|
Da la Marca
La festa de la renga
In tuta la so storia pi che milenaria i Trevisani i ga senpre godùo ‘na fama de frajoni, bontenponi e bongustai e cussì no xe strano che i gapia trovà el modo de trasformar in goduria anca ‘na ocasion de rinunçia e sacrificio come i giorni de magro. Infati el mèrcore de le Çénare, dì de astinensa a puro ojo e de penitensa in cesa, a Treviso el vegneva ciamà "carnevaleto" parché el jera sentìo come ‘na coa del Carneval, solo che celebrà in tono minor co pesse e verdura. Fin ai ani ’50-’60 del secolo passà, dopo i bagordi del marti grasso, magari de ritorno da ‘na cavalchina o un vejon mascarà, se se trovava fra amissi in ostarìa par far marenda co renga, polenta e vin rosso.
I sanseri o marcantini, che al marti, giorno de marcà a Treviso i gavéa messo da parte qualche scheo par sacrificar a Bacco e a Venere, i costumava de catarse in liete brigate a l’osteria de la Goba, ‘pena fora del vecio portelo, par magnar insieme renghe al late o ai vovi co brocoleti lessi, conpagnài da un bon goto de raboso. In altre ostarìe, al posto de le renghe, vegneva servìe sardele insalàe o qualche scopeton da parar zo col clinton. Comunque, prima de tornar a casa se passava in cesa par ciapar le çénare a perpetuo memento che semo tuti tera da far bocali o pipe, a seconda de le zone.
Co l’arivo de la società de i costumi e la sconparsa de la cultura contadina la tradission de la renga la xe andada in desméntego in çità ma la se ga mantegnùo ne i paesi verso el Friuli, come Motta, Gaiarine o Cessalto, dove le tratorìe, ostarìe e ristoranti i fa a gara par ofrir specialità de magro senpre pi gustose, come le tartine vegetariane, i ganbareti co la mimosa e anca el carpaccio. Qualche local chic el ga pensà ben de presentar piati giaponesi, come el surimi, che ga incontrà un discreto favor ne i aventori.
Recentissimamente la Congrega par el recùpero de le tradission trevisane, un sodalissio de amiçi inamorài de la çità e del so spirito mataran, i ga proposto a vari esercenti de riportar in auge la vecia usansa, che la ghe farìa invidia anca al celebre carneval anbrosian, tanto che l’ano che vien se scomissiarà a festejar ancora la gloriosa festa de la renga.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Adesso... podemo gòdarse!
Finalmente ghemo catà chi che xe stufo de sentirse frenà da tuti sti “questo sì, questo nò”. Xe ora de scancelare tute ste paure de questo e de quelo, ste règole e ste limitazion che te ’sassina sti quatro dì ca semo qua...
de Mario Klein
Ciàcole visentine
El Grupo Ciclisti de Longa
Da quìndese ani i amanti de le do rode i pedala insieme su le strade vissin casa o su le tape pi difìssili de ’l giro d’Italia
de Giordano Dellai
|
