Da Maran Lagunare (UD)

La galina nata ben

La strutura de le vece case de Maran, una tacada a l’altra...

Un zorno trovàndome a fa un lavor manual co de le done de 'na certa etàe, me xe capitò de sintì che ne i tinpi passài qualchi fameja maranese la tigniva in càneva (chi che la veva), ma anca in cusina, una o do galine, par vè la risorsa de un vovo, 'na giossa de bondansia in tinpi de gran miseria. Par descrive sto fato che 'l ga del vero, bisogna prima che spiego che la strutura de le vece case de Maran le xe fate una tacada a l'altra e sbaliasse de porta podeva anca capità; no esistendo ciave, le porte de le case de 'na volta le gera senpre verte anca de note. Se podarissi fa tante considerassion a proposito, ma lasso che chi lesi fassa la sua: de sicuro xe che gera un altro vive. Colegàndome al discorso inissial tanti ani fa 'na dona evolùa la ga pensò de ciosse 'na galina e de tignìssela in casa in modo de vè senpre el voveto fresco. Sta galina la gera tratada come 'na principessa, la veva senpre in canton de la cusina 'na scuela de biava se la veva fame, e una de aqua fresca par quando che la veva sede. Sicome la vigniva considerada parte de la fameja, la veva anca un nome, la se ciameva "Cocona". Sucedeva che quando la parona co bonboria la parleva de ela, la diseva: - La me "Cocona" qua, la me "Cocona" de là, e via co le grandesse!!!... Forsi sta galina no la veva un sarvel come che disi el deto, e la ga de vè capìo de gesse tanto benvolùa, fato sta che la veva ciapò l'abitudine de fa el vovo in càmara, acovaciàndose in meso al leto matrimonial. Sta parona par niente contraria, adiritura la la mandeva ela su par le scale a fa par modo de dì "el so dover". El caso ga volesto che un zorno sta galina la se ga sbaliò de porta e invesse de 'ndà drento la sua, la xe entrada in quela dopo. In sta fameja gera quatro fradèi drìo ziogà, no se pol gnanca imaginasse la sorpresa che i ga vesto quando che i la ga vista. "Piata, piata", i ghe ga dito subito, che vol dì: "Métete comoda". Ela, la galina, no savendo de gesse in un'altra casa la xe 'ndada su par le scale e la prima càmara che la ga trovò al primo pian (l'unica), pensando che fussi quela de senpre, la se acovaciò sora el leto matrimonial e la ga fato quel che la natura ghe permeteva de fa. I fiòi che i gera stai zo, duti continti dopo un poco pian-pian i xe 'ndài a vede se par caso la veva fato quel che luri i se speteva de vede.

La galina "lota-lota" la gera 'ndada fora da la porta...

Fortuna ga volesto che proprio vissin de ela, in banda, ghe gera el vovo desiderò, rotondeto, biancaisso e caldo. In stiapinela co delicatessa i lo ga ciòlto e come se fussi un tesoro i xe tornài in cusina e i decidi de vévolo dividéndolo par quatro, un poco paromo (per ciascuno). Par no barufà i se ga pensò de fa "la conta", in modo che no ghe fussi preferense su chi che veva de bévesene un giosso par primo. La fortuna ga privilegiò el fiol più picolo e parché quel beve el fussi senplificò, sul scansel de i fili de la mare (che la gera fora par lavor) i ga ciolto un ago grosso e i lo ga sbusò par ben, po' i ghe lo ga sporto al fradel che ghe gera tocò de sercalo par primo. A sto punto xe sucesso quel che i tre fradèi no i varissi mai credesto che sucedissi. Dopo vè fato un bel respiro a sto fiol el vovo el ghe xe 'ndò zo par la gola duto intiero. Figurasse quel che xe seguìo: sto povro fiol no 'l veva parole par discolpasse, zurando de continuo che no 'l veva fato posta (di proposito), ma i fradèi no i ghe credeva e i continueva a dìghene de ogni sorte. La galina intanto "lota-lota" la gera 'ndada zo de la càmara e fora de la porta e dopo vè zirò a destra e a sinistra, contenta de vè fato anca quel zorno el vovo, la se ga ritirò entrando sta volta ne la vera porta de casa sua. Sicome gera saltada l'ora che de solito la so "Cocona" la torneva a casa, la parona la se ga messo a sercala par duto el visinal, domandàndoghe a quìi che la incontreva se par caso i la vissi vista, ma duti i ghe rispondeva de no. Co la xe entrada in casa e la la ga vista, contenta la xe 'ndada de corsa in càmara a vede se la veva fato el vovo, ma gnente: chissà parché la se domandeva, quel zorno no la lo veva fato? Ne la casa vissin da parte de i fiòi xe stò duto un "sito-sito", anca co i genituri, ma el savor del vovo fresco i tre fradèi che no i lo veva bevùo i se lo ga sognò anca de note.

[torna sopra]