|
Robe nostre
Emigranti de jeri e de unquò
Da la siora Maria in Svissera, ai novi migranti qua nel Veneto
 |
| Emigrassion de jeri... |
Me capita spesso de parlar a scola, co amighi e conossenti de i problemi de l’emigrassion veneta – i nostri conpaesani che par ani e ani xe ’ndài a l’estero par lavorar e vìvar ’na s-cianta mèjo – e de l’imigrassion in Veneto, che sarìa i cosideti "estracomunitari" (e "neo-comunitari", come i rumeni) che vien qua ’desso da noaltri in serca ’ncora na volta de ’na vita pi gualiva. Me vien natural, alora, sercar de paragonar le do robe, e anca se qualche inteletual me ga dito che no se pol far, parché xe passài tanti ani, i tenpi xe canbiài, e vanti cussì, mi vorìa istesso far do-tre considerassion.
Parto da la storia che in sti dì me ga contà la siora Maria (nome de comodo), classe 1927, de Zero Branco che xe stada par 9 ani in Svìssera insieme a so marìo, dal 1951 al 1960 ne la zona de Ginevra. Là le condission jera, a l’inissio, dure; nissun te dava ninte, ’pena rivài i te visitava che no te gavessi malatìe e i te metéa a la prova se te gavéi volontà de lavorar. "Quante volte – la me ga dito – i ne mandava fora co vento e neve, a cavar co i déi le carote drento al teren duro ingiassà, fin che i paroni jera casa al caldo e magari i te tendéa dal balcon par védar se te lavoravi!" Pensè che par védar se sti emigranti jera onesti (parché, par inutile ripètarlo ma la xe cussì: de emigranti poco onesti ghe ne jera ’na volta e ghe ne xe anca ’dèsso) i ghe butava de scondon par tera un fià de monée de franchi svìsseri e po’ i ghe tendéa se sti italiani se le metéa in scarsèa o no; se no i lo faséa e i ghe portava indrìo i schei al paron, alora i vegnéa considerài veramente boni da laorar, e i ghe faséa la létera de ingagio, e i li tegnéa in bona considerassion.
La Maria, fin che el so omo lavorèa in fonderìa, la se ga adatà a far tanti de chei lavori: da le pulissìe, a tèndarghe ai putèi, a far la cuoca so un colegio, a far la contadina, e via cussì, par tuto queo che la catava. ’Ncora ’desso ghe par fin inpossìbile che in Svìssera la ciapasse 30 franchi al dì par tèndarghe ai tosati dentro a un colegio "sensa far ninte", la dise; ninte che po’ no xe vero, ma abituà a lavorar duro come che la faséa e come che ’ncora ’desso la fa, ’ndàndoghe drio ai canpi, a l’orto, a le bestie, al so bis-nevodeto che la ghe vol tanto ben, lavorar là ghe paréa quasi un scherso.
Vegnendo ai nostri dì, vorìa subito métar in ciaro na roba, sarìa a dir che par zente cristiana come che dovaréssimo èssar noaltri me par doveroso el rispeto, l’acoliensa e el dialogo co chealtri. Però, e qua taca i però, anca el Papa ga ricordà che el dialogo e l’acoliensa ga da èssar reciproci, cioè noaltri gavemo da èssar ben disposti verso de ’sti stranieri, ma anca lori ga da volerghe ben a noaltri, a la nostra cultura, a la nostra tera che in fin de i conti li ospita. Ghe jera ’sti dì so ’l giornal na bea létera de un imigrà african (credo dal Ghana, Senegal o Nigeria) che scrivéa che lu se trova anca massa ben qua da noaltri, che no ’l ga mai avùo problemi de integrassion e manco ’ncora de rassismo, parché, el dise, bisogna darse na man tuti do: l’italian par integrar el straniero, el straniero par farse integrar, che vol dir inparar legi, lingua, usanse che se trova qua e no voler magari obligarne noaltri a seguir le so regole de magnar, de vestir, de lavorar, e via cussì!
Penso che conóssar la storia de i nostri emigranti veneti a l’estero alora ne serva tanto, no par dir che i nostri jera boni e quei de ’desso xe cativi, ansi questa xe na vision "manichea" che no porta da nissuna parte; se trata invesse de capir i sbali che xe stai fati nel passà anca da i nostri emigranti e de sercar de no ripètarli, come che chi che vien qua dovarìa ciapar esenpio da le tante storie come quea de ’a siora Maria par capir che no se pol rivar qua e sigar: "Vojo casa, lavoro, diriti", ma serve métarse co umiltà e sacrifissio a lavorar par costruirse un futuro che el Signor ne ga assicurà a tuti quanti, bianchi, neri, zali o rossi che semo no conta.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Bon Nadale, cari letori...
Anca se a si bituà a lèzare, so sto canton, on me personale pensiero, vorìa, par sto Nadale, alzare el volume, parché ve possa rivare un coro de auguri, come se faséa na volta, in s-ciapo, passando de casa in casa
de Mario Klein
Da Belun
An banbolot de celuloide
de Luigina Tavi
Robe nostre
Emigranti de jeri e de unquò
Da la siora Maria in Svissera, ai novi migranti qua nel Veneto
de Daniele Marcuglia
|
