giaz, prima tuta na crosta de neve ben batesta, po’ stacandose la crosta a tòch, eco ste strisse longhe, lustre come speci... cielo che bele sgissolade: altro che le gare olimpioniche!
Sì, al stradon l’avéa quel no sò che da méter in moto la fantasìa de noialtri boce, che se féa ogni dì a pie ’ndando e tornando da scola: cossì eco i paracar da saltar, fóss da perlustrar, muret da caminarghe sora, eco che rivéa qualche car tirà da cavài, mui, vache, caret spendesti a man e, noi, se era senpre pronti pa saltarghe sù... na vera aventura. A propòsito de car, se véa senpre na gara in corso: chi che contéa par primo 220 cavài e par far pi interessante al tut, anca 12 gobi e 100 persone co i ociài, vinzéa la partida. Cossa che se vinzéa? Gnent, ma ve pàrelo póch la sodisfazion de rivar primi, senza inbrojar. Sì, era proprio "altri tempi" e me vien da domandarme quanti ani che starìe pa rivar, al dì d’ancói a contar 220 cavài, tacadi al car,... alora bastéa sol setimane... e i cavài se véa inparà a conósserli dirìe tuti, paroni conpresi... come che pól far ’dess i tosatèi co le màchine...
E, senpre la not, co me cate sveja e lasse co al pensier "stradon e boschet", ècome ai zoghi, davero tanti e par tuti i gusti.
Prima de tut "scondicuch" co an vero baticor rivar a tanarse prima, che quel de turno rivesse lu a catarne. Có se féa la conta, de sòlito se contéa fin a "31" o filastroche varie... "La gallina ha fatto l’uovo tutto bianco tutto sodo, la gallina qui non c’è, è nel pollaio che fa coccodè" e altre: "ànega batànega, pissa budèi, conta fin al 36, trentasèi de la malora ti te sé dentro, ti te sé fora"...
E ’vanti co i zóghi: córerse drio, lanpa scanpa, ladri e carabi, libera ferma, l’anel, palla prigioniera, pecore venite a casa: un al féa al lupo, ’naltro al Pastor e st’altri tuti pecore; al pastor al ciaméa le pecore parché le ’ndasse a casa, ma ghe n’era al lupo pa la strada che al magnéa carne el bevéa sangue... che paura che véa le pecore corendo verso casa... Pi che interessante "vivi e morti"; pense che ’l sie "l’avo" de i Birili, sol che se doperéa scaje, no tant grande che stéa in pie là una fianco a st’altra, drio al nùmero de i zogadori. E eco le balete de teracota che se féa co la créda ciolta do rente al rui e che se cusinéa entro al forno de la cusina economica, senpre inpizada; no ghe n’era gas o eletrico. E... vanti che dir del "Bot" sto tochetin de legno, na spana, co la ponta da tute dói le part: ècolo là partera, an colpo co la maza, an mèdo mànego de na scoa e quel al salta via: chi che lo ciapéa in man vinzéa la partida... mi in fronte, na stelina che ancora conserve. E ancora "le bele statuine", zogo calmo, "mosca ceca" o le bale de goma tirade su pa ’l mur de la casa pa riciaparle in man, e nò co na sola bala ma anca co tre e senza sbaliar...
E i giritondo? "Al mio bel castello" "Quante belle figlie avete, Madama Doré", ma pi sinpàtico: "Giro, giro, tondo la vecia in médo al mondo, cossa fala là" e la vecia la rispondéa: "polenta e bacalà", "Me ne dala an cin a mi", "Ma gnanca se morì", "Morirà la vecia e morirò anca mi", senpre domanda e risposta e "Ma ghe ala méss al sal?" e la vecia la rispondéa de no e l’andéa a ciórlo, intant se ghe magnéa tuta la polenta... Có se era ben strachi, ècone a PIEPIEDIN là sentadi davanti casa sul murét bass co i pie in avanti: co na filastroca diversa de quela de NONNA "Ena" publicada so Q.C., letere al diretore, majo, in ocasion de i so 106 ani (auguri!).
"PIEPIEDIN VALENTIN, TRE NARANZE-TRE LIMONI-PER ANDARE IN OSTERIA CìPELO CIàPELO E MéTELO VIA" e, có Mama la ne vedéa là sentadi, savéndone ben strachi la ne ciaméa, a le olte giusta in tenp che se tachéa co i nostri "CORI" e se cantéa, se cantéa... La guerra la ghe n’era, ma lontana da noi... ma eco che, come "an lupo feroce" l’è rivada, sofegando, anca la nostra vója de zogar... che ancora me cate dentro.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Massa cultura da spèndare te na sola istà
Anca col "pan de l’ànima", come vien ciamà la cultura, quando che ’l xe cussì tanto che ’l stómega, se ris-cia de fare sumaza
de Mario Klein
Cultura visentina
La morte de Luigi Meneghello
La matina de ’l 26 giugno scorso ne ga lassà uno de i pi grandi scritori ’taliani de ‘l Novessento, grande cultore de ’l nostro dialeto
de Giordano Dellai
|
