Vardando indrìo

Na volta... na volta...

Eco nel 1940 me fradeeto nel so trono.

Eco nel 1940 me fradeeto nel so trono. Un putèo nel caregon el se sente sicuro; tacà a eà tàvoea parecià el varda dapartuto, el segue i movimenti de i genitori e de i altri fradeéti (se i ghe xe), el ride, el fa i caprici, el voe magnare e tocare anca lu ’e robe che ’l vede, insoma el se sente protagonista.
El caregon el gera de legno (qualchedun gaveva el buso in meso par i bisogneti inprovisi), eà mama ghe meteva ’na pèssa soto el culeto parché no ’l se macasse, e intanto el cresseva lassàndoghe el posto a naltro boceta. I "seggioloni" de ’desso i xe tuti inbotìi, i ga el porta bicerin, el porta piatin de eà papa; el posto par qualche zogatoeto e, par sicuressa, ’e cinture parché no ’l vaga zo, in tera. Se se struca un boton se sente ’na bea musicheta, un altro boton e el schienàe el se inclina, cossì el toseto poe fare anca un riposin.
E parlemo de ’a carossina. Al dì de uncò eà neo-mama par esenpio eà voe tuta bianca, el papà de colore blu, eà suocera sul scossese. ’Na me conossente eà ga tolto na carossina cussì granda, parché tuti doveva védare sta carossa (più inportante del neonato?) che no eà passava gnanca in assensore, salvo che ’l fusse un montacàrichi. Na volta ’e carossèe gera basse e co ’e rode de legno. Chi che non ’e gaveva i portava el fioeo in brasso tuto infagotà.
Passemo al triciclo. ’Na volta, specialmente durante e subito dopo eà guera, de sòito i gera "pezzi unici" parché fati da qualche familiare ingnegnoso. ’Desso ghe xe anca quei elètrici che va a pile. Poco tenpo fà go osservà nel me giardin condominiàe un putèo con uno de sti trabìcoi moderni. El pìcoeo girava sensa mòvare gnanca un déo del piè, so papà el se sentiva "un pallone gonfiato" che pareva che ’l disesse: "Mi posso permétermeo, me fioeo ga da ’vere tuto." I altri do putèi i spenseva con i so penini el propio triciclo, contenti e beati: i acelerava, i se fermava, dopo i spenseva danovo, e cussì sti movimenti gera anca tuta salute. Non sò se me faseva più pecà el putèo costreto a córare come un automa o so papà. Tenpo fà ’na putèa, no riussendo a fermarse in tenpo, eà ga perso tuti i denti davanti, ’ndando a sbàtare contro un palo de cemento.

'Na volta, i tricicli de sòito i gera "pezzi unici" fati da qualche familiare ingegnoso.

E eà bicicleta? Da una pìcoea (i più fortunà) se passava a quea da grandi. Mi a 18 ani quando so’ ’ndà in uficio go dovudo métere via un pochi de schei al mese par podérmea tore. Che sodisfassion! Me eà sentivo mia, parché guadagnà col me lavoro, e fasendo economia. Corevo come el vento. Purtropo dopo quarant’ani i me eà ga robà. I me n’à regaeà una nova, ma no xe stà più come prima. ’Desso ghe ne xe de tute ’e misure e de tute e forme a seconda de l’età del fioeo. E sensa fare sacrifici, parché xe tuto un dirito, xe tuto scontà.
E eà machina? Par toso che conosso, i so genitori ghe ga ordinà eà màchina prima de i 18 ani, in modo che quando el sarìa deventà magiorene, e ’pena ciapà eà patente, l’automòbie bea fiamante gera za pronta! Ai me tenpi eà go conprà a rate, usa, disemo semi-nova, parché de na 500 ghe go dà 450 mila lire (nel 1964-65). ’Desso (come podì védare da eà foto che unisso), me so’ conprà na favolosa... nova de trinca... Se poe anca scherzare, no? Oncò co la màchina i putèi i vien conpagnà a scuoea, fin vissin a l’entrata, se i podesse i entrarìa anca in aula. Sti putei-ragassi, xe equipagià de scarpe par eà piova anca se no i ciapa gnanca na giossa, e giubeti, zaineti e altro tuti rigorosamente firmài. Ve raconto un episodio: fasevo ’e elementari e dovevo ogni giorno da soea e a piè fare el ponte de i Ognissanti par arivare in via Belzoni. De note xe vegnudo zo tanta neve e mi propio vissin eà me parochia so’ sprofondà fin ai zenoci. Beh! so’ stà tuta eà matina in classe con i piè bagnài e giassà, che podevo ciaparme ‘na memoràbie broncopolmonite. Altro che stivaeti e scarponsini adati a tute e stagion.

'Desso, me so' conprà na favolosa... nova de trinca...

In primavera gera più beo, l’àrgine se vestiva de un bel verde briante, i àlbari gaveva e geme color argento... Do ricordi me xe restà inpressi: gero squasi rivà sora el ponte quando do cavài robusti, ai lati del canàe, i trainava un barcon pien de... (non ricordo de cossa) che i avansava lentamente verso Porta Portèo. Che spetàcoeo! Penso che sia stà l’ultimo trasporto e mi incantà a vardare sta beissima sèna finché i xe sparìi a eà me vista. ’Naltra volta che caminavo par portarne a scuoea, me vegneva spontaneo vardare de qua e de là sensa perdere el passo, ma... me so’ fermà de colpo quando che go visto 1’aqua del canàe Piovego tuta tinta de rosso. No gera el tramonto (de matina?!), ma eà Viscosa che butava i residui de i coloranti nel fiume. Altro che Fontana de Trevi!! Pecà che no sia stà fotografà sta roba. Forse gera l’ano 1946-47, o quando che fasevo ’e medie. Beh! So’ ’ndà un poco fora tema, ma anca sto pìcoeo "vissuto" xe storia.

[torna sopra]