|
Sbiansi de sagessa antica
Aldo Botaro, on re del "buso"
 |
| El "buso", spece de girelo fato in casa, par métarghe el putin dopo che ’l ga ciucià la teta de so mama, evitàndoghe sbocuni de late. (foto InVi) |
- Tita, no dèvene da maraveja pi de tanto, parché quei do piòcari che se struca e se basa, pontelà co 'a schina a la ringhiera del ponteselo su la canaleta, tanto s'a 'ndè Padova ste sène fureghine xe tuta una e le se vede in ogni canton in pieno centro de 'a sità.
- Sì, Bepe, mi capisso che la tendra età fa spira, ma ghe vole un fià de quela ca se ghe dise decensa. 'Ndè là, no stè dàrvane par male sa ve contradisso, anche parché quei sporcaciuni se toca sbrissando co le man gnonde che no i dovarìa métarle, soratuto de giorno e in logo pùblico inansi a un indriovanti de zente che va al marcà pa' i so intaressi. No ve pare? Fèvene in cunto che no i xe pi i nostri ani, quei ca fasévimo sbronbiolare la scuria pararia, sora i corni de le vache al dóo, soto tiro del varsuro. Serto alora ghe gera altre fadighe, altri svànpoli e altre educassion. Ve ricordèo ca ne tocava fare serte guere par palparghe, solo de man lesiera, na ganba sora el zenocio a la fémana ca gavévimo serie intension de maridare? E po', caro vu, "baso no fa buso e buso no fa vaso, anca se tuti do tira suso, però, sapiè, mai par caso."
- Barba, questa sì che la me sona da novo. Te dirè che le serco co 'l candelin, ma te giuro che la me xe capità gualiva gualiva, come che te la go contà, fasendo un salto stamatina al marcà a Piove par torte la ponta de grana e la renga che te gavevi voja de magnare co la polentina nova. Spero che te sii bon de pareciàrtela.
- Fate conto ca go za le bronse in andare so la ròla e l'alcolina in boca.
- Però go 'ncora da saère s'a te la ghè capìa quela del buso.
- S'a go da èssare sincero, me toca rispóndarte che me la so' spiegà solo in parte.
- Garìa giurà!
- Soratuto parché la me infansia vissùa ne le stretesse, in quei ani del canpagnolo inzegno, quando i contadin batéa el gumiero e inbrocava le sgàlmare de legno, go tocà co man tante realtà mecàniche che 'desso no ghe xe pi. S'a fusse vegnùo fora co l'intormane so 'l merito del discorso, prinsipiando putacaso ca : "No ghe xe crestian ca vegna ficà tel so buso sensa na làgrema sol muso", te garìa parecià na ponga de polenta nova sora on panaro vecio e onto e te sarissi restà co 'l grugno duro, magari co la to voja de saère, cofà ca so drio restare mi ne la me voja de renga s'a te la tegno tanto longa. Serto però che qua semo a caoculo fra quelo ca t'ò dito mi e quelo ca t'à sentùo ti.
- Spiègate mèjo, barba. Stavolta no riesso starte drio.
- Te ga da saère che mi da snarocion go vissùo te na corte insenbrà da tochi e tocheti de tanti paruni par via de le spartission de propietà fra i veci. Par tegnerme in àndio giusto te ricordarò che alora se sentìa dire spesso: "Le parte fate anca co' i fiochi contenta solo i pitochi." Questo par dirte che dopo le spartission tra fradèi, in seguito a la morte del paron vecio de na grossa fameja patriarcale, come la nostra, restava quasi senpre de le rogne fra le nove famejole, magari scontentàe dal tiro de le paje che ghe gaveà assegnà on tòco de propietà ca no ghe piaséa par gnente. I tòchi vegnéa fati a la carlona sensa ciamare in causa geometri o giurini vari. Pènsate ca gavévimo in uso parmiscuo parfin la tesa, el posso e la sfondra, siché noaltri bocia zogàvimo fra zermani, butàndose na bala de pèssa de qua e de là de na rede tirà co 'l reticolato sora, inframezo al colmo del sèlese. Na volta la bala xe 'ndà fenire inansi a on casotèlo de legno querto da cane de fosso, a man fonfa decào da l'ara, gnonde là drento me zerman Aldo el custodìa i so atressi da botaro. Ma sicome el gera on sacramen, bravo s'intende pa 'l so mestiero ma on rustegon fora da i limiti vangèlici, no se parlàvimo mai a tu par tu parché lu assè pi sgresà de mi ne i ani no 'l ghe tegnéa pèrdarse in pàciole co noaltri scavessacoli inmatonìi dal zugo e po' el me tegnéa el muso par vece rogne de fameja e mi co la scusa de narme rancurare la bala go 'vùo modo de ficare el naso te le so secrete robe e go visto che oltre a bote, tinassi, sotospine e mastèi da travaso el faséa anca naltro atresso ch'i lo ciamava "buso". A vardarlo el paréa on caratelo, na s-cianta pi longo, pi smilso e sfondà tel quercio. Curioso gera saére a cossa che 'l servìa. Ma chi xe ca se tentava dimandarghe conto de calcossa a quel àscaro de omo senpre ingrugnà, saendo ca no me vardava so 'l muso gnanca la Crelia, quela ontona de so mojere che la me tratava pèso d'on foresto.
Te stentarè a crédarme, ma go savùo pi tardi da me nono che l'atresso vegnéa doparà da le mame, quele 'pena fora da la quarantena, maridàe co benestanti ca podéa permétarse la spesa, sinò ciapàe a le strete le lo toléa in prestio, in canbio de calche bosson de late o de vin, par on pochi de mesi fin che 'l pìcolo faséa ganba da spasseso. Par spiegàrtela tuta come che la sta co 'l so saòre da sacrilejo, le done ficava sto fagotelo drento in sicuressa de maniera che el putin da teta, dopo 'verlo lavà, canbià e infassà puìto, el podesse stare obligà drito in pìe par la paura che 'l se sofegasse butando fora de i sbocuni de late penà ciucià. Cussìta intanto le fémane podéa nare drio ai so mistieri de casa o te l'orto a sunare le patate o sapare le conbine 'vanti i primi jassi.
E co questo, anca stavolta te ghe scorlà la ganassa par calcossa ca te intaressava.
- Mèjo de cussì, barba, Dio te renda mèrito del to pressioso saère e 'desso meti pure la renga su le bronse che mi me la cato.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
I boni sentimenti
In sto mondo che pare de giazo, che mucia scoaze par strada,che brusa le usanze pi mèjo... ghè 'ncora el canton de i pensieri,che jèrimo usi incontrare ne l'omo de jeri?
de Mario Klein
Da Thiene (VI)
Tenpo dopo Pasqua,tenpo de i matrimoni
Dopo la nàssita, nel propio anbiente l'avenimento più importante gera el matrimonio che inpienava la casa de fiòi e de nevodi
de Bepin Daecarbonare
|
