|
Cultura orale
Pasqua, na canpana in tel core
Na volta se cantava na cansoneta che diseva: "Aprite le finestre al nuovo sole, è primavera, è primavera; lasciate entrare un poco d’aria pura... è primavera, festa dell’amor..." Tuti la cantava continti, anca in giro par le strade. Se diseva che la gavesse vinto el Festival de Sanremo, parché la spranpanava intorno alegrìa. Gera come se el so ritornèo verzesse na finestra al sole, al celeste del celo, dopo on inverno pien de giasso e de neve.
Eco, a chel tenpo, la parola Pasqua la faseva proprio l’efeto de chel ritornèo: Pasqua! E se verzeva in te la mente na finestra portando na sventolada de aria nova, on semenò de oduri novi, calore de sole, odor de buti frischi, profumo de vita ancora in fasse, canti de alegrìa.
Pasqua! E ancora adesso, se ghe penso on poco, me par de sentire na canpana vegner sù dal fondo del core che la sona in tèrso "el segno de Pasqua". Cussì el se ciamava alora el son pi beo, pi alegro del Sabo Santo che ne anunciava la Pasqua.
Durante l’ano la se nominava spesso la Pasqua, e la se spetava come na festa tanto inportante. Par esenpio, se dovéa avere quasi tuti on vestitin novo o on par de scarpete. Noantri tusiti se sentìa spesso la mama, quando i piè no ghe staseva pi drento le scarpete e le gera scalcagnà, quando el vestitin gera streto e curto e la mama la sercava de farne star drento, zontàndoghe de ’e striche de nantro colore. Sì, gera alora che te la sentivi dire: "Tasi, tasi, no sta’ brontolare, te vedarè che par Pasqua conpremo on vestitin novo, o le scarpete nove." Gera cussì che se spetava chel dì za come on qualcosa de inportante.
Anca la cioca la gera stà messa a coare al momento giusto, in modo che da la so coà de ovi, nassesse par Pasqua i polastrèi. Quanto se se godeva a scoltare incantà el pio, pio quando i gera ancora drento l’ovo e te li sentivi bàtare el bèco fin che crepava la sgussa de l’ovo e pigolando i saltava fora, vardàndose ’torno. Noantri se voléa jutarli, ronpendo insieme la sgussa. Ma i grandi diseva de no, che no bisognava farlo. La zia Gilda però, magari on tochetin de sgusseta la ne ’a faséa rónpare e noantri gèrimo tuti continti e ancora pi el paréa contento el polastrèo, saltando fora prima par védare la luce co manco fadiga.
Anca la cavareta ne regalava i cavariti par Pasqua che i deventava i conpagni de i nostri zughi. Quanti salti se faséa insieme!
Anca i àlbari e la natura intiera se vestìa da festa, proprio par Pasqua. La tera, come na gran siora, la se coverzeva co on siàe de erbeta verde, cussì tenera, che paréa i primi caviji de on toseto.
Le siese le paréa spose in tel dì de le nosse, tute ricamà de fiuri de biancospin, color de la neve, cussì bei da far comossion. Drio la riva i primi bòcoi de viole mandava ’torno odor de paradiso e le "racoete" a la sera, da soto i fossi le saltava fora, col so cra, cra, cra.
Da i cai de le vegne se vedéa de le làgreme trasparente, che al calar del sole le pareva tute lucete inpissà. "Le xe lagrime de contentessa – diséa el popà – par dirne che le xe ancora vive dopo tanto giasso."
Par la Cesa ghe gera na setimana de preparassion a sta Pasqua. Gera "el passajo dal scuro a la luce", se sentiva dire in te le prèdiche. Al Vènare Santo nessun mancava a la prèdica. I ligava le canpane, (gera de uso dire) e po’ eco che al sabo sera on segno de canpana, pien de alegrìa ne diseva che Pasqua gera drio rivare. Eco alora, par chel dì, el vestitin novo, le scarpete nove, la torta margherita, come che gera tradission. Eco i uvi russi, che finalmente la mama trovava on pochetin de tenpo par incolorirli, co na brancà, no me ricordo pi de che colore, ma i dovéa vegner fora russi dal pignato infumegà, tacà la caena del camin. Sì, Pasqua la gera rivà, e noantri la se onorava co la nostra alegrìa.
E intanto anca le canpane sonava a distesa e chel son savéa dirne tante robe che gavéa odor de alegrìa, Chel’alegrìa lontana la se ga sconto drento el core, insieme co chel son de canpana. Adesso, se saro i oci, me vedo chel dì de Pasqua stanpà come na cartolina, ma de vita vera: la ceseta, el canpanìe, i fiuri de biancospin, i ovi russi, l’amore de na fameja tuta unìa, che savéa insegnarne nel so pìcolo, ne la so senplicità, de le robe grande, da tegnere drento el core, par insegnarne a vìvare voéndose ben.
E ancò, eco che ’torno al me fogolaro riva chel tenpo a inpienare el vodo. E chel son de canpana che vien sù dal core, me regala versi de poesia, par insucarare sto dì de la nostra Pasqua de ancò: "Se sora la colina, se ga desfà la neve / e i bucaneve del bosco / ghe dà posto a le vioe, / se la tera co on amore de mama / basa el soe par crear nova vita / se la note vestìa de luna / ga respiri de bòcoi / che sa de miele, / se in te i oci de chi te incontri par strada / ghe xe nova luce che parla de atesa / e te sinti l’aria vestirse de rosa / e cantare amore a la vita / a la nova speransa... xe qua Pasqua, / la xe tornà par svejare l’ànema / e dire che l’omo / ga da èssare senpre na esplosion de vita / de afeto, de amore..."
E tuto par che me rida intorno. La Pasqua lontana se smissia co quea de ancò. La me gente de ieri par che la rida al de là de le nùvoe. Come a dire: "Adesso xe vostra la vita, vostra sta Pasqua. Serchè de vìvarla ben, de voerve ben, e có ghe xe l’amore, la vostra Pasqua no sirà mai sola."
E mi no sò se el sia quel de ieri che vien sù dal core o quel de ancò, sto son de canpane che caressa l’aria, disendo col so din, don, dan: "Bona Pasqua, vecio mondo!"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Contento come na Pasqua
I xe tanti i significati che se ingreja intorno a la festa pi granda de l’ano: Pasqua la xe on incrocio de tradizion cristiane, ebraiche e pagane, come anca bona ocasion de usanze "gastronomiche e linguistiche", conpresi i modi de dire...
de Mario Klein
Memoria viva
Sperone Speroni
in difesa de la casa de ’l Petrarca
’Na bea passejata in te le riviere. El raconto de un prete su la casa de ’l Petrarca. La vita e le òpare de ’l grande leterato e filosofo padovan
de Gigi Vasoin
Da Vicenza
Quaranta cenacolini a Ciòsa
de Ines Scarparolo
|
