|
Zente de Padova
Tullio Levi-Civita
 |
| Tullio Levi-Civita. |
Tullio Levi-Civita el xe nato a Padova el 29 marso del 1873. So pare, Giacomo Levi-Civita, el xe stà fra i garibaldini ne la canpagna del 1866, guadagnàndose a Bezzecca na medaja al valore. Senpre so pare el xe stà consiliere comunale a Padova e po’ anca sindaco e sucessivamente Senatore del Regno. Tullio Levi-Civita i so primi studi li fa co un sacerdote catolico, el professor Padrin. A dieze ani el se iscrive a la seconda classe del ginasio "Tito Livio" dove i so conpagni de classe, tuti più veci de lu, i xe tuti ciapài da la so sinpatìa e vivacità e superài par la prontessa de inparare.
A quatordes’ani el passa al liceo dove le so capacità le deventa veramente ecessionali. El se ga laureà ne la nostra Università nel 1894 in matematica e l’anno dopo el xe deventà, senpre qua, assistente straordinario de algebra e calcolo. Nel 1896 xe stà nominà professore interno de la scola normale de siense de l’Università de Pavia.
Ne l’Università de Padova, nel 1897 el xe sta nominà "incaricato", nel 1898 "incaricato straordinario" e nel 1902 "incaricato ordinario" de mecanica razionale e "incaricato" de mecanica superiore. Nel 1918 el xe stà ciamà a insegnare analisi superiore a l’Università de Roma dove nel 1922 el xe passà a la catedra de mecanica razionale. Socio de tante istitussion sientìfiche, sia italiane che straniere, el xe stà mandà diverse volte pal mondo a tegner conferense.
Dotore "honoris causa" de le Università de Amsterdam, Cambridge (Mass.), Havard, Parigi, Tolosa. El gera Profesore emerito de l’Università de Padova, Professore onorario de l’Università de Lima e Dotore "honoris causa" in ingegneria del Politecnico de Aachen. La Royal Society nel 1922 ghe ga conferìo la "Sylvester Medal" e dopo el ghe xe stà anca menbro straniero. El xe stà anca menbro onorario de la "London Mathematical Society", de la "Royal Society di Edimburgo" e de la "Edinburgh Mathematical Society." El xe stà menbro de "l’Accademia Pontificia", de "l’Accademia dei Lincei" e de squasi tute le altre academie italiane.
Tullio Levi-Civita el xe stà siensiato geniale e poderoso. I problemi sientifici più ardui i xe stà da lu afrontài co na senplicità de inpostassion, tratando i canpi più diversi de la matematica e de la mecanica. El ga verto prospetive nove ne la mecanica analitica, ne la geometria, ne la idromecanica, ne la mecanica celeste, ne la elasticità, nel calore, ne la matematica relatistica. I so studi e le so intuission ga dà modo a Einstein de portare ’vanti i so studi su la teoria de la relatività e a tanti altri siensiati de maturare le so teorie sientifiche. In un scanbio de corrispondenza fra lu e el famoso fisico Einstein sto qua ghe scriveva che amirava "persone come lei che vanno a cavallo sulla matematica, mentre io sono costretto a procedere a piedi."
Nel 1938, per le so origini ebraiche, el vien rimosso dal governo fassista par via de le legi rassiali da i so incarichi. Al pari de Vito Volterra e de molti altri siensiati el xe stà un forte opositore del fassismo. El ga vossudo, malgrado la situassion politica, restare in Italia anca se el gavarìa trovà sistemassion a l’èstero co tuta fassilità. Dopo el so alontanamento da i incarichi sientifici la so salute xe ’ndà progressivamente pegiorando fin che el 29 dissenbre 1941 a Roma el xe morto par un colpo al core.
Su sto nostro padovan se podarìa scrìvare un libro, no quatro righete come fasso mi, pa le so intuission, pa i approfondimenti su tuti i canpi de la matematica e de la fisica. El ga verto strade che xe stà portà ’vanti da siensiati conossùi in tuto el mondo. Ne le so materie el ga lassà circa dozento publicassion. Se no fusse stà un grande siensiato saria bastà le so qualità umane par farlo ricordare in modo durévole. No se pol dire invesse che la so sità lo gabia in grando onore se cavemo la strada che ghe ga dedicà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Bon Nadale, cari letori...
Anca se a si bituà a lèzare, so sto canton, on me personale pensiero, vorìa, par sto Nadale, alzare el volume, parché ve possa rivare un coro de auguri, come se faséa na volta, in s-ciapo, passando de casa in casa
de Mario Klein
Da Belun
An banbolot de celuloide
de Luigina Tavi
Robe nostre
Emigranti de jeri e de unquò
Da la siora Maria in Svissera, ai novi migranti qua nel Veneto
de Daniele Marcuglia
|
